An ɲɛnako fɔlɔ
1. Yesu y’a yira cogo di ko cidenya baara kɔrɔtalen lo ale fɛ?
1 Cidenya baara tun kɛra Yesu ɲɛnako fɔlɔ ye. A tun be baara kɛ kosɔbɛ, a tun be kilomɛtɛrɛ caaman tagama Palastine mara la, k’a seko bɛɛ kɛ waajuli la. A y’a ka ɲɛnamaya kɛ cogo nɔgɔman na walisa ka se ka wagati caaman sɔrɔ ani k’a ɲɛmalɔ cidenya baara kan (Mat. 8:20). Tuma min na jama y’a ɲini ko a ka to u fɛ walisa k’u ka banabagatɔw kɛnɛya, Yesu y’a fɔ u ye ko: “Wajibi don ne ka Ala ka masaya Kibaru Duman fɔ dugu tɔw fana la, k’a masɔrɔ ne cira o de kosɔn.”—Luka 4:43.
2. Mun na cidenya baara koo tun ka gwɛlɛ Yesu ma ten?
2 Mun na cidenya baara koo tun ka gwɛlɛ Yesu ma ten? Yesu ka haminanko fɔlɔ tun ye ka Jehova tɔgɔ saniya (Mat. 6:9). A tun be a sankolola Faa kanu, o kama a tun b’a fɛ k’a sago kɛ ani k’a ka cikanw bɛɛ kelen-kelen sira tagama ( Yuh. 14:31). Ka fara o kan, a tun b’a janto kosɔbɛ mɔgɔw la ani a tun b’a fɛ k’u dɛmɛ.—Mat. 9:36, 37.
3. An be se k’a yira cogo di ko cidenya baara ye an ɲɛnako fɔlɔ ye?
3 An ka Yesu ladegi: Ka cidenya baara kɛ an ɲɛnako fɔlɔ ye i ko Yesu, o be se ka gwɛlɛya sabu duniɲa nin ka koow be an ka wagati caaman ta ani a be ɲɛnagwɛko caaman bila an seen kɔrɔ (Mat. 24:37-39; Luka 21:34). O kama, an ka kan “ka se ka ko ɲumanw faranfasi”, ka wagati kunmabɔ walisa k’an yɛrɛ labɛn u kama ani ka to k’an seen don waajulibaara la (Fil. 1:10). An k’an jija k’an ka ɲɛnamaya kɛ cogo nɔgɔman na ani an kana duniɲa ka fɛɛnw diya bɔ a ɲɛɛ ma.—1 Kɔr. 7:31.
4. Mun na a kɔrɔtalen lo an ka kɛ ni ɲɛnako fɔlɔ ɲuman ye kabi sisan?
4 Ni wagati man ca, koo min kɔrɔtalen lo ka tɛmɛ tɔɔw kan, hakilitigi b’o lo kɛ a ɲɛnako fɔlɔ ye. Ɲɛyirali fɛ, ni a y’a lɔn ko balawoko dɔ be nana, a be se k’a ka wagati ni a ka fanga kɛ k’a ka denbaya kisi ani k’a sigiɲɔgɔnw lasɔmi. Nafa bɛrɛ tɛ baara minw na, olu be se ka to yen fɔlɔ. Arimagedɔn wagati tɔɔ ma ca tugun (Sof. 1:14-16; 1 Kɔr. 7:29). Walisa k’an yɛrɛ n’an lamɛnbagaw kisi, an ka kan k’an janto an yɛrɛ la ani mɔgɔw kalanni na tuma o tuma, a ka kɛ kafo kɔnɔ wala kiinw kɔnɔ (1 Tim. 4:16). Tiɲɛn na, kisili tɛna sɔrɔ n’an ma cidenya baara kɛ an ɲɛnako fɔlɔ ye!