Yɔrɔ 10nan: An ka bibulukalanw kɛ minw be ɲɛtaga sɔrɔ
An ka kalandenw degi waajuli kɛli la soo ni soo
1 Diinan mɔgɔkɔrɔw mana a latigɛ ko kalanden ka koow dafara ka kɛ weleweledala ye, min ma batise fɔlɔ, o kalanden be se ka jɛn ni kafo ye ka waajuli daminɛ bɛɛ ɲɛɛ na (A filɛ gafe Organisés pour faire la volonté de Jéhovah kɔnɔ, a ɲɛɛw 79-81.) Cogo juman na an be se k’a dɛmɛ a ka se ka waajuli kɛ soo ni soo?
2 An k’an labɛn ɲɔgɔnw fɛ: Foyi tɛ labɛn ɲuman lasa. An k’a yira kalanden na yɔrɔ min na a be se ka gafew yiracogow sɔrɔ An ka Masaya Cidenyabaara kɔnɔ ani gafe Comment raisonner kɔnɔ. Ani an k’a dɛmɛ ka yiracogo nɔgɔman dɔ sugandi min bena sanga sɔrɔ kiin kɔnɔ. Kabini a daminɛ na, an k’a jagwɛlɛya a ka baara kɛ ni Bibulu ye waajuli la.—2 Tim. 4:2.
3 Gafew yiracogo degeli be weleweledala kura nafa kosɔbɛ. Mɔgɔw delila ka sɔsɔli dɔw lawili an kama kiinw kɔnɔ. Kalanden kɛtɔ ka yiracogo degi, an k’a yira a la cogo min na a be se k’o sɔsɔliw jaabi nɛmɛnɛmɛ (Kolos. 4:6). An k’a hakili sigi ko waajibi tɛ kerecɛn ciden ka mɔgɔw ka ɲiningaliw bɛɛ jaabili lɔn. N’an tɛ ɲiningali dɔ ka jaabili lɔn, tuma caaman na, a ka fisa an k’a fɔ a tigi ye ko an bena taga sɛgɛsɛgɛri kɛ, ani an bena segi ka na baro kɛ o kan kɔfɛ.—Ntal. 15:28.
4 An ka waajuli kɛ ɲɔgɔn fɛ: Kalanden siɲɛ fɔlɔ mana bɔ waajuli kama soo ni soo, i k’a to a k’a filɛ ile be gafe yiracogo kɛ cogo min na: aw fila ye yiracogo min degi ɲɔgɔn fɛ. O kɔ, i k’a ɲini a fɛ a k’a kɛ k’a filɛ. Tuma dɔw la, a ka fisa weleweledala kura ka yiracogo faan dɔ dɔrɔn kɛ, i n’a fɔ ka vɛrise dɔ kalan ani k’a ɲɛfɔ. An k’an janto kalanden jogo n’a ka setigiya la (Filip. 4:5). An kɛtɔ k’a dege dɔɔni dɔɔni waajuli faan sifaw kɛcogo la, an k’an daa diya k’a fo.
5 A kɔrɔtalen be an ka weleweledala kura dɛmɛ ka labɛnsira kɛ waajuli kama walisa a k’a seen don o baara la tuma o tuma. N’a be se, a k’a kɛ lɔgɔkun o lɔgɔkun (Filip. 3:16). An ka labɛn tigitigi kɛ walisa ka waajuli kɛ ɲɔgɔn fɛ n’a ye. An k’a jagwɛlɛya a ka waajuli kɛ fana ni weleweledala kisɛman wɛrɛw ye. U ka ɲɛyirali n’u ka jɛnɲɔgɔnya bena a dɛmɛ ka setigiya sɔrɔ ani ka ɲagali waajuli baara la soo ni soo.