I lamɛnbaga dɛmɛ a ka hakilijagabɔ kɛ

1. Waajuli kɛcogo juman lo ka fisa?

¹ Waajuli kɛcogo juman lo ka fisa: Ka kuma n’i tɛ dalilu foyi yira mɔgɔw la wala ka hakilijagabɔ kɛ n’u ye walisa k’u dɛmɛ u ka jaabili ɲuman lɔn? Ciden Pol tɛmɛna kɛcogo filanan lo fɛ ka kuma Tesalonike Yahutuw fɛ. O kɛra sababu ye u ‘dɔw lara a la.’ (Kɛw. 17:2-4). Ka hakilijagabɔ kɛ ni mɔgɔ ye, o kɔrɔ ko di?

2. An be se ka Pol ladegi cogo di n’an be waajuli kɛra?

² An k’an janto mɔgɔw dusukunnataw n’u lannakow la: N’an b’a fɛ ka hakilijagabɔ kɛ ni kiinmɔgɔw ye, fɔɔ an k’an janto u ka miiriyaw la. Pol kumana Grɛki dannabaliw fɛ u ka kititigɛyɔrɔ la. A y’a daminɛ ka koo dɔw fɔ u ye u be minw lɔn ani u sɔnna minw na (Kɛw. 17:22-31). O kama, n’an b’an ka yiracogo labɛnna, an k’an janto kiinmɔgɔw ka lannakow la. U be sigasiga koo minw na, an k’an janto olu la fana (1 Kɔr. 9:19-22). N’an lamɛnbaga ye sɔsɔli kuma dɔ lawuli, an k’a ɲini ka bɛɛn sigi n’a ye koo dɔ kan ani an ka baro kɛ o kan.

3. N’an be baara kɛ koɲuman ni ɲiningaliw ye, o be se k’an dɛmɛ cogo di ka hakilijagabɔ kɛ ni mɔgɔw ye?

³ An ka baara kɛ ni ɲiningaliw ye koɲuman: An tɛ se ka tagamabaga dɔ ɲɛminɛ walisa a ka se a tagayɔrɔ la n’an t’a lɔn a be sɔrɔ yɔrɔ min na sisan. O cogo kelen na, an tɛ se ka mɔgɔw dɛmɛ u ka jaabili ɲuman lɔn n’an t’u kɔnɔkow lɔn. Sanni ka hakilijagabɔ kɛ ni mɔgɔw ye, Yesu tun ka teli ka ɲiningali dɔw kɛ u ye walisa k’u ka miiriya lɔn fɔlɔ. Ɲɛyirali fɛ, tuma min na mɔgɔ dɔ ye Yesu ɲininga ko: “Ne ka mun kɛ walisa ne ka ɲɛnamaya banbali sɔrɔ?” Yesu y’a ɲini ka cɛɛ ka miiriya lɔn fɔlɔ ka sɔrɔ k’a jaabi (Luka 10:25-28). Sababu dɔ wɛrɛ sen fɛ, tuma min na Piɛrɛ ma jaabili ɲuman di, Yesu ye baara kɛ koɲuman ni ɲiningaliw ye walisa k’a ka miiriya latilen (Mat. 17:24-26). O kama, ni mɔgɔ dɔ ye ɲiningali kɛ wala n’a ye miiriya dɔ fɔ min bɛnnin tɛ, an be se ka tɛmɛ ɲiningaliw fɛ ka hakilijagabɔ kɛ n’a ye o koo kan.

4. Mun na an ka kan k’a ɲini ka hakilijagabɔ kɛ ni mɔgɔw ye?

⁴ N’an be hakilijagabɔ kɛ ni mɔgɔw ye, an be Karamɔgɔba Yesu ni kerecɛn fɔlɔw ladegi, u minw tun be se waajuli la koɲuman. An fana be bonya ni danbe la lamɛnnikɛla kan (1 Piɛrɛ 3:15). O la, n’a sɔrɔ a bena sɔn ko an ka segi ka na bɔ a ye.