Tandoli be barika don mɔgɔ la
1 Sungurunin lanen kɔ, a kasitɔ y’a fɔ ko “yala ne ma kɛ deen ɲuman ye bi wa?” O ɲiningali y’a bamuso kabakoya. Hali n’a tun y’a kɔrɔsi ko a denmuso y’a jija kosɔbɛ ka koow kɛ ka ɲɛ o loon na, a tun m’a ɲini k’a tando hali dɔɔni. O sungurunin ka kasi b’an hakili jigi ko an bɛɛ, balikuw fara denmisɛnw kan, an bɛɛ mako be tandoliw la. An lamini mɔgɔw be koo ɲuman minw kɛ, yala an be barika don u la, an kɛtɔ k’u fo o kosɔn wa?—Ntal. 25:11.
2 An balima kerecɛnw be sababu ɲuman caaman di an ma an k’u tando. Diinan mɔgɔkɔrɔw, kɔrɔsigi cidenw, ni piyɔniyew be baara kɛ sɔbɛ la walisa k’u ka kunkanbaaraw dafa (1 Tim. 4:10; 5:17). Bangebaga minw masirilen be Ala la, u b’u seko bɛɛ kɛ walisa k’u deenw lamɔ Jehova ka sira la (Efes. 6:4). Kerecɛn kamalenw ni sunguruw be bondori kɛ sɔbɛ la walisa k’u lafasa “duniɲa ka hakili” ma (1 Kɔr. 2:12; Efes. 2:1-3, NW). Kɔrɔya, kɛnɛyako, wala gwɛlɛya wɛrɛw bɛɛ n’a ta, balima wɛrɛw be kantigiya kɛ Jehova ka baara la (2 Kɔr. 12:7). O ɲɔgɔnna mɔgɔw bɛɛ ka kan ni tandoliw ye. Yala an be sɔn a la k’u ka jijaliw ka kan ni tandoliw ye wa?
3 Tɔgɔla tandoli tigitigiw: Tandoli mana lase kafo bɛɛ ma, a ka di an bɛɛ ye k’o mɛn tiɲɛn na. Nka an tɔgɔla tandoli mana sin ka lase an ma, o barika ka bon ka tɛmɛ. Ɲɛyirali fɛ, Romɛkaw ka bataki sapitiri 16nan kɔnɔ, Pol ye tandoliw tilen ka sin balima dɔw ma u yɛrɛw tɔgɔ la, i n’a fɔ Fɛbɛ, Prisiye ni Akilas, Trifɛnɛ ni Trifosɛ, ani Pɛrside (Rom. 16:1-4, 12). I be taga a sɔrɔ a ka kumaw ye barika don o balima kantigimanw la dɛ! O tandoli ɲɔgɔnw b’an balimaw jigi sigi ko an mako b’u la. Ani, a b’a to an be magwɛrɛ ɲɔgɔnw na. Kɔsa la, yala i ɲɛsinna balima dɔ ma k’a tɔgɔla tandoli tigitigi dɔ lase a ma wa?—Efes. 4:29.
4 An k’a kɛ n’an dusu ye: N’an b’a fɛ an ka tandoli ka barika don mɔgɔ la, fɔɔ an k’a kɛ ni kɔnɔgwɛ ye. Mɔgɔw b’a lɔn n’an be kumana ni kɔnɔgwɛ ye, wala n’an be “kuma nugulen” fɔra dɔrɔn (Ntal. 28:23). An kɛtɔ k’an jija ka mɔgɔ wɛrɛw ka jogo ɲumanw kɔrɔsi, an dusu bena an lasun k’u tando. An k’an dusu dayɛlɛ ka tandoli lakika kɛ, sabu an b’a lɔn ko “kuma ɲuman fɔlen a waati bɛnnen na”, a ka di dɛ!—Ntal. 15:23.