An k’an mako don mɔgɔw la: An kɛtɔ ka ɲiningali kɛ, ani ka lamɛnni kɛ
1 A ka di mɔgɔ caaman ye k’u ka fɛtaw fɔ. Nka kɔrɔfɔliw man di u ye. A fana man di u ye mɔgɔw k’u sɛnsɛn. O kama, an minw ye kerecɛn cidenw ye, an ka kan ka ɲiningali kɛcogo degi walisa ka mɔgɔw lasun u k’u kɔnɔnamiiriliw fɔ an ye.—Ntal. 20:5.
2 An ka ɲiningaliw ka kan ka mɔgɔw lasun u ka miiri. Nka, o ɲiningaliw man kan k’u sɛgɛn. Waajuli kɛtɔ soo ni soo, balimacɛ dɔ b’a fɔ: “Aw ka miiri la, yala mɔgɔw bena ɲɔgɔnw bonya ka danbe la ɲɔgɔnw kan loon dɔ la wa?” Ka kɛɲɛ n’a tigi ka jaabili ye, a b’a fɔ ko: “Aw ka miiri la, mun lo be se ka mɔgɔ dɛmɛ k’o kɛ?” Walima, a b’a fɔ ko: “Mun na aw b’a miiri ten.” Waajuli kɛtɔ sababu dɔw sen fɛ, ani foroba yɔrɔw la, balimacɛ wɛrɛ be ɲiningali kɛ dentigiw ye ko: “Dentigiya koo juman lo ka di ile ye kosɔbɛ-kosɔbɛ?” O kɔ, a b’a tigi ɲininga ko: “Aw ka ɲɛnako fɔlɔw ye mun lo ye?” An k’a kɔrɔsi k’o ɲiningali sifaw b’a to mɔgɔw b’u kɔnɔnakow fɔ, nka u t’u sɛgɛn. Komi bɛɛ cogoya tɛ kelen ye, an ka kan k’an ka barokun n’an ka ɲiningali kɛcogo yɛlɛma ka kɛɲɛ ni kiin kɔnɔ mɔgɔw ka fɛtaw ye.
3 An ka mɔgɔw lasun u k’u kɔnɔnamiiri fɔ an ye: Ni mɔgɔw sɔnna k’u ka fɛtaw fɔ an ye, an k’an dusu suman ka lamɛnni kɛ. An kana u ka kuma tigɛ gwansan (Yak. 1:19). U ye min fɔ an ye, an k’an janto o la ni teriya ye (Kol. 4:6). An be se k’a fɔ dɔrɔn ko: “I ka kuma ka di. I ni ce i ka miiriya la.” An k’u fo n’an be se k’a kɛ ni kɔnɔgwɛ ye. An k’an ninsɔndiya ka ɲiningali wɛrɛw bila u ye. O la, an bena u ka miiriya lɔn, ani an bena a lɔn mun kama u be miiri o cogo la. An k’a ɲini ka bɛn kelen kan n’u ye koo dɔw kan. N’an b’a fɛ k’u ɲɛsin vɛrise dɔw ma, an be se k’a fɔ ko: “Yala i delila ka miiri k’o be se ka kɛ wa?” An kana kuma ni wasoya ye. An fana kana an yɛrɛ bila sɔsɔli kɛli la.—2 Tim. 2:24, 25.
4 Mɔgɔw b’an ka ɲiningaliw jaabi cogo min na, o bena bɔ an ka lamɛnni kɛcogo la u fɛ. Mɔgɔw be se k’a lɔn n’an be lamɛnni kɛra sɔbɛ la. Tagamakɛla kɔrɔsibaga dɔ y’a fɔ ko: “N’an b’an dusu suman ka lamɛnni kɛ mɔgɔw fɛ, o be nɔɔba to u kan, ani o b’u lasama an ma. O fana b’a yira ko, sɔbɛ la, an b’an janto u la ni dusudiya ye.” N’an be mɔgɔw lamɛn, o be bonya la u kan. Ani, o be se k’u lasun ka kibaro duman lamɛn an fɛ.—Rom. 12:10.