La a la ko Jehova ka kɛtaw tilennin lo tuma bɛɛ

1-2. a) Minw be ni kuntigiya ye, mun na a ka gwɛlɛ mɔgɔ caaman fɛ bi ka la olu la? b) An bena mun lo lajɛ barokun nin na?

MINW be ni kuntigiya ye, a ka gwɛlɛ mɔgɔ caaman fɛ bi ka la olu la. O mɔgɔw y’a kɔrɔsi ko gofɛrɛnɛmanw n’u ka sariyaw ka teli ka waritigiw ni mɔgɔbabaw lo latanga, nka u tɛ dɛmɛ bɛrɛ lase fantanw ma. Bibulu yɛrɛ b’a fɔ ko: “Adamaden le be kuntigiya kɛ a tɔɲɔgɔn kan k’a tɔɔrɔ.” (Waaj. 8:9). Diinan kuntigi dɔw fana be to ka koo juguw kɛ. O kama, mɔgɔ caaman lanin tɛ Ala la tugun. O la, n’an be bibulukalan kɛra ni mɔgɔ dɔ ye, an ka ɲi k’a tigi dɛmɛ a ka se ka la Jehova n’a ka lasigidenw na minw be dugukolo kan.

² Nka, Bibulu kalandenw dɔrɔn lo mako t’a la ka la Jehova n’a ka ɔriganisasiyɔn na. Hali n’an be Jehova sago kɛra kabi saan caaman, an ka ɲi ka la a la tuma bɛɛ ko Jehova be koow kɛ cogo min na, o lo ɲɔgɔn tɛ yen. Nka tuma dɔw la, koo dɔw be se k’o lanaya kɔrɔbɔ. Barokun nin na, an bena o koo saba lajɛ: 1) n’an be Bibulu ka maana dɔw kalanna, 2) ni Jehova ka ɔriganisasiyɔn ye cikanw di an ma ani 3) n’an nana gwɛlɛyaw sɔrɔ sini ma.

N’I BE BIBULU KALANNA, A YIRA KO I LANIN BE JEHOVA LA

3. Bibulu ka maana dɔw be se k’an ka limaniya kɔrɔbɔ cogo di Jehova koo la?

³ N’an be Ala ka Kuma kalanna, n’a sɔrɔ an b’an yɛrɛ ɲininga fɛɛn min kama a ye mɔgɔ dɔw minɛ cogo dɔw la ani fɛɛn min kama a ye desizɔn dɔw ta. Misali la, a fɔra Nɔnburuw ka kitabu kɔnɔ ko Jehova ye jalaki ben Israɛlden dɔ kan ko a ka kan ka faga sabu a ye lɔgɔ cɛ lafiɲɛlon na. Saan kɛmɛkulu caaman o kɔ, a yirala Samuyɛli ka kitabu filanan kɔnɔ ko masacɛ Dawuda ye kakalaya kɛ ani ka mɔgɔ faga, nka Jehova yafara a ma (Nɔnb. 15:32, 35; 2 Sam. 12:9, 13). Dawuda ye kakalaya kɛ ani ka mɔgɔ faga. Nka cɛɛ min ye lafiɲɛlon sariya tiɲɛ, a be komi ale ka jurumu ma se Dawuda ta ma. O kama, an be se k’an yɛrɛ ɲininga ko: “Mun na Jehova yafara Dawuda ma, nka a ye jalaki ben o cɛɛ kan ko a ka kan ka faga?” Walisa k’o ɲiningali jaabi, an ka koo saba lajɛ an ka ɲi ka minw to an hakili la n’an be Bibulu kalanna.

