SOSIYETE ka lɛtiri

Masaya Weleweledala kanulenw:

“Ala de y’a falen.” (1 Kɔr. 3:6). A kɛra ɲagali ye k’a ye ko farankan sɔrɔla Afiriki tileben n’a cɛmancɛ jamanaw kɔnɔ dɛ! Waajulibaara saan 2003 kɔnɔ, weleweledalaw hakɛ cayaliba kura sɔrɔla o jamanaw caamanba kɔnɔ. An ka ɲɛyirali dɔw filɛ: Awirilikalo la, Benɛn jamana ye weleweledala 7 000 sɔrɔ. O cayaliba ɲɔgɔn tun ma deli ka sɔrɔ ka ye fewu. O kalo kelen na, Kameruni fana ye cayaliba kura sɔrɔ: weleweledala 28 931. Burkina ka cayaliba kura kɛra weleweledala 1 059 ye mɛkalo la. An ka foliw be aw ye o baara ɲuman kosɔn.

Baara min kɛra bibulukalanw ta fan fɛ, ani piyɔniye baara ta fan fɛ, Jehova ka duga be kɛra o fana kan. An ka jamanaw kɔnɔ, mɔyɛni ta fan fɛ, weleweledala kelen kelen bɛɛ sera ka bibulu-kalan kelen kɔni kɛ. O b’a yira ko farankan bena se ka sɔrɔ, i ko Yesu y’a fɔ cogo min na. A ko: “aw ka aw ɲɛw kɔrɔta ka forow filɛ. Suman kɔgɔra, a tigɛ tuma sera ka ban.” (Yuh. 4:34-36). I ko an ka rapɔɔri b’a yira cogo min na, “an sera dan min ma, an ka taama ka kɛɲɛ n’o ye.” (Filip. 3:16). An b’a ye ko balima caaman b’u seen donna piyɔniye baara la, ani u hakɛ be cayara ka taga. O b’an jagwɛlɛya kosɔbɛ. Ɲɛyirali dɔw filɛ: Marisikalo la, kudayi piyɔniye 1 540 sɔrɔla Kameruni. O kɛra cayaliba ye. O kalo kelen kɔnɔ, Togo ye piyɔniye 777 sɔrɔ. U caaman ye kamalenw ni sunguruw ye, ani u dɔw bele be taga lakɔli la. An b’a fɛ u ka ɲɛyirali ɲuman ka mɔgɔ wɛrɛw dɛmɛ u k’u seen don o baara nin na: min ɲɔgɔn tɛna segi ka kɛ ka ye tugun abada.—Waaj. 12:1; 2 Piɛre 3:11.

Salon, an ye baara ɲuman kɛ ni gafe caaman ye. Zurunali caamanba dira mɔgɔw ma, tiɲɛn kɔngɔ n’a minnɔgɔ be minw na. Awirilikalo la, zurunali 350 849 dira mɔgɔw ma Kameruni. O kalo kelen na, Sɛnɛgali ka weleweledala kelen kelen ye zurunali mɔyɛni 8 to mɔgɔw bolo. O kɛra cayaliba kura ye. Ani, walisa ka saan kuncɛ, an ye kanpaɲiba dɔ daminɛ ka kitabunin Ɲɛnamaya banbali sira jɛnsɛn. Kameruni jamana dɔrɔn kɔnɔ, o kitabunin 548 130 tilanna ka di kafo caaman ma zuwɛnkalo kɔnɔ. Mɔgɔ dɔw y’u mako don sɔbɛ la, ani bibulukalanw daminɛna n’o mɔgɔw ye. O cogo la, waajulibaara saan 2003 kɔnɔ, baara kɛra walisa ka hakilimaya sumansi dan, ani k’a sɔn.—1 Kɔr. 3:6.

Waajulibaara saan 2004 daminɛ nin na, an be jɛn ni aw ye ka delili kɛ ko Jehova ‘k’a falen.’

A balimaw

Burkina Faso ka biro