Aw Ka Ɲiningaliw Jaabiliw
◼ Cogo juman na an ka kan k’an tɔgɔla La Tour de Garde ni Réveillez-vous ! sɔrɔ?
Kabini wagati dɔ, La Tour de Garde ni Réveillez-vous ! sɛbɛw n’u kasɛtiw abɔneman koo dabilara kaanw bɛɛ la. O kama, weleweledalaw bɛɛ ka kan k’u tɔgɔla zurunaliw ni kasɛti lamɛntaw ni CD (MP3) sɔrɔ u ka kafo bolo fɛ. Kasɛti lamɛntaw ni zurunali minw sɛbɛra fiyentɔw kama, olu koo t’a la. Olu be ci gwansan mɔgɔw ma minw mako b’a la. A’ y’a lɔn ko La Tour de Garde ni Réveillez-vous ! minw be sɔrɔ kasɛti lamɛntaw kɔnɔ wala CD kɔnɔ, kafo be se k’u komandi kɛ Demandes pour congrégation sɛbɛ (M-202) kɔnɔ. Zurunali minw sɛbɛra kaan wɛrɛ la ani minw sɛbɛri ka kunba, olu fana ka kan ka ɲini o cogo kelen na.
Aw ka kiin kɔnɔ, ni mɔgɔ dɔ b’a fɛ ka to ka zurunaliw sɔrɔ tuma o tuma, a’ ye teliya ka aw janto o la walisa a tigi kana fɔn nimɔrɔ si la. Mɔgɔ minw gwɛnna ka bɔ kafo la u be se k’u tɔgɔla zurunaliw ni gafe wɛrɛw sɔrɔ u kɛtɔ k’u ɲɛsin zurunaliw ni gafekow ɲɛnabɔbagaw ma Masaya Boon kɔnɔ. An man kan k’o mɔgɔ gwɛnnenw fara fana an ka zurunali disiraw kan.
Sosiyete ka biro bena sɔn abɔneman minw dɔrɔn na, o ye mɔgɔw ta ye minw tɛ se ka zurunaliw sɔrɔ weleweledalaw bolo fɛ. Ni mɔgɔ dɔ tɛ se ka zurunaliw sɔrɔ cogoya wɛrɛ la ani waajuliko ɲɛnabɔbagaw jɛnkulu ye abɔneman deli o tigi ye, sekeretɛri ka kan ka kunnafoni fitinin dɔ sɛbɛ ka seereya kɛ k’o jɛnkulu y’o abɔneman koo sɛgɛsɛgɛ ani a sɔnna a la.
O kɔrɔ ko weleweledalaw man kan ka lɛtɛrɛ ci Sosiyete ka biro ma k’u tɔgɔla abɔneman ɲini. Welewele-dalaw wala makodon mɔgɔw mana o ɲɔgɔnna abɔneman sɛbɛw ci Sosiyete ma, a bena u kɔsegi kafo ma.
◼ Cogo juman na kasoden be se k’a tɔgɔla zurunaliw sɔrɔ?
Kafo min be waajuliko ɲɛnabɔ kaso kɔnɔ, n’a be se ka zurunaliw lase kasodenw ma, o la, kasoden ka kan k’a tɔgɔla La Tour de Garde ni Réveillez-vous ! sɔrɔ ni weleweledalaw nana bɔ a ye. N’o tɛ se ka kɛ, kasoden yɛrɛ be se ka lɛtɛrɛ ci Sosiyete ka biro ma k’a tɔgɔla abɔneman ɲini. A’ y’a janto ko mɔgɔ minw tun gwɛnna ka bɔ kafo la, ani u ye kasodenw ye, u be se k’u tɔgɔla zurunaliw sɔrɔ o cogo kelen na i ko a ɲɛfɔra dakun ninw kɔnɔ.