Yɔrɔ 11nan: An ka bibulukalanw kɛ minw be ɲɛtaga sɔrɔ

An ka kalandenw dɛmɛ ka viziti kuraw kɛ

¹ Kalanden mana waajulibaara daminɛ, a bena mɔgɔw kunbɛn minw b’u mako don kibaro duman koo la. Cogo juman na an be se ka weleweledala kura dɛmɛ ka viziti kuraw kɛ bɛrɛbɛrɛ, ani ka makodon mɔgɔw dɛmɛ?

² Viziti kura labɛn be daminɛ ɲɔgɔnye fɔlɔ la n’an lamɛnbaga ye. An ka kalanden jagwɛlɛya a k’a mako don a lamɛnbagaw la ni kɔnɔgwɛ ye (Filip. 2:4). Dɔɔni dɔɔni, an k’a yira a la cogo min na a be se k’a ɲini a lamɛnbagaw fɛ u k’u ka fɛtaw fɔ a ye. An k’a dege mɔgɔw lamɛncogo la, ani cogo min na a be se ka mɔgɔw ka ɲɛnakow kɔrɔsi. Mɔgɔ dɔ mana a mako don baro la, an k’a ɲini weleweledala kura fɛ a ka kunnafoni jɔnjɔnw sɛbɛ o tigi koo la. An ka baara kɛ n’o kunnafoniw ye walisa k’a dɛmɛ ka baro nata labɛn.

³ An k’an yɛrɛw labɛn ka segi ka na: An ka segi baro tɛmɛnen kan. Ani, an k’a yira kalanden na cogo min na a be se ka Masaya cira faan dɔ sugandi min bena diya a lamɛnbaga ye (1 Kɔr. 9:19-23). An ka yiracogo surun dɔ labɛn ɲɔgɔn fɛ, min basiginen be bibulusen kelen kan ani gafe kalanta ka dakun dɔ kan. Ka fara o kan, an ka ɲiningali dɔ labɛn, an bena min lawili baro laban na walisa ka viziti nata jusigi. An k’a yira kalanden la cogo min na a be se ka dɔ fara a lamɛnbaga ka lɔnniya kan Ala ka Kuma koo la viziti kura kelen kelen kɛtɔ.

⁴ Nafa b’a la fana ka viziti kura baro ladoncogo nɔgɔman yira kalanden na. A mana a tigi fo, a be se k’a fɔ ko: “An ka baro tɛmɛnen diyara ne ye. Ne segira ka na kunnafoni wɛrɛ tilan n’i ye Bibulu koo nin kan [an k’o barokun kofɔ].” An fana be se k’a yira o weleweledala kura la a ka ɲi ka min fɔ ni mɔgɔ wɛrɛ lo bɔra k’a kunbɛn daa la.

⁵ An ka teliya ka segi ka na makodon mɔgɔw dɛmɛ: An ka kalanden jagwɛlɛya a ka to ka a segi ka na bɔ makodon mɔgɔw bɛɛ ye joona joona. N’an b’a fɛ ka mɔgɔw sɔrɔ, fɔɔ an ka timinandiya ka segi ka na bɔ u ye. An ka kalanden kalan cogo min na a be se ka labɛn kɛ ni mɔgɔw ye walisa ka segi ka na bɔ u ye. Ani, an k’a dɛmɛ a k’a faamu ko a ka kan ka segi ka na i ko a y’a fɔ cogo min na (Mat. 5:37). Weleweledala kura kɛtɔ ka saga bisigilamanw ɲini ani k’u dɛmɛ, an k’a dege a ka teriya kɛ n’u ye, a k’a janto u la, ani a k’u bonya.—Tite 3:2.