Tile fila lajɛnba ka kalan kura

Nin “waati gɛlɛnw” na, an mako be Jehova ka hakilitigiya la walisa k’a diyanye sɔrɔ ani k’a mara (2 Tim. 3:1). Waajulibaara saan 2005 kɔnɔ, tile fila lajɛnba ka kalan bena ladili nafamanw ni jagwɛlɛya di an ma. A barokun ko: “ ‘Hakilitigiya min bɛ na ka bɔ sankolo la’, an k’a to a k’an ɲɛminɛ.”—Yaku. 3:17.

Kalankulu fɔlɔ barokun ko: “ ‘Hakilitigiya min bɛ na ka bɔ sankolo la’, an k’a yira an ka ɲɛnamaya kɔnɔ.” A bena an dɛmɛ an k’a faamu a kɔrɔ ye min ye ka kɛ mɔgɔ senuman ye, hɛɛrɛkɛla, mɔgɔ sabalilen ani mɔgɔ min labɛnnen be ka kanminɛli kɛ. O kɔ, kafokulu kɔrɔsibaga bena kuma sankolola hakilitigiya faan saba wɛrɛw kan. Kobe kɔrɔsibaga bena loon fɔlɔ ka kalan kuncɛ a kɛtɔ k’a yira cogo min na kerecɛn cidenw labɛnnen be ka kuma Ala ka hakilitigiya koo la hali ni mɔgɔ dɔw b’u jati komi “mɔgɔ gansan kanlanbaliw.”—Kew. 4:13.

Loon filanan ka kalankulu kuun ko: “An ka tugu koow nɔfɛ, minw be dɔ fara mɔgɔ barika kan.” A bena an dɛmɛ ka koo dɔw faranfasi ka lɔn ani ka boli u ɲɛ sabu u be se k’an fari faga. A fana bena a yira an na cogo min na an be se ka mɔgɔ wɛrɛw jagwɛlɛya kafo ka lajɛnw na, waajuli kɛtɔ, ani denbaya kɔnɔ. Forobakalan kuun ko: “Ala ka hakilitigiya b’an nafa cogo min na.” A bena dɔ fara an ka waleɲumanlɔn kan kodumanw kosɔn, an be minw sɔrɔ an kɛtɔ ka Ala ka sariyakolow sira tagama an ka ɲɛnamaya kɔnɔ. Kuncɛli kalan kuun ko: “Ka koow kɛ ka kɛɲɛ ni Ala ka hakilitigiya ye, o b’an tanga.” O kalan bena barika don an na walisa an cɛsirinen ka to ka hakilitigiya ɲini Jehova fɛ laban loon ninw na.

Kalanden kuraw ka batɛmu ye lajɛnba bɛɛ ka wagatiba ye. O lɔgɔkun ka Ala ka Mara cidenyabaara lakɔli ani La Tour de Garde kalan fana bena kɛ o lajɛnba la. Jehova b’a fɛ ko a ka hakilitigiya k’an bɛɛ nafa. Ladili ni jagwɛlɛya kumaw maralen be an ye an ka tile fila lajɛnba la. U bena an nafolotigiya Alako ta fan fɛ.—Ntal. 3:13-18.