4. Min fɔra Zɛnɛzi 18:20, 21 ani Deteronɔmu 10:17 kɔnɔ, o b’a yira cogo di ko Jehova ka kitikow tilennin lo tuma bɛɛ?

⁴ Bibulu tɛ kunnafoniw bɛɛ di maana dɔw kɔnɔ. Ɲɛyirali fɛ, an b’a lɔn ko Dawuda tun nimisara kosɔbɛ a ka jurumuw kosɔn (Zab. 51:4-6). Nka cɛɛ min ye lafiɲɛlon sariya tiɲɛ, ale tun ye mɔgɔ sugu juman lo ye? Yala a nimisara a ka jurumu kosɔn wa? Yala wagati tɛmɛninw na, a ye Jehova ka sariyaw tiɲɛ ka ye wa? Yala u tun ye kangari la a ye ani a m’a janto o la wala a banna o la wa? Bibulu t’o fɔ. Nka an be se ka la a la ko “tilenbaliya [tɛ Jehova] ka koo la.” (Deter. 32:4). A be kunnafoniw bɛɛ lajɛ ka sɔrɔ ka desizɔnw ta. Mɔgɔw be min fɔ, u be ni miiriya tilenbali minw ye wala fɛɛn o fɛɛn b’a to u tɛ koow filɛ ni ɲɛɛ ɲuman ye, a tɛ basigi o kan (Zɛnɛzi 18:20, 21; Deteronɔmu 10:17 kalan). N’an b’a ɲini ka Jehova n’a ka sariyaw lɔn koɲuman, an bena la a la kosɔbɛ ko a ka kitikow tilennin lo tuma bɛɛ. N’an be ni ɲiningali dɔw ye Bibulu ka maana dɔ koo la ani an tɛ ni jaabiliw ye sisan, an be se ka la mun lo la? An be an ka Ala lɔn kosɔbɛ minkɛ, an be se ka la a la ko a “ka koo bɛɛ tilennin lo.”—Zab. 145:17.

5. An be koo minw jati tilenninyakow ye, an ka dafabaliya be nɔɔ to o kan cogo di? (Koorilen nin fana lajɛ: “An ka dafabaliya b’a to an tɛ koow faamu ka ɲɛ tuma dɔw la.”)

⁵ An be koo minw jati tilenninyakow ye, an ka dafabaliya be nɔɔ to o kan. Ala y’an dan a yɛrɛ jaa la. O kama, an b’a fɛ mɔgɔw ka ɲɔgɔn minɛ ni tilenninya ye sɔbɛ la (Zɛnɛzi 1:26). Nka an ye mɔgɔ dafabaliw ye minkɛ, an be se ka kiti tilenbali tigɛ hali n’an b’a miiri ko an be ni kunnafoniw bɛɛ ye. Miiri k’a filɛ Zonasi dusu tiɲɛna cogo min na tuma min na Jehova y’a latigɛ ka makari Ninivukaw la (Zonasi 3:10–4:1). Nka Jehova makarila u la minkɛ, Ninivuka mɔgɔ 120 000 ni kɔ bɛɛ kisira sabu u nimisara! A laban, Zonasi lo tun ka kan ka kolo, Jehova tɛ.

6. Mun na waajibi tɛ Jehova k’a ɲɛfɔ an ye fɛɛn min kama a be desizɔn dɔw ta?

⁶ Waajibi tɛ Jehova k’a ɲɛfɔ adamadenw ye fɛɛn min kama a be desizɔn dɔw ta. Galen, Jehova ye desizɔn minw ta wala a tun b’a fɛ ka minw ta, a y’a to a sagokɛlaw y’u ka miiriya fɔ o koo la (Zɛnɛzi 18:25; Zonasi 4:2, 3). Ani tuma dɔw la, a y’a ɲɛfɔ fɛɛn min kama a ye desizɔn dɔw ta (Zonasi 4:10, 11). Nka, waajibi tɛ Jehova k’o ɲɛfɔ an ye. Ale lo y’an Danbaga ye minkɛ, a mako t’a la an ka sira di a ma fɔlɔ a be sɔrɔ ka koo dɔ kɛ. Koo dɔ kɛnin kɔ fana, a mako t’a la an k’a yira ko an sɔnna o ma.—Ezayi 40:13, 14; 55:9.

