An ka to ka dɔ fara ɲɔgɔn barika kan
1 Ciden Pol y’a seko bɛɛ kɛ walisa ka dɔ fara a balimaw barika kan (Kew. 14:19-22). O cogo kelen na, ni gwɛlɛyaw be an balimaw kan, an b’an janto u la, ani an b’a fɛ k’u dɛmɛ. Bibulu b’a yira ko bɛɛ lo ka kan k’u mako don mɔgɔ wɛrɛw la, diinan mɔgɔkɔrɔw dɔrɔn ka koo tɛ (Rom. 15:1, 2). Ciden Pol y’a balimaw ladi ni kanuya ye ko: “Aw ka ɲɔgɔn jija ka dɔ fara ɲɔgɔn barika kan.” An k’a filɛ cogo fila minw na an be se k’o ladili sira tagama:—1 Tes. 5:11.
2 An k’a ɲini k’a faamu mɔgɔ wɛrɛw mako be min na: Ala ka Kuma b’a fɔ ko Dɔrkasi “tun bɛ ko ɲuman kɛ tuma bɛɛ ka faantanw dɛmɛ.” (Kew. 9:36, 39). Minw mako tun be fɛɛn dɔ la, a y’u kɔrɔsi ani a y’a seko kɛ k’u dɛmɛ. Tiɲɛn na, a ye ɲɛyirali ɲuman to an ye dɛ! I be se ka bɔ a kala ma ko mɔgɔkɔrɔba dɔ mako be dɛmɛ la walisa ka taga lajɛn na. Wala, n’a sɔrɔ piyɔniye dɔ ma mɔgɔ si sɔrɔ min b’a bila sira waajuli la wula fɛ lɔgɔkun kɔnɔ. N’i bɔra o koo ɲɔgɔn kala ma, ani i y’a tigi dɛmɛ, i ka miiri k’a filɛ cogo min na o bena a tigi jagwɛlɛya.
3 Baro minw basiginen be Alakow kan: An be se ka dɔ fara mɔgɔ wɛrɛw ka barika kan an ka kuma fana fɛ (Efes. 4:29). Diinan mɔgɔkɔrɔ kolɔnbaga dɔ y’a fɔ ko: “N’i b’a fɛ ka mɔgɔw jagwɛlɛya, i k’a kuma Alakow kan. N’i b’a fɛ k’o ɲɔgɔnna baro daminɛ, i be se ka ɲiningali kɛ dɔrɔn ko ‘Ile ye tiɲɛn sira lɔn cogo juman na?’” An k’an mako don denmisɛnw na ni kɔnɔgwɛ ye kafo kɔnɔ. Farifaga ye minw sɔrɔ, wala minw masumalen be, an k’an mako don u la (Ntal. 12:25). N’an be n’an balimaw ye, an kana a to duniɲa ka ɲɛnagwɛkow ka kɛ an ka barokun ye fɔɔ an be ɲinɛ ka baro kɛ Alakow kan.—Rom. 1:11, 12.
4 Nka, an be se ka mun lo fɔ walisa ka dɔ fara mɔgɔw ka barika kan? I ka kelenna kalan kɛtɔ kɔsa la, yala i ye Bibulu ka miiriya dɔ sɔrɔ min ye dɔ fara i ka waleɲumanlɔn kan Jehova fan fɛ wa? Yala foroba kalan wala La Tour de Garde kalan ka miiriya dɔ y’i jagwɛlɛya wa? Wala, yala i ka lanaya ye barika sɔrɔ wale ɲuman dɔ sababu fɛ wa? N’o ɲɔgɔnna walew wala miiriyaw nafa ka boon i ɲɛɛ kɔrɔ, i bena jagwɛlɛya kumaw fɔta sɔrɔ tuma bɛɛ.—Ntal. 2:1; Luka 6:45.
5 An ka to ka dɔ fara ɲɔgɔn barika kan an kɛtɔ k’an yɛrɛ labila ka dɛmɛ kɛ, ani, an kɛtɔ ka kuma ni hakilitigiya ye.—Ntal. 12:18.