A ɲini k’i ka waajuli kɛcogo fisaya: I mako don i lamɛnbaga la

Mun na a kɔrɔtanin lo: Yezu tun b’a mako don jama na k’a janto u kelen kelen bɛɛ la ni kanuya ye. Loon dɔ la, tulogweren dɔ tun be jama cɛma. N’a sɔrɔ Yezu tun y’a kɔrɔsi ko a hakili siginin tɛ. O kama, Yezu tagara n’a ye a dan na ka a mabɔ jama na walisa k’a kɛnɛya (Mariki 7:31-35). Yezu tun b’a janto a ka kalandenw na. Komi a tun b’a lɔn ko u tɛ se ka koo bɛɛ faamu, o kama a ma koo caaman fɔ u ye k’u niin degun (Zan 16:12). Hali ka Yezu to sankolo la, a b’a mako don mɔgɔ kelen kelen bɛɛ la (2 Tim. 4:17). An minw ye Krista ka kalandenw ye, an b’a fɛ k’a ladegi (1 Piyɛri 2:21; 1 Zan 3:16, 18). An bena se waajuli kɛcogo la koɲuman n’an b’an janto mɔgɔ kelen kelen bɛɛ ka koow cogoya la, a diyanyekow n’a ka haminankow la. An kana a to a tigi b’a miiri ko an nakun ye ka kibaro dɔ lo fɔ a ye wala ka sɛbɛ kalanta dɔ di a ma dɔrɔn. Nka, n’a ɲɛɛ b’a la ko an b’an mako don ale yɛrɛ lo la, n’a sɔrɔ a bena sɔn k’an lamɛn.