An ka baara ɲuman kɛ n’an ka zurunaliw ye

1. Mun lo y’a to La Tour de Garde ni Réveillez-vous ! be u kalanbaga caaman dusukun sɔrɔ?

¹ Mɔgɔw be se ka zurunali nafa-manba minw kalan bi, o ye La Tour de Garde ni Réveillez-vous ! ye. Mun na do? Sabu tiɲɛn kalan min be sɔrɔ u kɔnɔ Alako ta fan fɛ, o be se ka nɔɔ ɲuman to mɔgɔw ka ɲɛnamaya kan fɔɔ abada. Cogo juman na an be se ka baara kɛ n’u ye cogo fisaman na?

2. Mun na an man kan ka zurunaliw tiɲɛ?

² An kana u tiɲɛ: An be zurunali minw sɔrɔ kalo o kalo, yala u be cayara kojugu an fɛ soo wa? O be se ka kɛ ni an be zurunali hakɛ min deli, o ka ca ka tɛmɛ an makoya be min na tigitigi. N’an b’a to zurunaliw be caya an bolo kojugu ani an tɛ baara kɛ ka ye n’u ye, o b’a yira ko an tɛ ni waleɲumanlɔn ye o sɛbɛ nafamanw koo la. Tiɲɛn kalan min be sɔrɔ zurunali kelen-kelen bɛɛ kɔnɔ, a be se ka Alako nege don mɔgɔ la ani k’o wasa. An be se ka mun lo kɛ walisa an kana u tiɲɛ?—Yuh. 6:11-13.

3. Ni zurunali kɔrɔmanw cayara kojugu an bolo, an be se ka mun lo kɛ?

³ An ka baara ɲuman kɛ ni zurunali kɔrɔmanw ye: An k’an hakili to a la ko La Tour de Garde ni Réveillez-vous ! basiginen be Bibulu lo kan. Kibaruya min be u kɔnɔ, dɔ tɛ bɔ a nafa la hali ni u sɛbɛwagati tɛmɛna (Es. 40:8). O kama, an man kan ka sigasiga ka kɔrɔmanw yira mɔgɔw la n’u ɲɛɛ ka ɲi. E yɛrɛ be se ka mun lo kɛ ni zurunaliw be cayara kojugu i bolo? I k’o fɔ waajulibaara kɔrɔsibaga ye walisa a ka labɛn kɛ janko piyɔniyew ni weleweledala wɛrɛw ka baara kɛ n’u ye. Weleweledalaw be se ka baara kɛ fana ni zurunali kɔrɔmanw ye n’u be taga waajuli kɛ dugu dɔw kɔnɔ minw ma di kafo si ma.

4. Gwatigi kelen-kelen ka kan ka mun lo kɛ walisa k’a ka somɔgɔw bɛɛ dɛmɛ u ka baara ɲuman kɛ n’an ka zurunaliw ye?

⁴ I k’a ɲini k’a lɔn i ka denbaya mako be zurunali hakɛ min na: Zurunaliw ka teli ka caya kojugu an fɛ sabu an be minw deli o ka ca ka tɛmɛ an ka makoya tigitigi kan. I mako be zurunali hakɛ tigitigi min na, i be se k’o lɔn cogo di? Gwatigi kelen-kelen ka somɔgɔ minw be se kalan na, a ka kan k’u bɛɛ tɔgɔ ta ani ka jatiminɛ kɛ k’a filɛ bɛɛ kelen-kelen bena baara kɛ ni zurunali hakɛ tigitigi min ye. Bɛɛ ka kan ka La Tour de Garde ni Réveillez-vous ! kelen sɔrɔ a ka kelenna kalan ni lajɛnw kama. O kɔ, bɛɛ kelen-kelen ka kan k’a jati k’a filɛ a makoya bena kɛ zurunali hakɛ min na waajuli kama. Gwatigi ka kan k’a filɛ bɛɛ kelen-kelen sera ka zurunali hakɛ min to mɔgɔw ye wagati tɛmɛnen dɔ kɔnɔ. O cogo la, i be se k’a ye ko i ka denbaya be zurunali hakɛ min deli, dɔ ka kan ka bɔ o la walisa k’a dama kɛɲɛ.

5. An be se k’an ka waleɲumanlɔn yira cogo di an ka zurunaliw koo la?

⁵ An ka zurunaliw kuun ye min ye, an b’a fɛ u ka se k’o dafa: o kuun ye ka mɔgɔ kɔnɔgwɛw dɛmɛ u ka Jehova ka sagonata ɲumanw lɔn ka ɲɛ. Kibaruya min be an ka gafew kɔnɔ, o be se ka mɔgɔ niin kisi. Nka, a tɛ se ka mɔgɔ kɔnɔgwɛw dusukun sɔrɔ n’an b’o gafew to an ka etazɛriw kan wala an ka sakɔsiw kɔnɔ. O kama, n’an be gafew ta waajuli kama, an kana u ta k’a dama tɛmɛ, ani an ka baara ɲuman kɛ n’u ye ka mɔgɔw nafa.—Fil. 4:5.