Tile fila lajɛnba ka kalan kura
1 Komi duniɲa sabatilen tɛ, walisa ka to kelen kan lanaya la, an ka kan k’an jigi la Jehova kan. An be se k’o yira cogo di an ka loon o loon ɲɛnamaya kɔnɔ? N’an b’an jigi la Jehova kan, o be nɔɔ juman to an ka ɲɛnamaya kan, ani an ka denbaya ta kan? Cogo di o b’an dɛmɛ k’an yɛrɛ lafasa Sitanɛ ka duniɲa nɔɔ ma? Waajulibaara saan 2003 ka tile fila lajɛnba kalan bena o ɲiningaliw jaabi. A kuun ko: “I jigi la Jehova kan, ani koo ɲuman kɛ.”—Zab. 37:3, NW.
2 K’an jigi la Jehova kan, o tɛ dan kobabaw, wala wagati gwɛlɛnw dɔrɔn ma. A nɔɔ be ye an ka ɲɛnamaya kan loon o loon. Kalan fɔlɔ bena o lo yira ka gwɛ. A kuun ko: “I jigi la Jehova kan tuma bɛɛ” (Zab. 62:9). Mɔgɔ naani bena ɲɛfɔli kɛ kalankun nin kan ka tugu ɲɔgɔn kɔ: “An k’a yira ko an jigi be Jehova kan.” U bena a yira cogo min an be se ka Bibulu ka kalan sɔrɔ ani k’a sira tagama walisa ka hɛɛrɛ sɔrɔ furu kɔnɔ, ka see sɔrɔ denbaya gwɛlɛyaw kan, ani k’an mako wasa farikolo ta fan fɛ.
3 Sitanɛ ka duniɲa b’a ɲini k’an waajibiya ka ɲuman ni juguman filɛcogo yɛlɛma. A b’a fɛ an ka koo kɔrɔtalenw jate cogoya wɛrɛ la (Isa. 5:20). “An kana boliboli fɛɛn nafantanw nɔfɛ”, ani “An ka ban juguman la, an ka kɛ ɲuman kɛlaw ye.” O kalan fila bena fanga di an ma walisa an k’an cɛsiri ka Jehova ka sariya kɔrɔtalenw bato.—Amos 5:14.
4 Tuma min na Jehova bena daan sigi duniɲa juguman nin na, a sagokɛlaw ka kan k’u jigi bɛɛ la a kan. Foroba kalan bena o lo yira ka gwɛ. A kuun ko: “Duniɲa ka ɲani laban ka surun.” O kɔ, kalan nin bena a ɲini an fɛ an k’an yɛrɛ sɛgɛsɛgɛ: “Yala a bena jate ko i ka kan ni Ala ka Masaya ye wa?” Walisa k’o lajɛnba kuncɛ, u bena an jija ni kalan nin ye: “I jigi la Jehova ka lahiduw kan.”
5 Batɛmu kalan ye lajɛnba bɛɛ ka wagatiba ye. Mɔgɔ o mɔgɔ b’a fɛ ka batise, a ka kan ka ɲɛsin diinan mɔgɔkɔrɔw ɲɛbila ma joona joona walisa labɛn ka kɛ o kama.
6 An ka wagati nin be yɛlɛmayɛlɛma. Jigi be se ka la Jehova kelenpe lo kan. Ale lo be sabatili di (Zab. 118:8, 9). An bɛɛ ka kɛ o lajɛnba ka kalan bɛɛ la. O cogo la, an ka jigidali bena barika sɔrɔ.