Waajuli kɛtɔ, an ka ɲɔgɔn jija
1 A ka di an bɛɛ ye ka jijali kumaw mɛn wagati “bɛnnen” na (Ntal. 25:11). N’an be waajuli kɛ ni mɔgɔ dɔw ye, an be se ka mun lo kɛ ka la a la ko an ka baro b’u jija?
2 Baro, min be mɔgɔ jija: Waajuli baara kɛtɔ, a ka ɲi an ka baro kɛ Alakow kan fana. O be mɔgɔ jaa gwɛlɛya dɛ! (Zab. 37:30). An be se ka baro kɛ gafe yiracogo kan wala ka waajuli wale kura dɔw lakali minw be mɔgɔ jija (Kɛw. 15:3). Yala an ye miiriya diiman dɔw sɔrɔ an kelenna Bibulu kalan na, zurunali kuraw kɔnɔ, wala kafo ka lajɛnw na wa? An be se ka baro kɛ hakilinata dɔw kan an ye minw mɛn kɔsa la foroba kalan ditɔ Masaya boon kɔnɔ.
3 Ni lamɛnnikɛla ye sɔsɔli dɔ lawuli, an tɛ se ka min jaabi, o be se ka an dusu tiɲɛ. N’an bɔra o soo kɔnɔ, a ka ɲi an ka miniti damanin ta k’a filɛ n’an baarakɛɲɔgɔn ye cogo min na an bena o sɔsɔli nin ɲɔgɔn jaabi siɲɛ wɛrɛ. N’a sɔrɔ an be se k’a filɛ gafe Comment raisonner kɔnɔ. N’an baarakɛɲɔgɔn ka gafe yiracogo diyara an ye, an be se ka tandoli kuma dɔ fɔ k’a jija ni kɔnɔgwɛ ye.
4 An k’a bɔ an yɛrɛ la: Yala mɔgɔ dɔw be yen an ka kitabukalan jɛnkulu la an ni minw mɛɛnna ka waajuli kɛ ɲɔgɔn fɛ wa? N’an b’a ɲini an balima dɔ fɛ a k’an bila sira cidenya baara la, o be se ka kɛ ‘ɲɔgɔn jijali’ sababu ye an fɛ (Rom. 1:12). A ka di kudayi piyɔniyew ni piyɔniye kɔrɔsigiw ye ka baarakɛɲɔgɔn sɔrɔ sɔgɔmada joona wala tileben kɔni, tuma min na weleweledala bɛrɛ tɛ waajuli kɛra. An be se ka piyɔniyew dɛmɛ an kɛtɔ k’u bila sira waajuli la. Yala weleweledala farikolo dɛsɛbagatɔ dɔ be yen ani a ka kɛnɛyakow b’a kɛ a tɛ se ka caaman kɛ cidenya baara la wa? N’an be labɛn kɛ walisa o ɲɔgɔnna mɔgɔ k’an bila sira bibulukalan na, o be se ka kɛ dɛmɛ ye an bɛɛ fɛ.—Ntal. 27:17.
5 Tandoli ni waleɲumanlɔn kumaw be mɔgɔw jija hali koo fitininw na. Waajuli kɛtɔ n’an balimaw ye, an ka kan k’a to an hakili la ko an ka ɲi ka to ka “dɔ fara ɲɔgɔn barika kan.”—1 Tes. 5:11.