Ala ka Mara cidenyabaara lakɔli b’an nafa cogo min na

¹ Nɛɛma dira Jehova sagokɛlaw ma u ka kalan Ala yɛrɛ fɛ, ani o nɛɛma ɲɔgɔn tɛ yen (Esayi 54:13; Yuh. 6:45). Nka an be nafa min sɔrɔ o kalan na, a faanba be bɔ an yɛrɛw ka jijali kɛli la. Ala ka Mara cidenyabaara lakɔli be nɔɔ nafaman min to i ka hakilimaya kan, yala i b’o kala ma wa?

² Waleɲumanlɔn kumaw: Lakɔli kɔrɔsibaga caaman y’a kɔrɔsi ko kumacogo fɛɛrɛw kalan ye dɔ fara u ka kafo ka sebagaya kan waajuli baara la. Ka fara o kan, lakɔli kɔrɔsibaga dɔ y’a ye ko komi labɛn kɛra walisa kafodenw fana ka Bibulu yɔrɔ dumanw lakali, o kɛra sababu ye mɔgɔ caaman be tugura Bibulu ka kalangwɛ labɛnsira kɔ. Ka taga cii 2nan kalan fan fɛ, balimacɛ caaman y’a fɔ ko nafa b’a la k’u hakili bɛɛ sigi ka yɔrɔ kalanta dɔrɔn labɛn n’u tɛ wagati dɔ ta ka datigɛli ni kuncɛli kumaw labɛn fana. O cii 2nan dira minw ma sisan, u b’u hakili sigi kosɔbɛ k’u ka kalan kɛcogo fisaya.—1 Tim. 4:13.

³ Bɛɛ be se ka nafa sɔrɔ a la: A be se ka kɛ ɲagaliko ye an fɛ n’an be jaabiliw di lajɛnw na (Ntal. 15:23). Komi dalafɔli segikanni ɲiningaliw be kɔn ka di an ma, o be cogoya di an ma an k’an yɛrɛw labɛn ani an k’an daa don segikanni na ni ɲagali ye. Ka fara o kan, k’a ta ni saan 2004, zanwiyekalo tile fɔlɔ ka nimɔrɔ ye, Bibulu yɔrɔ dumanw be bɔ La Tour de Garde kɔnɔ ka bɛn ni kalangwɛ kɛta ye Ala ka Mara cidenyabaara lakɔli la. O barokunw ye mɔgɔ caaman dɛmɛ u ka lakalita nafamanw kɛ Bibulu yɔrɔ dumanw lajɛtɔ.

⁴ Mɔgɔ minw bɛɛ tɔgɔ sɛbɛra lakɔli la, nɛɛma dira u ma u ka kalanw labɛn ani u k’u di. Lakɔli kɔrɔsibaga be to tintin kan ka foli minw di lakɔlidenw ma, u be se k’an bɛɛ nafa. A be ladili minw di dan na lakɔlidenw ma lajɛnw banni kɔ, o ladiliw be se k’u nafa. Lakɔlidenw be se ka dɛmɛ wɛrɛ sɔrɔ n’u be degelibaaraw kɛ minw be sɔrɔ kalansen kelen kelen laban na. O ye kalansenw ye minw ɲɛsinna kumacogo fɛɛrɛw ma gafe Tirez profit de l’École du ministère théocratique kɔnɔ.

⁵ Lajɛn kɛtɔ wala lajɛn banni kɔ, n’u ye i hakili sama ka taga hakilinata nafaman dɔw kan minw basiginen be Bibulu kan, i k’u sɛbɛ i ka gafe École du ministère kɔnɔ. I ye kalan min sɔrɔ Alakow kan, i ka miiri o kan. Ani, i k’a filɛ cogo min na o kalan b’i dɛmɛna k’i ka hakilimaya fisaya.