An ka tugu Krista kɔ ni danbe ye
1. Ka koow kɛ ni danbe ye, cogo juman na ɲinan ka tila saba lajɛnba kalankun bɛnnen b’o ma?
1 Bibulu be duniɲa kuru bɛɛ Masaba Jehova kofɔ i ko mɔgɔ min masirilen be ni danbe ye (Zab. 104:1). Tuma bɛɛ, Yesu kumacogo ni a ka koow kɛcogo y’a yira ko a tun b’a Faa ni Ala ka labɛnw bonya (Yuh. 17:4). An kelen-kelen bɛɛ bena sababuw sɔrɔ ka Yesu ladegi ani ka nɔɔrɔ la Jehova kan an ka tile saba lajɛnba la. A kuun ko: “An ka tugu Krista kɔ!”
2 Batoli min be ni danbe ye: An be se ka bonya la Jehova kan an kɛtɔ ka labɛn kɛ ka na hakilimaya domuniba la min labɛnna an ye. Yala i kumana i ka patɔrɔn fɛ wa? Ani yala i ye i ka koow labɛn walisa ka na o lajɛnba loon saba bɛɛ la, hali juman loon fana wa? Yala i ye labɛn kɛ walisa ka na joona, ka sigiyɔrɔ ɲini, ani k’i kaan fara dadon dɔnkili ni delili la wa? I bena tilera fana min domu lajɛnba kɛyɔrɔ la n’i balimaw ye, yala i kɔnna ka miiri o la wa? Kalan kelen-kelen bɛɛ daminɛ na, kalankɛla ɲɛbila b’an weele ni dusudiya ye ka sigiyɔrɔ yaala sanni dadon fɔlikan ka daminɛ. An ka kan k’an ka barow dabila joona-joona ani k’an sigi sanni kalan ka daminɛ.
3 An kɛtɔ k’an ɲɛmalɔ ka kalan lamɛn o fana be bonya la an sankolola Faa kan. Zurunali sɛbɛbaga dɔ y’a sɛbɛ lajɛnba dɔ koo la ko kɔrɔsili kɛbagaw tun bena kabakoya “lajɛnba kɛbagaw ka koow kɛcogo ɲuman fɛ. U be u makun ka lamɛnni kɛ ni bonya ye k’a yira ko Alakow ka di u ye.” A fana y’a fɔ ko “denmisɛn caamanba tun be yen. . . , minw bɛɛ y’u yɛrɛw minɛ ka ɲɛ. O min ɲɔgɔn ye man di. U ɲɛɛ gwannen tun lo ka vɛrisew ɲini Bibulu Senuman kɔnɔ.” Kalan kɛ tuma na a bɛnnen tɛ ka baro gwansan kɛ, ka SMS ci, ka fɛɛn dɔ domu wala ka yaala-yaala gwansan. Denmisɛnw ka kan ka sigi u bangebagaw gɛrɛfɛ, walisa u ka se k’u dɛmɛ ka nafa sɔrɔ kalan na (Dut. 31:12; Ntal. 29:15). O jijali ɲɔgɔn b’a yira ko an be mɔgɔw bonya ani ko an be Jehova waleɲuman lɔn a ka hakilimaya domuni nafamanba kosɔn.
4 Sawura bɛnnen: Mɔgɔ caaman y’u ka waleɲumanlɔn yira hakilijigi koo la, min sɔrɔla salon tile saba lajɛnba ka kalan nin kɔnɔ: “A’ ye kerecɛnya danbe yira tuma bɛɛ.” O kalan tun y’a yira ka gwɛ ko Ala sagokɛlaw ka kan k’u jija ka kerecɛnya danbe yira u ka fani doncogo n’u ka kuun masiricogo fɛ. Ɲinan an ka kan k’an janto o koo la tugun kosɔbɛ. An ka sawura b’an ka dusukunnataw yira Jehova fan fɛ ani nɛɛma min dira an ma ka kɛ a Seerew ye. An ka kan ka fani don tuma bɛɛ i ko “minnu ko u bɛ siran Ala ɲɛ.”—1 Tim. 2:9, 10.
5 Yala an ka sawura ka kan ka kɛ ni danbe ye kalan wagati dama lo la wa? An k’a to an hakili la ko lajɛnba be kɛra dugu min na, mɔgɔ caaman bena an ka lajɛnba tagamasiɲɛw kɔrɔsi an kan. An ka sawura ka kan k’an kɛ daan na ni mɔgɔ tɔɔw ye. O kama, hali lafiɲɛ wagati la, n’an ka kan ka taga domuni kɛ dugu kɔnɔ an ka fani ka kan ka bɛn cidenw ta ma minw nana lajɛnba la. O la, an man kan ka jeans (jini), kilɔti, wala Tee-shirt (tiriko) don. O bena kɛ seereya ɲuman ye an sigida la dɛ! N’an ka sawura b’a yira ko an ye Ala ka cidenw ye, o be Jehova dusudiya dɛ!