I JIGI LA JEHOVA KAN NI CIKANW DIRA I MA

7. Mun lo be se ka gwɛlɛya an ma ani mun na?

⁷ Siga t’a la, an sɔnna a ma n’an dusu bɛɛ ye ko Jehova ka kɛtaw tilennin lo tuma bɛɛ. Nka n’a sɔrɔ min ka gwɛlɛ an ma, o ye ka la a ka lasigidenw na minw ye adamadenw ye. N’a sɔrɔ an b’an yɛrɛ ɲininga ni u be koow kɛ tiɲɛn na ka kɛɲɛ ni Jehova ka cikanw ye wala ni u b’o kɛ ka kɛɲɛ n’u yɛrɛ ka miiriya lo ye. N’a sɔrɔ mɔgɔ dɔw tun b’o lo miiri Bibulu sɛbɛwagati la. Ɲɛyirali minw kofɔra dakun 3nan na, an ka miiri u la. Cɛɛ min tun ye lafiɲɛlon sariya tiɲɛ, ale somɔgɔ dɔ tun be se k’a yɛrɛ ɲininga ni Musa tun y’a ɲini tiɲɛn na ka Jehova ka miiriya lɔn ka sɔrɔ ka jalaki ben o cɛɛ kan ko a ka kan ka faga. Iticɛ Uri min muso ye kakalaya kɛ, ale teri dɔ tun be se k’a fɔ ko Dawuda ye masacɛ ye minkɛ, a tɛmɛna a ka setigiya fɛ walisa saya jalaki kana ben a kan, k’a sɔrɔ a tun ka kan n’o ye. Jehova ka lasigiden minw be dugukolo kan, a lanin b’u la. O kama, an tɛ se k’a fɔ ko an lanin be Jehova la, n’an lanin tɛ o mɔgɔw la.

8. Kerecɛn kafo labɛnnin lo cogo min na bi, jɛɛn juman lo be o ni Kɛwaliw 16:4, 5 ka fɔta cɛ?

⁸ Jehova ka ɔriganisasiyɔn faan min be dugukolo kan, Jehova be tɛmɛ “jɔncɛ kantigiman hakiliman” lo fɛ bi k’o ɲɛminɛ (Mat. 24:45, NW). I ko saan kɛmɛkulu fɔlɔ ka koow ɲɛnabɔla jɛnkulu, o jɔncɛ be Ala sagokɛlaw ɲɛminɛ duniɲa kuru bɛɛ kɔnɔ. A be cikanw di fana diinan mɔgɔkɔrɔw ma (Kɛwaliw 16:4, 5 kalan). Olu b’o cikanw labato kafow kɔnɔ. An b’a yira ko an lanin lo Jehova ka kokɛcogow la n’an b’a ka cikanw labato, an b’o minw sɔrɔ ka bɔ a ka ɔriganisasiyɔn wala diinan mɔgɔkɔrɔw fɛ.

9. Tuma juman lo la a be se ka gwɛlɛya an ma ka sɔn diinan mɔgɔkɔrɔw ka desizɔn dɔ ma ani mun na?

⁹ Tuma dɔw la, a be se ka gwɛlɛya an ma ka sɔn diinan mɔgɔkɔrɔw ka desizɔnw ma. Misali la, kɔsa la kafo dɔw fara farala ɲɔgɔn kan ani o y’a to kafo dɔw farala kafokulu wɛrɛ kan. Yɔrɔ dɔw la diinan mɔgɔkɔrɔw y’a ɲini weleweledala dɔw fɛ u ka yɛlɛma kafo wɛrɛw kɔnɔ. U y’o kɛ walisa Masaya Boon ka se ka fa. N’u y’a ɲini an fɛ ko an ka yɛlɛma kafo wɛrɛ kɔnɔ, a be se ka gwɛlɛya an ma ka taga k’an somɔgɔw n’an teriw to yen. Yala Jehova lo be cikanw di diinan mɔgɔkɔrɔw ma k’a yira u ka ɲi ka weleweledala kelen kelen bɛɛ bila ka taga kafo min kɔnɔ wa? Ayi dɛ! O be se k’a to a be gwɛlɛya an ma k’u ka cikanw labato. Nka ni Jehova b’a to diinan mɔgɔkɔrɔw ka o desizɔnw ɲɔgɔn ta, o b’a yira ko a lanin b’u la. An fana ka ɲi ka la u la.b

10. Ka kɛɲɛ ni Eburuw 13:17 ye, mun na an ka ɲi ka kolo diinan mɔgɔkɔrɔw ye?

¹⁰ An ka ɲi ka kolo diinan mɔgɔkɔrɔw ye ani k’u ka desizɔnw labato. Mun na an ka ɲi k’o kɛ hali n’o desizɔnw bɛnnin tɛ an ma? An ka ɲi k’o kɛ sabu o be Ala sagokɛlaw ka kelenya sabati (Efɛz. 4:2, 3). Ni kafodenw bɛɛ be diinan mɔgɔkɔrɔw jɛnkulu ka desizɔnw labato, kafo be yiriwa (Eburuw 13:17 kalan). Jehova ko mɔgɔ minw k’u janto an na, n’an be kolo olu ye, an b’a yira ko an lanin lo a la. O yɛrɛ lo kɔrɔtanin lo kosɔbɛ.—Kɛw. 20:28.

