Tile fila lajɛnba nata ka kalan

Nin duniɲa tolinen laban loonw na, a kɔrɔtalen be an k’an hakilimaya faniw mara, ani an k’an kerecɛnya jogo tanga (Jira. 16:15). O de y’a to tile fila lajɛnba min bena kɛ waajulibaara saan 2006 kɔnɔ, a kalankun bɛnnen be: “A’ ye jogo kura don aw yɛrɛw la.”—Kolos. 3:10.

Loon fɔlɔ: Kalankulu fɔlɔ kuun ko: “An ka jogo kura ɲɛɛw yira.” A bena a yira cogo min na jogo kura degeli b’an nafa an ka ɲɛnamaya faan bɛɛ la. O jogo kura be degi cogo di? Tile fɔlɔ ka kalan laban fila bena o yira an na. O kalanw kuunw ko: “An k’an yɛrɛ kolo walisa an ka se ka miirili kɛ cogo ɲuman na”, ani “Kalan, min b’an jogo kura kolo.”

Loon filanan: Kalankulu filanan kuun ko: “An ka mɔgɔ hakilitigi ka kumacogo ladegi.” A bena a yira cogo min na jogo kura b’an ka kumacogo yɛlɛma. “Yala i be see sɔrɔla Sitanɛ kan wa?” O lo ye forobakalan kuun ye. A bena a yira ko an ka kan k’an yɛrɛ kɔrɔsi Sitanɛ ka nanbaraw ma. Lajɛnba ka kalan laban fila bena kɛ: “An k’an yɛrɛ tanga duniɲa ka nɔgɔlenya koow bɛɛ ma”, ani, “An k’an jogo yɛlɛma ka kɛ kura ye loon o loon.” U bena an dɛmɛ an ka ban kɛcogow ni tagamacogow la minw be Ala ka sira tilennen kɛlɛ. U fana bena an dɛmɛ an ka sabati Jehova batoli la.

Tiɲɛn na, an kɔrɔtɔlen be k’o kalan sɔrɔ, min b’an jija ka jogo kura don an yɛrɛ la, ani k’a mara.