An ka ɲumanya kɛ mɔgɔw ye, ani an k’u sɔn

¹ Dɔrkasi “tun bɛ ko ɲuman kɛ tuma bɛɛ ka faantanw dɛmɛ.” (Kew. 9:36, 39). A ka sɔnni dusu y’a to a koo diyara a lɔnbagaw ye, ani Jehova Ala fana ye. Heburu 13:16 b’a fɔ ko: “Ka ko ɲuman kɛ, ka dɔ bɔ aw bolo fɛnw la ka o di, aw kana ɲinɛ o kɔ, katuguni o bɔɲɔgɔnko sarakaw ka di Ala ye.” Bi tilew la, cogo juman na an be se ka ɲumanya kɛ mɔgɔw ye ani k’u sɔn?

² An be se ka mɔgɔw mako ɲɛ cogo dɔ la: N’an b’u sɔn an “bolofɛnw” na (Ntal. 3:9). An be nili minw kɛ Masaya baara kama duniɲa bɛɛ kɔnɔ, o niliw b’a to Masaya Boonw ni lajɛnba boonw ni Betɛliw be lɔ, duniɲa bɛɛ kɔnɔ. An ka sɔnni kɛli b’a to mɔgɔ miliyɔn caaman be nafa sɔrɔ Ala ka kalan na ani hakilimaya jɛnɲɔgɔnya duman na.

³ An ka mɔgɔw dusu saalo: Balawow mana cun mɔgɔw kan, Jehova ka mɔgɔw labɛnnen be ka “ko ɲuman kɛ” u balima dannabaaw ye, ani mɔgɔ ye minw t’u ka diinan kɔnɔ (Gal. 6:10). Faransi jamana na, balimacɛ dɔ n’a muso sigilen tun be izini dɔ gɛrɛ fɛ. O izini cilen kɔ loon dɔ, u y’a fɔ ko: “An kerecɛn balimaw teliyara ka na an dɛmɛ o yɔrɔ nin kelen bɛɛ. U y’an ka boon ni mɔgɔ wɛrɛw taw saniya sangaso kɔnɔ. An sigiɲɔgɔnw kabakoyara kosɔbɛ k’a ye ko mɔgɔ caamanba nana an dɛmɛ.” Balimamuso wɛrɛ y’a fara a kan ko: “Diinan mɔgɔkɔrɔw y’an ladon. U nana an jagwɛlɛya. Tiɲɛn na, an mako tun be o lo la ka tɛmɛ bololafɛnw dili kan an ma.”

⁴ Ɲumanya kɛcogow ka ca an mɔgɔɲɔgɔnw ye. Nka an be se k’u dɛmɛ cogo fisaman min na, o ye ka tiɲɛn lɔnniya nafamanba tilan n’u ye. O lɔnniya faan dɔ ye “ɲɛnamaya banbali jigi” ye, Jehova yɛrɛ ye min layidu ta (Tite 1:1, 2). Mɔgɔ minw dusu kasilen be duniɲa cogoya kosɔn ani u yɛrɛw ka jurumutɔya kosɔn, Bibulu ka cira be dusu saalo di u ma (Mat. 5:4). O kama, an ka ɲumanya kɛ mɔgɔw ye ani an k’u sɔn n’o y’a sɔrɔ a see b’an ye.—Ntal. 3:27.