An k’u dɛmɛ u ka sababu wɛrɛ sɔrɔ ka seereya lamɛn

¹ Waajuli kɛtɔ, tuma caaman na an be mɔgɔ dɔw kunbɛn minw sigilen tɛ kafo ka kiinw kɔnɔ, wala u be kaan wɛrɛ fɔ i n’a fɔ tulogwɛlɛnw ka kumacogo. An fana be se ka baro diiman kɛ ni mɔgɔ dɔ wɛrɛw ye Bibulu kan, ani u be yɛlɛma kiin wɛrɛ kɔnɔ. An be se ka labɛn juman kɛ walisa o ɲɔgɔnna mɔgɔw ka sababu wɛrɛ sɔrɔ ka seereya lamɛn tugun? An ka baara kɛ ni kafolisɛbɛ (S-43) ye: Veuillez suivre l’intérêt.

² Tuma caaman na, mɔgɔw b’u tulo malɔ ka kibaro duman lamɛn n’a fɔra u ye u yɛrɛ ka kaan na (Kew. 22:1, 2). O kama, tuma caaman na, an mana mɔgɔ dɔ kunbɛn min be kaan wɛrɛ fɔ, an ka kan k’o kafolisɛbɛ dafa hali n’a tigi m’a mako don Masaya kibaro la. Nka n’o y’a sɔrɔ kaan wɛrɛ fɔbaga caaman sigilen be kiin dɔ kɔnɔ ani seereya be di u ma tuma o tuma u ka kaan na, waajibi tɛ an k’o kafolisɛbɛ dafa fɔɔ n’o mɔgɔ dɔ y’a mako don an ka baro la.

³ Kafolisɛbɛ dafacogo: An k’an jija k’a tigi tɔgɔ n’a ka ladɛrɛsi n’a ka telefɔni nimɔrɔ sɔrɔ ka sɛbɛ. An k’o kɛ nɛmɛnɛmɛ. An k’a yira baro diyara a tigi ye ka se hakɛ min ma, wagati min na a tigi be se ka sɔrɔ, an ye gafe min to a bolo, wala a ye gafe min deli, ani a be kaan min mɛn ka ɲɛ. An mana o kafolisɛbɛ dafa ka ban, an ka teliya k’a kɔsegi kafo ka sekeretɛri ma. Ale bena a lase kafo wala jɛnkulu dɔ ma, min ka kan n’a ye.

⁴ Kafolisɛbɛ lasecogo: Ni sekeretɛri m’a lɔn kafolisɛbɛ ka kan ka ci kafo wala jɛnkulu min ma, wala n’a tɛ kafow ka ladɛrɛsi lɔn, a be se ka telefɔni ci Sosiyete ka biro ma, biro min be waajulikɛyɔrɔ koow ɲɛnabɔ. O cogo la, a bena kunnafoni sɔrɔ. Kuun t’a la ka dugu kɔrɔsibaga daa don o kafolisɛbɛ koo la.

⁵ Kafo wala jɛnkulu dɔ mana kafolisɛbɛ (S-43) dafalen sɔrɔ, a ka kan ka labɛn kɛ joona joona ka taga bɔ o mɔgɔ ye. N’an b’an jija k’an seko kɛ, an be se ka la a la ko ‘min o min labɛnnin bɛ ka sɔn ɲɛnamaya banbali la’, Jehova bena u dusukun dayɛlɛ.—Kew. 13:48, KIBARO DIMAN, 1994.