6 Tɔnɔ ɲuman minw b’a la: An kɛtɔ ka kerecɛnya danbe yira, o be cogoya di an ma ka seereya kɛ sababu dɔw seen fɛ ani o be nɔɔ ɲuman to an filɛbagaw kan. Lajɛnba dɔ banni kɔ, kuntigi dɔ y’a fɔ ko: “An ma deli ka nin jama ɲɔgɔn ye. U ɲɛmalɔnen lo koɲuman. Aw be Ala sago dafa.” An kɛtɔ ka koow kɛ ni danbe ye, o b’a yira ko bonya ni kanuya b’an ni ɲɔgɔn cɛ ani o be nɔɔrɔ la Jehova kan (1 Piɛrɛ 2:12). O b’a yira fana k’an be siran Ala ɲɛ ani k’an be Ala waleɲuman lɔn sabu nɛɛma lo ka kalan an sankolola Faa fɛ (Heb. 12:28). Ɲinan ka tile saba lajɛnba kuun ko: “An ka tugu Krista kɔ!” K’an to a kɔnɔni na, an k’an jija ka koow kɛ ni danbe ye.
2. K’an yɛrɛ labɛn ka kɛ kalan kelen-kelen bɛɛ la, cogo juman na o be bonya la Jehova kan?
3. N’an b’an ɲɛmalɔ ka kalan lamɛn, o be danbe la an ka batoli kan cogo di?
4. Mun na an ka kan ka kɛ ni sawura bɛnnen ye lajɛnba la?
5. Lajɛnba be kɛra dugu min kɔnɔ, an be se ka to ni fani doncogo bɛnnen ye cogo di lafiɲɛ wagati la?
6. Ka kerecɛnya danbe yira, tɔnɔ nafaman jumanw b’o la ?
[Box on page 4]
Tile saba lajɛnba hakilijigi koow
◼ Kalan kɛlɛriw: Loon saba bɛɛ la, kalan bena daminɛ 9H20. Boon daaw bena yɛlɛ 8H00. Ni Masaya dɔnkili daminɛna, an bɛɛ ka kan k’an sigi walisa kalan ka se ka daminɛ cogo bɛnnen na. Juman ani Samedi loonw, kalan bena ban 5H05. Ani dimansi, a bena kuncɛ 4H10.
◼ Bolifɛnw bilayɔrɔ: Lajɛnbaw kɛyɔrɔ minw bɛɛ la u be mɔgɔw ka bolifɛnw mara k’u tanga, wari tɛna minɛ. Bolifɛn bilayɔrɔ bena di mɔgɔw ma ka kɛɲɛ n’u na wagati ye. Lajɛnba tagamasiɲɛw lo bena kɛ sababu ye ka donyɔrɔ sɔrɔ yen. Komi bolifɛnw bilayɔrɔ man boon kojugu, a ka fisa aw ka jɛn ni dɔw ye ka bolifɛn kelen ta sanni mɔgɔw ka na kelen-kelen wala fila-fila, bɛɛ n’u ka mobili. Balima minw be bolifɛnw kɔrɔsira a’ ye lamɛnni kɛ u fɛ kosɔbɛ. O bena aw tanga kasara dɔw ma.
◼ Sigiyɔrɔ marali: Aw be bolifɛn kelen ta ni mɔgɔ minw ye, wala aw be soo kelen kɔnɔ ni minw ye, aw be se ka sigiyɔrɔw mara olu dɔrɔn lo ye.
◼ Tilera domuni: A’ ye na ni tilera domuni ye aw bolo sanni aw ka bɔ ka taga a yaala kɛnɛma kalan banni kɔ midi. Aw be se ka aw ka domuni mara minan fitinin dɔ kɔnɔ sigilan jukɔrɔ. Minanba minw kɛra mɔgɔ caaman ka domuni mara fɛɛn ye, butelifɛnw ani dɔlɔ ma daga lajɛnba yɔrɔ la.
◼ Niliw: Tile saba lajɛnba baara be na ni musaka caaman ye. An be se k’an ka waleɲumanlɔn yira an kɛtɔ ka nili kɛ duniɲa kuru bɛɛ baara kama. An be se k’o nili kɛ Masaya Boon kɔnɔ wala lajɛnba la. Minw be tɛmɛ sɛkiw fɛ ka nili kɛ lajɛnba la, u ka kan k’o sɛkiw kɛ jamana ka tɔnbolo tɔgɔ la. Ɲɛyirali fɛ, Burkina Faso, sɛkiw ka kan ka kɛ “Association Les Témoins de Jéhovah du Burkina Faso” tɔgɔ la. Ni aw be kunnafoni wɛrɛw fɛ o koo la, a’ ye ɲɛsin lajɛnba ɲɛmɔgɔw ma.