11. Mun lo be se k’an dɛmɛ an ka sɔn diinan mɔgɔkɔrɔw ka cikanw ma?

¹¹ Mun lo be se k’an dɛmɛ an ka sɔn diinan mɔgɔkɔrɔw ka cikanw ma? Min be se k’an dɛmɛ, o ye k’a to an hakili la ko ni diinan mɔgɔkɔrɔw be kafo ka koow lajɛra, u be hakili senu deli Jehova fɛ. U fana be Bibulu ka sariyakolow ani Jehova ka ɔriganisasiyɔn ka cikanw lajɛ koɲuman. U b’a fɛ sɔbɛ la ka Jehova dusu diya ani k’u seko bɛɛ kɛ k’u janto a sagokɛlaw la. O cɛɛ kantigiw b’a lɔn ko u b’u ka kunkanbaaraw dafa cogo min na, Jehova bena u ɲininga o la (1 Piyɛri 5:2, 3). Miiri nin na: Duniɲa nin na, mɔgɔw kaan bɛnnin tɛ siyakow, diinankow ani politikikow kosɔn. Nka, Jehova sagokɛlaw kaan bɛnnin lo ani u be tiɲɛn Ala kelenpe lo bato ɲɔgɔn fɛ. O be sera ka kɛ sabu Jehova b’a ka ɔriganisasiyɔn dɛmɛna!

12. Ni diinan mɔgɔkɔrɔw b’a fɛ k’a lɔn ni mɔgɔ dɔ nimisanin lo tiɲɛn na, u ka ɲi k’u janto mun ni mun lo la?

¹² Jehova ye kunkanbaaraba dɔ kalifa diinan mɔgɔkɔrɔw ma. O ye ko u ka ɲi k’u janto walisa kafo saniyanin ka to. Ni kerecɛn dɔ ye jurumuba kɛ, Jehova b’a fɛ diinan mɔgɔkɔrɔw k’a filɛ n’o tigi be se ka to kafo kɔnɔ wala n’a tɛ se. Misali la, u ka ɲi k’a ɲini k’a lɔn n’o tigi nimisanin lo tiɲɛn na. O tigi be se k’a kɛ komi a nimisanin lo. Nka a ye min kɛ, yala o ka gwo a ye tiɲɛn na wa? Yala a cɛsirinin lo walisa a kana o jurumu kɛ tugun wa? Ni jɛnɲɔgɔn juguw lo y’a lasun k’o jurumu kɛ, yala a labɛnnin lo k’a ka teriya lasa n’o mɔgɔw ye wa? Diinan mɔgɔkɔrɔw be delili kɛ, ka daliluw lajɛ ani ka Bibulu sɛgɛsɛgɛ. U b’a filɛ fana jurumukɛla be min miiri a ka jurumu koo la. O kɔ le, u b’a latigɛ n’a se ka to kafo kɔnɔ. Tuma dɔw la, jurumukɛla ka ɲi ka gwɛn ka bɔ kafo kɔnɔ.—1 Kor. 5:11-13.

13. N’an teri wala an somɔgɔ dɔ gwɛnna ka bɔ kafo kɔnɔ, an ka teli k’an yɛrɛ ɲininga mun lo la?

¹³ An lanin lo diinan mɔgɔkɔrɔw la. Nka, o lanaya be se ka kɔrɔbɔ cogo di do? Ni mɔgɔ dɔ gwɛnna ka bɔ kafo kɔnɔ ani o tigi tɛ an teri sɔbɛ wala an somɔgɔ dɔ ye, a be se ka nɔgɔya an ma ka sɔn diinan mɔgɔkɔrɔw ka desizɔn ma. Nka, miiri k’a filɛ k’o tigi ye i teri sɔbɛ lo ye. O koo ɲɔgɔn na, i be se k’i yɛrɛ ɲininga ni diinan mɔgɔkɔrɔw ye daliluw bɛɛ lajɛ. Wala, ni u y’o koo ɲɛnabɔ i ko Jehova b’a fɛ cogo min na. Mun lo be se k’an dɛmɛ ka sɔn diinan mɔgɔkɔrɔw ka desizɔn ma?

