Ɛntɛrɛnɛtiko: An k’an janto a faratiw la! Yɔrɔ 3nan: Ka tɛmɛ ɛntɛrɛnɛti fɛ ka lɛtɛrɛ ci
1 A bɛnnen be ka miiriyaw ni wale dɔw tilan n’an somɔgɔw ani an teriw ye minw yɔrɔ ka jan an na. Nka tiɲɛn na, yala kanuya sira lo k’o kɛ ni mɔgɔ wɛrɛw ye, i be taga a sɔrɔ u yɛrɛw tɛ an somɔgɔw n’an teriw lɔn wa? Wala yala an ka kan k’u sɛbɛ ka bila ɛntɛrɛnɛti kan walisa bɛɛ k’u kalan wa? Yala o tɔgɔla lɛtɛrɛw ɲɔgɔnna wɛrɛw ka kan ka ci bɛɛ ma n’an tɛ wolomani kɛ wa: an lɔnbagaw wala an tɛ minw lɔn? O cogo kelen na, n’i ye lɛtɛrɛ dɔw sɔrɔ, ani a gwɛnen lo k’u ma ɲɛsin i ma, yala kanuya sira lo k’u lase mɔgɔ wɛrɛw ma n’u ma ɲɛsin olu fana ma wa?
2 I be kunnafoni min lasera, n’a ma kɛ tiɲɛnko ye do? Yala i tɛ kɛra sababu ye ka ngalon sabati wa? (Ntal. 12:19; 21:28; 30:8; Kol. 3:9). Siga t’a la, n’an b’an janto ‘ka an taama cogo dɔn: An kana taama i ko hakilintanw, nka i ko hakilitigiw’, an bena kɔrɔsili kɛ (Efes. 5:15). A kɛra hɛɛrɛko ye an fɛ gafew Annuaire, La Tour de Garde ani Réveillez-vous ! falen be walew la minw be se ka sɛgɛsɛgɛ. U b’an jagwɛlɛya ani u b’an jija an ka to ka “sira” tagama.—Esayi 30:20, 21.
3 Farati wɛrɛ be yen tugu. Ciden Pol y’a fɔ dɔw koo la ko: “U bɛ kɛ salabaatɔw ye ka yaalayaala sow ni ɲɔgɔn cɛ. Salabaatɔya dɔrɔn tɛ, u bɛ u da don mɔgɔw ka kow bɛɛ la ka mɔgɔw ka gundow fɔ kɛnɛ kan, ka kuma fɔbaliw fɔ.” (1 Tim. 5:13). O b’a yira ko a dagalen tɛ ka wagati ta ani ka jijali kɛ ka manamanakow sɛbɛ ka ci an balimaw ma.
4 A’ ye miiri k’a filɛ, wagati min be ta ka lɛtɛrɛ caaman koo ɲɛnabɔ ɛntɛrɛnɛti kan. Gafe Data smog ye nin fɔ o koo la ko: “Ni mɔgɔ b’a la ka wagati caaman kɛ ɛntɛrɛnɛti kan ka lɛtɛrɛw falen, sanni o ka kɛ a fɛ ɲagali fɛɛn kura ye, a be yɛlɛma ka kɛ doniba ye, min be wagati tiɲɛ, sabu loon o loon, a ka kan ka baarakɛɲɔgɔnw, teriw, somɔgɔw ka lɛtɛrɛ caaman kalan ani k’u jaabi, ... feerefen ganselisɛbɛw fana b’a la.” A y’a fara a kan ko: “Minw jarabira ɛntɛrɛnɛti koo la, a kɛra delinanko jugu ye u caaman fɛ ka tulonko kibaro kelen-kelen bɛɛ lase mɔgɔ o mɔgɔ ma, minw ka ɛntɛrɛnɛti ladɛrɛsi be u fɛ: tulon kumaw, nsiirin minw be yaala dugu kɔnɔ, lɛtɛrɛ minw be jɛnsɛn wari sɔrɔli kama wala kunnadiya sɔrɔli kama, ani a ɲɔgɔnnaw.”
5 Nin lakalita bɔlen be lɛtɛrɛ dɔ fɛ min be yaalala balimaw cɛ ɛntɛrɛnɛti kan. Koo ninw be sɔrɔ a kɔnɔ: yɛlɛko maana, tulonko minw sɔrɔla waajuli la, poyi minw kɛra i n’a fɔ u basigira an ka lannakow kan, ɲɛyirali minw tara kalanw na lajɛnbaw la ani kafow kɔnɔ, wale minw sɔrɔla waajuli kɛtɔ, ani a ɲɔgɔnnaw, u bɛɛ bɔlen be manamanako gwansanw ma. Mɔgɔ caaman be sin k’o lɛtɛrɛ ɲɔgɔn ci kelen n’u yɛrɛw m’a bɔyɔrɔ sɛgɛsɛgɛ ka lɔn. O la, a ka gwɛlɛ k’a sɛbɛbaga tigitigi lɔn. O kama an ka kan k’an yɛrɛ ɲininga n’o kunnafoniw ye tiɲɛnko ye.—Ntal. 22:20, 21.
6 Tuma caaman na, o kunnafoniw ye manamanakow ye. U yɔrɔ ka jan ni ‘kuma kɛnɛw’ ye minw tun be Pol hakili la tuma min na a y’a sɛbɛ Timote ma ko: “Ne ye kuma kɛnɛ minnu fɔ i ye, i ka o bɔɲɔgɔnko kumaw mara dannaya ni kanuya la, olu minnu bɛ Krisita Yesu la” (2 Tim. 1:13). ‘Kuma kɛnɛw’ be sɔrɔ “kaan saniyalen” kɔnɔ, o min ye Bibulu ka tiɲɛn ye. O ‘kuma kɛnɛw’ basiginen be Bibulu ka barokun lo kan fɔlɔ. O barokun ko: Ala ka Masaya bena Jehova lafasa ko joo b’a fɛ ka kuntigiya kɛ (Sofoni 3:9, NW). Wagati min b’an fɛ ani barika min b’an na, an ka kan k’u bɛɛ ta ka Jehova ka kuntigiya lafasa.