An k’an mako don mɔgɔw la: An kɛtɔ ka koow kɔrɔsi

¹ Jehova Ala ni Yesu Kirista ɲɔgɔn tɛ yen: U b’a lɔn mɔgɔw mako be fɛɛn minw na tigitigi, ani u b’u dɛmɛ (2 Tilew Kib. 16:9; Marka 6:34). Waajuli kɛtɔ, an mana bɔ mɔgɔw ka makow n’u ka haminankow kala ma, an be se ka kibaro duman fɔcogo yɛlɛma ka bɛn u ma.

² An ka kɔrɔsili kɛ k’a fɛsɛfɛsɛ: Yesu tun be koow kɔrɔsi (Marka 12:41-43; Luka 19:1-6). O cogo kelen na, n’an be magwɛrɛla mɔgɔw ka daa la, an k’a kɔrɔsi k’a filɛ ni jaaw ni foto dɔw ɲɛsinna diinanko ma, ni tulonkɛfɛnw be luu kɔnɔ, wala ni miiriya dɔw sɛbɛra ka nɔrɔ bolifɛnw kan. N’o lo, o be se k’an dɛmɛ ka kibaro duman fɔ bɛrɛbɛrɛ.

³ Mɔgɔ dɔ ɲɛda cogo n’a kɛcogo be se k’an dɛmɛ k’a tigi kɔnɔkow faamu (Ntal. 15:13). N’a sɔrɔ o tigi ka mɔgɔ sɔbɛ dɔ banna. Wala dusu kasi koo wɛrɛ y’a to a mako be dusu saalo la. N’an ye vɛrise dɔw kalan minw be bɛn a ma, o be se ka diya a ye (Ntal. 16:24). Yala a tigi kɔrɔtɔlen be bɔra, wala denɲɛnin kasitɔ b’a bolo wa? N’o lo a ka fisa an ka labɛn kɛ ka segi ka na wagati wɛrɛ la. N’an b’an janto a tigi la, ani n’an be ‘hinɛ a la’, o be se k’a lasun k’an lamɛn n’an segira ka na.—1 Piɛre 3:8.

⁴ An ka kibaro duman fɔcogo makɛɲɛ: Ciden Pol y’a kɔrɔsi ko “Bato fɛn dɔnbali ka sarakabɔlan” dɔ be Atɛnɛ dugu kɔnɔ. O y’a lasun ka kibaro duman fɔcogo yɛlɛma, sabu, a y’a fɔ ko: “Ayiwa aw bɛ min bato k’a sɔrɔ aw ma o dɔn, ne bɛ o de ko fɔ aw ye.” Pol ye koow kɛ nɛmɛnɛmɛ minkɛ, o ye mɔgɔ dɔw lasun u k’u janto Masaya cira la ani u kɛra dannabagaw ye.—Kew. 17:23, 34.

⁵ O cogo kelen na, n’an be koow kɔrɔsi, o bena an dɛmɛ ka mɔgɔw ka makow faamu ani ka kibaro duman fɔcogo makɛɲɛ. An ka ɲiningali dɔw kɛ minw be se k’an lamɛnbaga lasun a b’a kɔnɔko fɔ. An ka miiri vɛrise dɔw la minw be se k’a tigi lasun k’a mako don kosɔbɛ (Ntal. 20:5). N’an be koow kɔrɔsi, ani n’an b’an mako don mɔgɔw la ni kɔnɔgwɛ ye, o bena an dɛmɛ ka kibaro duman fɔ ni hakilidiya ye.