I ɲɛnako ye mun ye?
1 Diinan jɛkulu caaman ka baara fanba ɲɛsinna fantanw dɛmɛni ma bolofɛnw ta fan fɛ: I n’a fɔ, ka lakɔlisow wala dɔgɔtɔrɔsow lɔ. Jehova Seerew kɔni tɛ ɲinɛ ‘ka ko ɲuman kɛ, ka dɔ bɔ u bolo fɛnw la ka o di’ mɔgɔ wɛrɛw ma. Nka, u ɲɛnako fɔlɔ ye ka mɔgɔw dɛmɛ hakilimaya ta fan fɛ.—Heb. 13:16.
2 Saan kɛmɛ fɔlɔ ka ɲɛyirali: A ka cidenyabaara wagati la dugukolo kan, Yesu ye koo ɲuman caaman kɛ mɔgɔw ye. Nka, a ka baara fɔlɔ tun ye “tiɲɛ seereya kɛli de ye” (Luka 4:43; Yuh. 18:37; Kew. 10:38). A ye ci di a ka kalandenw ma u ka “taa siyaw bɛɛ la ka u kɛ [ale] ka kalandenw ye, [. . .] ka u kalan.” (Mat. 28:19, 20). Ani, a fana y’a yira ko ale ye baara min daminɛ, mɔgɔ minw be lanaya la ale kan, u tun bena o baara lataga ɲɛ ka tɛmɛ ale ta kan ( Yuh. 14:12). Waajulibaara tun ye Yesu ka ɲɛnako fɔlɔ lo ye, sabu o baara be mɔgɔw dɛmɛ ka kisili sira lɔn.—Yuh. 17:3.
3 Ciden Pol tun be waajuli baara filɛ i ko koo “wajibiyalen”, a tɛ se k’a ɲɛɛ tugu cii min kan (1 Kɔr. 9:16, 17). A tun labɛnnen be ka saraka sifa bɛɛ kɛ, ka kɔrɔbɔli bɛɛ muɲu, wala ka tɔɔrɔ sifa bɛɛ kɛ walisa k’a ka cidenya baara dafa (Kew. 20:22-24). Ciden Piɛre n’a tagamaɲɔgɔnw ye koow jate o cogo kelen na fana. Kaso ni bugɔliw bɛɛ n’a ta, “u ma mɔgɔw kalanni ni Krisita Yesu Kibaru Duman fɔli dabila.”—Kew. 5:40-42.
4 Annugu do? Yala an ka ɲɛnako fɔlɔ ye ka Masaya kibaro duman weleweleda, ani ka mɔgɔw kɛ kalandenw ye wa? Mɔgɔw minw ‘sɛgɛnnen jigi tigɛlen be, i ko gɛnbaa tɛ saga minw la’, yala an b’an janto u la sɔbɛ la i n’a fɔ Yesu tun b’a kɛ cogo min na wa (Mat. 9:36)? Bi duniɲa ka koow ani Bibulu ka ciraya kumaw b’a yira ka gwɛ ko koow sigicogoya juguman nin be tagara a laban yɔrɔ la! N’an b’an ɲɛɛ jɔlen to waajuli baara kan, i ko baara kɔrɔtalenba, o bena an lasun ka timinandiya waajuli baara la ni kisɛya ye.
5 I yɛrɛ cogoya jate minɛ k’a filɛ: Bɛɛ ka cogoya be yɛlɛma tuma dɔw la. O kama, a ka ɲi an ka to k’a filɛ n’an tɛ se ka yɛlɛmani dɔw kɛ walisa ka dɔ fara an ka waajuli baara kan. Balimamuso dɔ kɛra kudayi piyɔniye ye saanw 1950, 1960, ni 1970 wagatiw la. Nka, kɛnɛyako kosɔn, a waajibiyara k’o baara lalɔ. Nka wagati nana se, a ka kɛnɛyako nɔgɔyara. A ma mɛɛn, a y’a yɛrɛ cogoya jate minɛ, ani a y’a ye ko a be se ka piyɔniye baara kɛ kokura. A saan 90nan na, a tagara piyɔniyew ka lakɔli kɛ. O kɛra hɛɛrɛ ye a fɛ dɛ! Ile do? Yala sɔɔni, i bena taga antɛrɛti la, wala i ka kalan bena dafa lakɔliso la wa? I ka koow cogoya mana yɛlɛma, yala i bena se ka kɛ piyɔniye ye wa?
6 Yesu y’a kɔrɔsi ko “Marthe hakili ɲaaminen tun don a ka so kɔnɔ baara caman kosɔn” minkɛ, a y’a ladi teriya la ko, a bena dugaba sɔrɔ n’a ye koow nɔgɔya (Luka 10:40-42). Yala i be se k’i ka ɲɛnamaya kɛcogo nɔgɔya wa? Yala waajibi lo furucɛ n’a muso fila bɛɛ ka baara kɛ wari kama wa? Ni denbaya ye yɛlɛmani dɔw kɛ, yala mɔgɔ kelen ka baara tɛ se ka gwa balo wa? Mɔgɔ caaman ye yɛlɛmaniw kɛ walisa ka dɔ fara u ka waajuli baara kan. O la, u ye nafa sɔrɔ hakilimaya ta fan fɛ.
7 Yesu n’a cidenw ye ɲɛyirali min to, an bɛɛ ka tugu o kɔ! Masaya kibaro duman waajuli ye baara kɔrɔtalenba ye. N’an b’an seko bɛɛ kɛ o la, siga t’a la, Jehova bena an ka jijali sɔbɛw duga.—Luka 9:57-62.