Bibulukalanw daminɛcogo gafe Qu’enseigne la Bible ? kɔnɔ

A bena diya an caaman ye ka bibulukalan kɛ ni mɔgɔw ye n’an kɔni tun be se k’a daminɛ. Gafe kura nin be se k’an dɛmɛ k’o kɛ: Qu’enseigne réellement la Bible ? A ɲɛɛ 3-7nan labɛnna k’an lamɛnbaga lasun a ka baro kɛ n’an ye Bibulu kan o gafe kɔnɔ. Hali minw ma kɔgɔ waajuli kɛli la, u bena a ye ko a man gwɛlɛ ka bibulukalanw daminɛ n’o gafe ye.

◼ An be se ka yiracogo nin kɛ k’a filɛ, a basiginen be gafe ɲɛɛ 3nan kan:

An ka kibaruya dɔ wala kunko dɔ kofɔ, min be mɔgɔw hakili la. O kɔ, an k’an lamɛnbaga ɲɛsin gafe ɲɛɛ 3nan ka ɲiningaliw ma, minw sɛbɛra ka bonya. Ani, an k’a ɲini a fɛ a k’a ka fɛta fɔ an ye. O kɔ, an ka gafe ɲɛɛ 4-5nan yira a tigi la.

◼ An fana be se ka tɛmɛ ɲɛɛ 4-5nan fɛ ka baro daminɛ:

An be se k’a fɔ ko: “An ɲɛɛ be yɛlɛmani minw na yan, n’u tun dafara ka kɛ tiɲɛnko ye, yala o tun tɛna kɛ koo cɛɲumanba ye wa?” Walima, an be se k’a fɔ ko: “Layidu minw kofɔra yan, e b’a fɛ juman ka dafa e ɲɛ na?” An ka mɛnni kɛ a fɛ koɲuman.

Ni bibulusen dɔ kɔni diyara an lamɛnbaga ye, an k’a yira Bibulu be min fɔ o koo kan: O vɛrise ɲɛfɔra gafe ka dakun minw kɔnɔ, an k’u lajɛ n’a tigi ye. (Koorilen filɛ i kinibolo fan fɛ.) An k’a kɛ bibulukalan kɛcogo la. O be se ka kɛ miniti 5 ni 10 cɛ, ɲɔgɔnye fɔlɔ yɛrɛ la n’a tigi ye a ka soda la.

◼ Yiracogo wɛrɛ filɛ nin ye: An ka tɛmɛ gafe ɲɛɛ 6nan fɛ k’an lamɛnbaga lasun a k’a kɔnɔnakow fɔ.

An k’a ɲɛsin ɲiningaliw ma, minw be sɔrɔ gafe ɲɛɛ 6nan jukɔrɔla la. Ani, an k’a ɲininga ko: “Yala i delila ka ɲiningali ninw dɔ bila i yɛrɛ ye wa?” N’a ye dɔ kofɔ an ye, an k’a ɲɛsin gafe ka dakunw ma, minw b’o ɲiningali jaabi. (Koorilen filɛ kinibolo fan fɛ.) An kɛtɔ k’o kunnafoniw lajɛ ɲɔgɔn fɛ, an be bibulukalan lo kɛra ten.

◼ An be se ka tɛmɛ gafe ɲɛɛ 7nan fɛ ka bibulukalan kɛcogo yira:

An ka kumasen fɔlɔ, 2nan ni 3nan kalan gafe ɲɛɛ 7nan na. O kɔ, an ka sapitiri 3nan ta. Ani, an ka tɛmɛ dakun 1-3nan fɛ ka bibulukalan kɛcogo yira a tigi la. An ka labɛn kɛ ka segi ka na dakun 3nan ka ɲiningaliw jaabi.

◼ Viziti kuraw labɛncogo:

Kalan fɔlɔ kuncɛtɔ, an ka labɛn kɛ ka segi ka na taga ɲɛ ni baro ye. An be se k’a fɔ ko: “Miniti damaninw dɔrɔn kɔnɔ, an y’a ye Bibulu be min fɔ nin baro kunba kan. Siɲɛ wɛrɛ, an bena se ka baro kɛ ... kan [An ka ɲiningali dɔ lawuli]. Yala i b’a fɛ ne ka segi ka na o lɛri kelen na lɔgɔkun nata la wa?”

Jehova ye wagati min latigɛ, a ka surun. Sanni o wagati ka se, a be to ka baarakɛminanw di an ma walisa an k’an ka cii dafa (Mat. 28:19, 20; 2 Tim. 3:17). An ka baara ɲuman kɛ n’o minan kura ye walisa ka bibulukalanw daminɛ.

[Box on page 5]

Gafe ɲɛɛ 4-5nan ka vɛrisew ɲɛfɔra yɔrɔ minw na

◻ Jirali 21:4 (ɲɛɛ 27-8, § 1-3)

◻ Esayi 33:24; 35:5, 6 (ɲɛɛ 36, § 22)

◻ Yuhana 5:28, 29 (ɲɛɛ 72-3, § 17-19)

◻ Zaburu 72:16 (ɲɛɛ 34, § 19)

Gafe ɲɛɛ 6nan ka ɲiningaliw jaabiliw

◻ Mun na tɔɔrɔ b’an kan? (ɲɛɛ 108-9, § 6-8)

◻ An be se ka haminankow kɛlɛ cogo di? (ɲɛɛ 184-5, § 1-3)

◻ An be se k’an ka denbaya ka ɲɛnamaya kɛcogo fisaya cogo di? (ɲɛɛ 143, § 20)

◻ Mun lo be kɛ saya kɔ? (ɲɛɛ 58-9, § 5-6)

◻ An ka mɔgɔ sɔbɛ minw sara, yala an bena u ye tugun loon dɔ la wa? (ɲɛɛ 72-3, § 17-19)

◻ Cogo juman na an be se ka la a la ko Ala bena a ka layiduw dafa? (ɲɛɛ 24-5, § 17)