14. Ni diinan mɔgɔkɔrɔw y’a latigɛ ko an teri wala an somɔgɔ dɔ ka ɲi ka gwɛn ka bɔ kafo kɔnɔ, mun lo be se k’an dɛmɛ?

¹⁴ An ka ɲi k’a to an hakili la ko ka jurumukɛla gwɛn ka bɔ kafo kɔnɔ, o ye Jehova ka labɛn dɔ lo ye. An k’a to an hakili la fana ko o be kafo nafa ani o be se ka jurumukɛla yɛrɛ nafa. Jurumukɛla min ma nimisa, n’a tora kafo kɔnɔ, a be se ka mɔgɔ wɛrɛw lasun ka jurumu kɛ (Gal. 5:9). Ka fara o kan, n’a sɔrɔ a tɛna a faamu ko ale ye jurumuba lo kɛ. A be se k’a miiri ko kuun t’a la a k’a miiricogo n’a ka kɛwalew yɛlɛma walisa k’a koo diya Jehova ye kokura (Waaj. 8:11). An ka la a la ko ni diinan mɔgɔkɔrɔw b’a latigɛra ni mɔgɔ dɔ ka ɲi ka gwɛn ka bɔ kafo kɔnɔ, u b’u ka kunkanbaara ta sɔbɛ la. U b’a faamu ko i ko kititigɛla minw tun be Israɛl jamana na galen, u ‘be kiti minw tigɛ, u t’olu tigɛ adamaden kama, Masaba kama lo.’—2 Til. Kib. 19:6, 7.

N’AN LANIN LO JEHOVA LA SISAN, AN BENA LA A LA SINI MA

15. Mun na an ka ɲi ka sɔn Jehova ka cikanw ma sisan ka tɛmɛ sanga ni wagati bɛɛ kan?

¹⁵ Duniɲa juguman nin laban tuma surunyana kosɔbɛ. O kama, an ka ɲi ka la Jehova ka kokɛcogow la sisan ka tɛmɛ sanga ni wagati bɛɛ kan. Mun na do? Sabu tɔɔrɔba wagati la, n’a sɔrɔ u bena cikan dɔw di an ma ani a be se ka kɛ an ɲɛɛ na ko u bɛnnin tɛ, u faamu man nɔgɔ wala u sira tagama ka gwɛlɛ. Tiɲɛn lo ko Jehova yɛrɛ lo tɛna kuma an fɛ walisa ka cikanw di an ma. N’a sɔrɔ a bena tɛmɛ a ka lasigidenw lo fɛ k’o kɛ. O wagati la, an man ɲi ka sigasiga wala k’an yɛrɛ ɲininga ko: “Cikan nin bɔra Jehova lo yɔrɔ tiɲɛn na wa? Wala, an ɲɛminɛbagaw yɛrɛ ka miiriya lo?” O wagati gwɛlɛw na, yala i bena la Jehova n’a ka ɔriganisasiyɔn na wa? I be Jehova ka lasigidenw ka cikanw ta cogo min na sisan, o lo bena i dɛmɛ k’a lɔn i bena min kɛ o wagati la. I be cikan minw sɔrɔ bi, n’i be sɔn u ma ani ka sin k’u labato, siga t’a la i bena o ɲɔgɔn lo kɛ tɔɔrɔba wagati la.—Luka 16:10.

