An k’an mako don mɔgɔw la: An kɛtɔ k’u tando
1 Tandoli mana kɛ ni kɔnɔgwɛ ye, a be mɔgɔw jagwɛlɛya, a b’u lasun ka koow kɛ, ani a be ninsɔndiya bila u la. Weleweledala caaman y’a kɔrɔsi ko, waajuli kɛtɔ, tuma caaman na, tandoli kuma damanin b’a to mɔgɔw be sɔn ka lamɛnni kɛ u fɛ. Cogo juman na an be se ka tandoli lase mɔgɔw ma n’an b’a ɲinina ka kibaro duman fɔ u ye?
2 An ka kɔrɔsili kɛ: Yesu Krista kɔseginen kɔ sankolo la, a ye kafo wolonfila dɔw ka wale ɲumanw kɔrɔsi Azi tileben yan fan fɛ mara la (Jira. 2:2, 3, 13, 19; 3:8). O cogo kelen na, an be mɔgɔ minw kunbɛn waajuli kɛtɔ, n’an b’an mako don u la ni kɔnɔgwɛ ye, o bena an lasun an ka cogoya ɲini k’u tando. Ɲɛyirali fɛ, ni mɔgɔ dɔ ka luu ladonnen lo koɲuman, ni bangebaga dɔ b’a mako don a deenw la ni kanuya ye, wala ni mɔgɔ dɔ ye yɛlɛmisɛn kɛ k’an fo, o bɛɛ be cogoya di an ma k’o mɔgɔw tando. Yala i ka teli k’o ɲɔgɔnna koow kɔrɔsi ani ka tɛmɛ u fɛ ka tandoli kɛ wa?
3 An ka lamɛnni kɛ koɲuman: Waajuli kɛtɔ, an ka ɲiningaliw kɛ, minw be bɛn, walisa ka mɔgɔw lasun u ka kuma. An ka bonya la u kan an kɛtɔ ka lamɛnni kɛ koɲuman n’u be kumana (Rom. 12:10). N’a sɔrɔ an bena miiriya dɔ sɔrɔ u ka kuma la min ka kan ni tandoli sɔbɛ ye. O la, an be se k’an basigi o kan walisa ka baro lataga ɲɛ.
4 An ka hakili sɔrɔ: N’an lamɛnbaga ye kuma dɔ fɔ min ma bɛn Bibulu ka tiɲɛn kuma ma, an ka ɲi ka mun lo kɛ do? Sanni an k’o ngalon kuma sɔsɔ, an k’an lamɛnbaga fo, ani an ka taga ɲɛ ni baro ye an kɛtɔ ka kuma dɔ fɔ, i n’a fɔ: “Ne ɲɛɛ b’a la ko barokun nin ka di aw ye” (Kolos. 4:6). Hali n’a tigi ye sɔsɔlikɛla ye, tuma caaman na an be se k’a tando sabu a b’a mako don ni kɔnɔgwɛ ye an ka baro la. O kɛcogo teriman be se k’a to a tigi be magaya n’a be komi kibaro duman koo man di a ye fewu.—Ntal. 25:15.
5 N’an b’a fɛ nafa ka sɔrɔ an ka tandoli kumaw la, fɔɔ an k’u fɔ ni kɔnɔgwɛ ye. O ɲɔgɔnna kumaw be mɔgɔ sabati. U be bonya la Jehova kan. Ani, u be se ka Masaya cira diya don mɔgɔw la.