An ka ɲɛtaga sɔrɔ bibulukalanw na boon donda la ani telefɔni fɛ
1 Ka bibulukalan daminɛ, o ye ninsɔndiya koo ye dɛ! Nka, ka mɔgɔ sɔrɔ min b’a fɛ ka Bibulu kalan kɛ, o ye baara daminɛ dɔrɔn lo ye. Kalan kuun ye k’a tigi dɛmɛ a ka kɛ Krista ka kalanden lakika ye (Mat. 28:19, 20). Mun lo be se k’an dɛmɛ k’o laɲinita dafa?
2 Mɔgɔ minw bolo degunnen be: Bi, mɔgɔw bolo be degunna ka taga. Yɔrɔ dɔw la, mɔgɔ bɛrɛ tɛ sɔn ka lɛri kelen kuturu bɛɛ labila kalan kama a daminɛ na. Walisa an ka se k’o mɔgɔ sifaw dɛmɛ, u tun y’an jija ko an ka bibulukalanw daminɛ ani an k’u kɛ boonw dondaw la, wala telefɔni fɛ. A daminɛ na, o kalanw be se ka kɛ ka surunya dɔɔni. An be se ka tɛmɛ dakun kelen wala fila fɛ ka baro kɛ bibulusen damanin dɔw kan gafe dɔ kɔnɔ, i n’a fɔ Qu’enseigne la Bible ? Weleweledala caaman be kalan kɛra sisan ni mɔgɔw ye boon donda la, wala telefɔni fɛ. O ka kan ni tandoli ye dɛ!
3 Ka kalan kɛ ni mɔgɔw ye u ka boon donda la, yala an ka kan ka dan o ma kudayi wa? Ayi. Hali n’an ka ɲi ka hakili sɔrɔ walisa an kana kuma kojugu kalan fɔlɔ daminɛ na, ladili* nin tun dira an ma: “Ni kalan juu sigira ka ban, ani an lamɛnbaga y’a mako don a la ka ɲɛ, an be se ka dɔ fara kalan wagati kan.” O kɔrɔtalen be kosɔbɛ. An ka ɲɛyirali dɔ ta: A daminɛ na, deen kɔngɔtɔ be se ka balo ni domuni lɔgɔma fitinin-fitininw ye fɔɔ domuni ka taga diya a daa. Nka an tɛ se k’an jigi la a kan ko a bena fanga kura sɔrɔ kosɔbɛ ka bonya ka ɲɛ n’a be balola o lɔgɔma fitininw lo la kalo o kalo wagati jan kɔnɔ. O cogo kelen na, kalanden mako b’a la ka kalan kɛ a ɲɛɛ ma, ani tuma o tuma walisa ka yiriwa ka kɛ Ala sagokɛla kɔgɔnen ye.—Heb. 5:13, 14.
4 Boon kɔnɔ bibulukalanw: A ka fisa ka kalan kɛ yɔrɔ dɔ la, min tɛ foroba yɔrɔ ye: boon dɔ kɔnɔ, wala yɔrɔ wɛrɛ la min bɛnnen be. O la, kalan bena nɔgɔya kalanden fɛ, ani o bena a dɛmɛ ka Ala ka Kuma kɔrɔ faamu (Mat. 13:23). O fana bena karamɔgɔ dɛmɛ ka kalan kɔnɔnakow makɛɲɛ cogo fisaman na ka bɛn ni kalanden makow ye. Ka fara o kan, dɔ mana fara kalan janya kan, o be kɛ sababu ye ka Ala ka Kuma sɛgɛsɛgɛ ka dunya ani ka lanaya barika bonya.—Rom. 10:17.
5 Boon donda la kalan be se ka yɛlɛma ka kɛ boon kɔnɔ cogo di? Kalan kɛnen kɔ ka surunya siɲɛ caaman na, i be se k’a ɲini dɔrɔn ka dɔ fara kalan janya kan wagati latigɛnen dɔ kɔnɔ. Walima, i be se ka kuma munumunu k’a tigi ɲininga ko: “Yala wagati be i fɛ bi an ka sigi ka baro kɛ nin koo nin kan wa?” walima “E b’a fɛ ka wagati joli kɛ bi ka baro kɛ nin koo nin kan?” N’i ye i seko kɛ ka dɛsɛ, cogo o cogo, i ka to ka kalan kɛ ka surunya boon donda la n’a tigi ye. Wagati bɛnnen wɛrɛ la, i k’a ɲini tugu ka kalan yɛlɛma k’a kɛ boon kɔnɔ.
6 An kɛtɔ ka mɔgɔ sɔbɛw ɲini, an kana ɲinɛ an ka laɲinita kɔ n’an be bibulukalanw daminɛna ani n’an b’u kɛra. An ka laɲinita ye ka mɔgɔ kɔnɔgwɛw dɛmɛ u k’u yɛrɛkun di Jehova ma, ani u ka batise ka kɛ a sagokɛlaw ye. An kɛtɔ k’an ka cidenya baara dafa n’o laɲinita ye, an b’a deli a k’an ka jijaliw kɛli duga.—2 Tim. 4:5.
* A filɛ saan 1990, mɛkalo ka An ka Masaya Cidenyabaara ɲɛɛ 8nan kɔnɔ (CD-Rom Watchtower Library)
[Study Questions]
1. Bibulu kalanw kɛtɔ, an ka laɲinita ye mun ye?
2. Bibulukalan be kɛ boon donda la, wala telefɔni fɛ cogo di? Ani, mun na barika b’a la?
3. Kalan min be kɛ boon donda la, mun na an ka kan k’an jija ka dɔ fara o wagati kan?
4. Ka bibulukalan kɛ boon kɔnɔ, nafa jumanw b’o la?
5. Boon donda la kalan be se ka yɛlɛma ka kɛ boon kɔnɔ cogo di?
6. An ka kan k’an ka cidenya baara dafa ni laɲinita juman ye? Ladili minw dira barokun nin kɔnɔ, cogo juman na u be se k’an dɛmɛ k’o kɛ?