Labɛn, kerecɛn cidenw kosɔn
1. Saan 1938 la, labɛn kura juman sigira sen kan, ani a tun latigɛra mun lo kama?
1 Saan 1938 la, Jehova ka ɔriganisasiyɔn ye labɛn kura dɔ sigi sen kan. Kafokuluw tun weelela ka na lajɛnba dɔw la minw tun be weele ko assemblées de zone (mara ka lajɛnbaw). Bi, u be weele ko tile fila lajɛnbaw. U tun latigɛra mun lo kama? Saan 1939, zanwiyekalo ka Informateur (min be weele bi ko An ka Masaya Cidenyabaara) b’a fɔ ko: “O lajɛnbaw ye Jehova ka ɔriganisasiyɔn labɛn dɔ ye min b’an dɛmɛ ka Masaya baara kɛ. Baara min kalifara an ma, o lajɛnbaw kalan b’an kelen-kelen bɛɛ dɛmɛ kosɔbɛ k’o dafa bɛrɛbɛrɛ.” Saan 1938 la, Masaya weleweledalaw tun ye mɔgɔ 58 000 dɔrɔn ye. Nka saan 2009 kɔnɔ, u tun ka ca ni mɔgɔ 7 000 000 ye. U hakɛ cayara cogo min na, o b’a yira ka gwɛ ko tile fila lajɛnbaw latigɛra min kama, o be dafara: O ye ka weleweledalaw dɛmɛ k’u ka cidenya baara dafa.
2. Kalan minw bena di tile fila lajɛnba nata la, u dɔw barokun ye juman ye?
2 Saan kura ka lajɛnba barokun: Tile fila lajɛnbaw bena daminɛ sɛtanburukalo la. An kɔrɔtɔnen lo k’o kalan sɔrɔ sabu a bena an jija. A barokun ko “Aw tɛ diɲɛ taw ye” ka kɛɲɛ ni Yuhana 15:19 ye. Siga t’a la, kalanw bena kerecɛn cidenw dɛmɛ. U dɔw ye jumanw ye? Samedi loon, an bena kalan nin lamɛn “Kudayi cidenya baara b’an tanga koo ma: cogo juman na do?” An fana bena kalankulu dɔ lamɛn min barokun ko “An kana a to fɛɛn nunu ka nɔɔ to an kan:” Fɔlɔ “Wara,” filanan “Jatɔmusoba,” sabanan “Dugukolo kan jagokɛlaw.” Dimansi loon, an bena kalankulu dɔ wɛrɛ lamɛn min kuun ko “Aw ka Jehova kanu, aw kana duniɲa kanu.” Kalan wɛrɛw kuun ko “Aw ka to ka kɛ ‘dunanw ni siginfɛw’ ye” ani “A’ ye aw jaa gwɛlɛya! Aw be se ka see sɔrɔ duniɲa kan.”
3. N’an nana tile fila lajɛnba la, an be se ka nafa jumanw sɔrɔ o la?
3 Balimamuso dɔ tun sumana waajuli baara la. Nka tile fila lajɛnba dɔ kɛnen kɔ, a y’a sɛbɛ ko lajɛnba kalan y’ale lasun ka segi ka jatiminɛ kɛ a ka koow cogoya la, k’a cɛsiri “waajuli baara la ani k’a dabila ka joo di a yɛrɛ ma ko see t’a ye ka caaman kɛ waajuli la.” Siga t’a la, waajuli baara saan nata ka tile fila lajɛnba bena an kelen-kelen bɛɛ dɛmɛ an ka Jehova kanu sanni ka duniɲa kanu (1 Yuh. 2:15-17). I ka koow bɛɛ kɛ ka kɛ yen, ka lamɛnni kɛ koɲuman walisa ka nafa bɛrɛbɛrɛ sɔrɔ a la sabu o ye labɛn ɲuman ye min kɛra kerecɛn cidenw kosɔn.