Tɔnbolo ka biro ka lɛtiri

Masaya weleweledala kanulenw:

Siga t’a la, Jehova y’an ka baara kɛli duga waajulibaara saan tɛmɛnen na. Kɔrɔsibaga tagamakɛlaw jɛnkulu fila ye baarakɛcogo ɲuman dege u ka lakɔli la: kelen, Togo, ani tɔɔ kelen Kameruni. Piyɔniyew ka lakɔli kɛra ɲinan fana, a basiginen tun be gafe kura kan. Piyɔniye kɔrɔ-kɔrɔ minw weelela ka na o lakɔli kɛ kokura, a kɛra sababu diiman ye olu fɛ dɛ! Santarafiriki jamana na, u ye balimaw dege Sosiyete ka gafew bayɛlɛmacogo la. Ani, mansi kuraw dira u ma o baara kama. Siga t’a la, o kalan sifaw bɛɛ bena o balimaw dɛmɛ k’u ka baara kɛcogo fisaya. Ani, a nafa bena kɛ kafow ta ye.—Esayi 54:13.

Togo jamana na, zanwiyekalo laban na, weleweledalaw cayaliba kɛra 13405 ye. Nka kalo nɔfɛta kɔnɔ, politikikow ɲagamina o jamana kɔnɔ. A ma mɛɛn, fariyakow kɛra jamana yɔrɔ caaman na. O sen fɛ, an balima dɔw y’a ye ko a ka fisa ka taga kalifa jamana wɛrɛw la u gɛrɛ fɛ. Nka sisan, u caaman segira ka na u ka soo kɔnɔ. An ka jateminɛ na, sanni lɛtɛrɛ nin ka se aw ma, o bena a sɔrɔ misɔndenw segira ka na u ka cidenya la ka ban. O gwɛlɛyaw bɛɛ n’a ta, piyɔniye kɔrɔsigi 3800 sɔrɔla marisi ni awirili kalow la.

Baaraba kɛra yɔrɔ bɛɛ la Kirista saya Hakilijigi wagati la. Ganbi, weleweledalaw ye jijalibaw kɛ ka lɛri mɔyɛni 13,6 sɔrɔ. O cogo kelen na, Sɛnɛgali ka lɛri mɔyɛni kɛra 13,7 ye awirilikalo la. O kalo kelen na, Laginɛ Biso ka weleweledalaw cayaliba kɛra 114 ye. O kɛra farankan 21% ye salon ta kan. Kameruni ka weleweledalaw cayaliba kɛra 30241 ye mɛkalo la. U ye zurunali 615505 to mɔgɔw ye. O ɲɔgɔn tun ma deli ka kɛ.

Baraji sɔrɔla fana Masaya Boonw lɔli baara la. Togo, Masaya Boon 100nan dayɛlɛla awirilikalo la. Kameruni, Masaya Boon 163nan baara banna mɛkalo la. Boon lɔli jɛnkulu dɔ y’a latigɛ ka balimamusow dege boon lɔli baara sifaw bɛɛ la. U sigiɲɔgɔnw y’u ye baara la minkɛ, u y’a fɔ ko: “Jehova seere musow ye boon lɔbagaw ŋagaw ye tiɲɛn na dɛ!”

An be Jehova waleɲuman lɔn kosɔbɛ, sabu a y’an ka baaraw kɛli duga waajulibaara saan tɛmɛnen na. Aw ye kisɛya min kɛ ka Masayakow lataga ɲɛ, o ka kan ni tandoli ye. An kɛtɔ ka waajulibaara saan kura daminɛ, an be Jehova deli a k’an ka jijaliw kɛli duga: an be jɛn ka minw kɛ ale ka “nɔɔrɔ tanuli” kosɔn.—Efes. 1:12.

A’ balimaw,

Tɔnbolo ka biro