Minw b’u jigi la Jehova kan, a b’u dɛmɛ
1 Mɔgɔ caaman b’a jati ko wari ni fanga ni hakilidiya lo be se k’u dɛmɛ ka sanga sɔrɔ (Zab. 12:5; 33:16, 17; 49:7). Nka minw be siran Jehova ɲɛ ani u b’u jigi la a kan, Bibulu b’u jigi sigi ko ale ye u ‘dɛmɛbaa n’u ka nɛgɛbɛnnan ye.’ (Zab. 115:11). An ka yɔrɔ fila filɛ, minw na an ka kan k’a yira ko an b’an jigi la Jehova kan.
2 I ko kerecɛn cidenw: Tuma o tuma, n’an b’an ka ciiw dafara kafo kɔnɔ, wala n’an be mɔgɔw kalanna waajuli la, an ka kan k’an bolo la an ka Ala kan. An ka Yesu ka ɲɛyirali filɛ. Hali n’a tun ye Ala Dencɛ ye, a m’a bolo la a yɛrɛ ka hakilitigiya wala a ka hakilidiya kan, sanko anw. Nka a y’a jigi bɛɛ la a sankolola Faa lo kan ( Yuh. 12:49; 14:10). An mako b’a la k’o ɲɔgɔn lo kɛ (Ntal. 3:5-7). An be jijali minw kɛ ni majigilenya ye, u bena Jehova tando ani ka mɔgɔ wɛrɛw nafa fɔɔ ni Jehova b’o jijaliw duga.—Zab. 127:1, 2.
3 An b’a yira ko an b’an jigi la Jehova kan n’an b’a deli a k’an ɲɛminɛ, ani a k’an dɛmɛ n’a ka hakili senu ye (Zab. 105:4; Luka 11:13). Ka fara o kan, an b’a yira ko an b’an jigi la Ala kan, n’an b’an ka kalan basigi a ka Kuma kan, Bibulu kɔnɔ. Barika b’o Kuma la ka mɔgɔw dusukun sɔrɔ, ani k’u ka ɲɛnamaya yɛlɛma (Heb. 4:12). N’an be ‘baara kɛ, ka kɛɲɛ ni Ala ka barika dilen ye’ o be Jehova tando.—1 Piɛre 4:11.
4 N’an be gwɛlɛyaw kunbɛnna: An mako b’a la fana ka dɛmɛ ɲini Jehova fɛ ni degunw ni gwɛlɛyaw b’an kan (Zab. 46:2). Ɲɛyirali fɛ, an ka patɔrɔn be se ka sigasiga ka wagati di an ma walisa an ka taga lajɛnba la. Walima, an be se ka gwɛlɛya dɔ sɔrɔ an ka gwa kɔnɔ. O la, an b’a yira k’an b’an jigi la Jehova kan n’an b’a deli sɔbɛ la, ani n’an b’a ka cifɔlenw sira tagama, a be minw di an ma ka tɛmɛ a ka Kuma n’a ka ɔriganisasiyɔn fɛ (Zab. 62:9; 119:143, 173). O cogo la, Jehova sagokɛlaw b’a ka dɛmɛ ye u ka ɲɛnamaya kɔnɔ.—Zab. 37:5; 118:13, 16.
5 Jehova yɛrɛ b’an jigi sigi ko: “Mɔgɔ min bɛ a yɛrɛ kalifa Matigi la, ka Matigi kɛ a sinsin yɔrɔ ye, o ye dubaden ye.” ( Jer. 17:7). O la, an be koo o koo kɛ, an k’a yira ko an b’an jigi la a kan!—Zab. 146:5.