“Ala ka Kuma . . . barika b’a la”

¹ Ciden Pol y’a sɛbɛ ko “Ala ka kuma ɲɛnama lo, ani barika b’a la.” (Heb. 4:12, NW ). A ka kumaw kɔrɔ ye mun ye? Ala ka kuma, wala a ka cira, min be sɔrɔ Bibulu kɔnɔ, o be se ka nɔɔ barikaman to mɔgɔ kan. Hakilitigiya min be sɔrɔ Bibulu kɔnɔ, barika b’a la ka mɔgɔ ka ɲɛnamaya yɛlɛma k’a fisaya. A be dusu saalo ni jigiya minw di, o be mɔgɔw sama ka na niin Dibaga Jehova Ala ma. A ka cira be se ka mɔgɔ kɔnɔgwɛw bila ɲɛnamaya banbali sira kan. Nka n’an b’a fɛ k’o nɔɔw ye, an ka kan ka baara kɛ ni Bibulu ye tuma min na an be mɔgɔ wɛrɛw waaju.

² Wagati mana bɛn tuma o tuma, i ka Bibulusen dɔ kalan: A yirala ka fɔ ko weleweledala caaman ma teli tugun ka baara kɛ ni Bibulu ye soo ni soo. Yala ile fana be ten wa? Komi wagati tɛ mɔgɔ caaman bolo ka baro jan kɛ, i be taga a sɔrɔ o ye i bila ka deli ka gafew yira dɔrɔn mɔgɔw la ani ka Bibulusen dɔ kofɔ dɔrɔn u ye. An be weleweledala bɛɛ jija a ka jijali sɔbɛ kɛ ka Bibulusen dɔ kalan Bibulu kɔnɔ kibaro duman kofɔtɔ. O cogo la, a tigi bena a ye ko an ka cira be bɔ Bibulu kɔnɔ tiɲɛn na.

³ Hali ni mɔgɔ damanin lo delila ka Bibulu kalan, mɔgɔ caaman b’a bonya hali bi. Mɔgɔ dɔw bolo degunnen be, o bɛɛ n’a ta, u dɔw bena miniti damanin ta ka cira dɔ lamɛn n’an sinna k’a kalan Ala ka Kuma kɔnɔ. Ni vɛrise kɛɲɛnen dɔ kalanna ni dusu diya ye, ani ni ɲɛfɔli surun dɔ farala o kan, Jehova ka Kuma sebagaya be se ka nɔɔ ɲuman to a lamɛnbaga kan. Nka cogo juman na i be se ka jɛnɲɔgɔnya sigi i ka lakalitaw ni i ka Bibulu kalan cɛ?

⁴ Nin kɛ k’a filɛ periyodikiw yiratɔ: Sirikɔnsikiripsiyɔn kɔrɔsi-baga dɔ be baara barikaman kɛ ni Bibulusenw ye a kɛtɔ ka periyodikiw yira mɔgɔw la. A be Bibulu fitinin dɔ don a jufa kɔnɔ. N’a ye periyodiki dɔ yira ka ban, ani k’a tigi mako don barokun dɔ la, a be Bibulu dayɛlɛ ka vɛrise dɔ kalan min bɛnnen be a ka barokun ma. O be se ka kɛ n’an ye ɲiningali nɔgɔman kɛ ko: “Nin lahidu min be mɔgɔ jagwɛlɛya, i be mun miiri ka taga o kan ?” O kɔ, Bibulusen kɛɲɛnen dɔ kalan.

⁵ A laɲini ka Bibulusen kelen wala fila kalan n’i lamɛnbaga kelen kelen bɛɛ ye. Barika b’a la ka dusu don mɔgɔw la ani ka sira di mɔgɔ caaman ma u ka magwɛrɛ Ala la. —Yuh. 6:44.