An ka timinandiya waajuli kɛli la
1 Wagati gwɛlɛnw sera an kun. Jamaw be ɲagamini kɛ, siyakɛlɛw be yen, balawow ni jatigɛko wɛrɛw ka ca yɔrɔ ni yɔrɔ. Bi, ka tɛmɛ sanga ni wagati bɛɛ kan, hadamadenya mako b’a la ka kibaro dumanw mɛn. O bɛɛ n’a ta, yɔrɔ caaman na, mɔgɔw mako tɛ yen Alakow la. Yɔrɔ dɔw la, a ka gwɛlɛ ka mɔgɔw sɔrɔ u ka soo. A yɛrɛ ka gwɛlɛ ka tɛmɛ ka mɔgɔ sɔrɔ, min bena an lamɛn, wala min b’a fɛ ka Bibulu kalan kɛ. O bɛɛ n’a ta, a kɔrɔtalen be an ka timinandiya ka kibaro duman waaju ko Ala ka Masaya sigira sen kan.—Mat. 24:14.
2 Kanuya, mɔgɔw ta fan fɛ: An ka waajuli b’a yira ka gwɛ ko Jehova be mɔgɔw kanu. “A t’a fɛ mɔgɔ si ka halaki, a b’a fɛ bɛɛ ka nimisa u ka jurumuw la.” (2 Piɛre 3:9; Ezek. 33:11). O kama, i ko Yesu y’a fɔ cogo min na, Ala y’a latigɛ ko ‘wajibi lo kibaru diman ka fɔ siyaw bɛɛ ye fɔlɔ.’ (Marka 13:10, LAYIDUKURA). Ala be mɔgɔw weele u k’u ɲɛɛ yɛlɛma ka sin ale ma walisa u ka kisi kiti nata ma. O kiti bena cun Sitanɛ ka duniɲa kan ( Joɛl 2:28, 29, 32; Sofoni 2:2, 3). Jehova b’o sababu di an ma minkɛ, yala o waleɲumanlɔn tɛ an na wa?—1 Tim. 1:12, 13.
3 Duniɲa kuru bɛɛ ka waajuli baara rapɔɔri b’a yira ko saan 2004 kɔnɔ, bibulukalan 6 085 387 ɲɔgɔn tun be kɛ kalo o kalo, ani kalanden kura 5 000 ɲɔgɔn tun be batise lɔgɔkun o lɔgɔkun! O mɔgɔ batiselen kura dɔw sɔrɔla sabu weleweledalaw y’u jija ka kuma ni mɔgɔ kelen kelen bɛɛ ye u ka kiinw kɔnɔ, ani Jehova y’u ka jijali kɛli duga. O kɛra ɲagaliba sababu ye kafow kɔnɔ dɛ! Ani, ka kɛ Ala ka baarakɛɲɔgɔn ye o kisili baara la, o ye nɛɛma ye an fɛ dɛ!—1 Kɔr. 3:5, 6, 9.
4 An ka Ala tɔgɔ tando: An be timinandiya waajuli kɛli la walisa ka Jehova tando bɛɛ ɲɛɛ na, ani k’a yira bɛɛ ɲɛɛ na ko a tɔgɔ ka senu (Heb. 13:15). Sitanɛ ye “dugukolo kan mɔgɔw bɛɛ lafili” a kɛtɔ k’u lasun u k’a miiri ko see tɛ Ala ye ka hadamadenw ka kunkow ɲɛnabɔ, ko Ala mako tɛ yen u ka tɔɔrɔw la, wala ko Ala tɛ yen yɛrɛ ( Jira. 12:9). An ka waajuli kɛli sen fɛ, an be tiɲɛnko lafasa an sankolola Faa cɛɲumanba koo la. O kama, an ka to k’a tɔgɔ tando: sisan, ani fɔɔ abada.—Zab. 145:1, 2.