16. An lanin lo Jehova ka kitikow la. Nka, o lanaya be se ka kɔrɔbɔ cogo di do?

¹⁶ Jehova bena kiti min tigɛ duniɲa juguman nin laban na, a ka ɲi an ka miiri fana koɲuman k’a filɛ an bena o koo ta cogo min na. Bi, mɔgɔ caaman tɛ Jehova sago kɛra ani u dɔw ye an somɔgɔw ye. An jigi b’a la k’o mɔgɔw bena a latigɛ ka Jehova sago kɛ sanni duniɲa nin laban ka se. Nka Arimagedɔn tuma na, Jehova lo bena tɛmɛ Yezu fɛ ka desizɔn laban ta ka ɲɛsin o mɔgɔw ma (Mat. 25:31-33; 2 Tes. 1:7-9). Anw lo tɛna a latigɛ Jehova ka ɲi ka makari mɔgɔ minw na ani a man ɲi ka makari minw na (Mat. 25:34, 41, 46). Yala an bena sɔn Jehova ka kitikow ma wala an bena a to u k’an kunnatiɲɛ? Tiɲɛn na, an ka ɲi ka banba k’an jigi la Jehova kan kosɔbɛ kabi sisan. O la, an bena an jigi bɛɛ la a kan sini ma.

17. Jehova bena kiti min tigɛ duniɲa nin laban na, o bena an nafa cogo di?

¹⁷ Miiri k’a filɛ an ninsɔn bena diya cogo min na duniɲa kura kɔnɔ, tuma min na an bena Jehova ka kitikow nafa ye. Jagokɛlaw b’u yɛrɛ nafa dɔrɔn lo ɲini ani politikimɔgɔw be mɔgɔw tɔɲɔna ani ka tɔɔrɔba lase u ma kabi wagatijan. Duniɲa kura kɔnɔ, o si tɛna kɛ yen ani ngalon diinanw fana bena tunu. Bana ni kɔrɔya bena ban ani an ka mɔgɔ kanulenw tɛna sa tugun. Sutana ni jinaw tɛna se ka kojugu si kɛ adamadenw na saan waa kelen kɔnɔ. U ka murutili nɔfɛkow bɛɛ bena ban (Yir. 20:2, 3). An ninsɔn bena diya kosɔbɛ sabu an sɔnna Jehova ka kokɛcogow ma!

18. Ka kɛɲɛ ni Nɔnburuw 11:4-6 ani 21:5 ye, an be se ka kalan jumanw lo sɔrɔ Israɛldenw ka koo la?

¹⁸ Duniɲa kura kɔnɔ, yala gwɛlɛya dɔw be se k’an ka limaniya kɔrɔbɔ Jehova ka kokɛcogow koo la wa? Misali la, a kɔrɔsi min kɛra dɔɔni Israɛldenw bɔnin kɔ jɔnya la Ezipiti. Dɔw y’a daminɛ ka ŋunuŋunu sabu u tun be jɛgɛ ni nankɔfɛn minw dumu Ezipiti, o nege tun b’u la. Ani Jehova tun be maanɛ min di u ma, u tun b’o jati dumuni goman ye (Nɔnburuw 11:4-6; 21:5 kalan). Yala an be se ka kɛ n’o miiriya ɲɔgɔn ye tɔɔrɔba tɛmɛnin kɔ wa? Walisa ka dugukolo saniya a ka kɛ alijɛnɛ ye dɔɔni dɔɔni, an t’a lɔn baara hakɛ min b’an kɔnɔna. N’a sɔrɔ an bena baara caaman kɛ ani a be se ka kɛ ko ɲɛnamaya tɛna nɔgɔya a daminɛ na. Jehova bena fɛɛn minw di an ma o wagati la, yala an bena ŋunuŋunu o koo la wa? An ka la a la ko Jehova be koo minw kɛ an ye sisan, n’an b’a waleɲuman lɔn o kosɔn, an bena a waleɲuman lɔn fana sini ma.

19. Barokun nin ka miiriya jɔnjɔnw ye jumanw ye?

¹⁹ An ka ɲi ka la a la ko Jehova ka kokɛcogow tilennin lo tuma bɛɛ. A be tɛmɛ minw fɛ k’a ka cikanw lase an ma, an ka ɲi ka la olu la fana. Jehova tɛmɛna kira Ezayi fɛ ka kuma minw fɔ, kana ɲinɛ u kɔ abada! A ko: “K’aw hakili sigi, ani k’aw jigi la ne kan, o le bena fanga d’aw ma.”—Ezayi 30:15.