◼ Kasaraw ni bana koow: Ni kɛnɛyako dɔ barila ka aw sɔrɔ lajɛnba yɔrɔ la, aw ka ɲɛsin mɔgɔ kunbɛnbagaw ma. U bena sin k’a fɔ kasaraw ni banakow ɲɛnabɔbagaw ye. Olu bena a filɛ ni aw ka dimi ka jugu ani u bena aw dɛmɛ. Bana be mɔgɔ minw na ka kɔrɔ, u man kan ka ɲinɛ u ka furaw kɔ n’u be na lajɛnba la.
◼ Kamera ni maɲetow: U sifa si man kan ka don lajɛnba boon ka kuranjuru dɔ la wala sono juru dɔ la. Ani, u man kan ka mɔgɔ wɛrɛw degun cogo si la.
◼ Parifɛnw: Lajɛnba dɔw be kɛ boonw kɔnɔ yɔrɔ minw na waajibi lo vantilatɛriw ka mɔgɔw fifa. O kama, an ka kan ka ɲumanya kɛ tɔɔw ye, an kɛtɔ ka latikɔlɔ ni parifɛn farimanw koo dama kɛɲɛ walisa an kana gwɛlɛya dɔ lase mɔgɔw ma nɛnɛkiri bana wala a ɲɔgɔnna bana be minw na.—1 Kɔr. 10:24.
◼ Makodon mɔgɔw dɛmɛcogo: Lajɛnba tuma na, ni mɔgɔ dɔw sɔnna seereya ma koo dɔ sababu fɛ, an ka kan ka sɛbɛ Veuillez suivre l’intérêt (S-43) dafa ka kunnafoniw di o tigiw kan. Weleweledalaw ka kan ka na n’o sɛbɛ kelen wala fila ye u kun lajɛnba la. O sɛbɛw labilanen bena sɔrɔ fana lajɛnba ka gafew ta yɔrɔ la. Aw mana o sɛbɛ dɔ dafa, a’ y’a di gafew ta yɔrɔ la walisa olu k’a ɲɛnabɔ. Wala, a’ y’a di kafo ka sekeretɛri ma ni aw segira ka na aw ka kafo kɔnɔ.—A filɛ km 2/05 ɲɛɛ 6nan.
◼ Telefɔni selilɛriw ni bipɛriw: U ka kan ka labɛn walisa u kana mɔgɔw bali k’u hakili sigi kalan kan.
◼ Fotow: Ni aw be fotow ta, aw man kan ka fototalan yeelen mana kalan kɛtuma na.
◼ Lotɛliw: (1) Aw mako bena kɛ sibon hakɛ min na, a’ y’a ɲini u k’o dɔrɔn lo mara aw ye. Mɔgɔ daa min ka kan ka la boon kelen kɔnɔ, aw kana o dama tɛmɛ. (2) Boon min marala aw ye, ni aw ka kan k’o lasa, a’ y’o fɔ lotɛli tigi ye joona. (3) Aw kana doni-ta-wotoro ta fɔɔ ni aw makoya sera a ma. Ani, a’ y’a segin a nɔɔ na joona walisa mɔgɔ wɛrɛ k’a mako ɲɛ n’a ye. (4) Ni sira ma di aw ma, aw kana tobili kɛ sibon kɔnɔ. (5) Ni a see be aw ye, a’ ye wari dɔɔni di kado la soo kɔnɔ baaraden ma loon o loon. (6) Lotɛli be domunifɛn dɔw di a ka lonanw ma u k’u domu lotɛli la, i n’a fɔ darakan, kafe ani galasi. Komi an ye kerecɛnw ye, an kɔni tɛna u fɛɛnw ta k’a dama tɛmɛ. (7) Aw ka lotɛli baarakɛlaw minɛ ka kɛɲɛ ni hakili senu deen cogoya ye tuma bɛɛ. (8) Sibon sɔngɔ minw kofɔra aw ye, o ye suu kelen ta ye, lanpo ma fara a kan. Ni u be wari wɛrɛ ɲini aw fɛ koo dɔ la aw ma min ɲini, aw kana o sara. A’ ye lajɛnba ka sibon koo ɲɛnabɔlaw jɛnkulu ladonniya o koo la joona. (9) Ni aw ye gwɛlɛya dɔ sɔrɔ aw ka sibon koo la lotɛli kɔnɔ, aw kana ɲinɛ k’a ɲɛfɔ sibon koo ɲɛnabɔlaw jɛnkulu ye lajɛnba yɔrɔ la.
◼ Siyɔrɔ wɛrɛw: Ni aw ye sibon sɔrɔ yɔrɔ o yɔrɔ, aw ka koow kɛ ni ɲumanya, ni kanuya ye, ani aw ka aw janto mɔgɔw la. Ni mɔgɔ dɔ lo ye jatigiya di aw ma a ka soo, a’ ye aw seko kɛ k’a tigi dɛmɛ ka soo kɔnɔ baaraw kɛ ani ka musakaw sara. Loon min na aw bena taga, a’ ye aw janto k’a filɛ ni aw sibon saniyalen be ani a ladonnen be.