Réveillez-vous ! kɛrɛnkɛrɛnnin dɔ bena yira sɛtanburu la
1 Ni mɔgɔ kelen-kelen tɛ, a ka di bɛɛ ye ka kɔnɔw dɔnkili lamɛn ani ka tile bencogo mafilɛ. Nka mɔgɔ caaman tɛ sɔn a la ko sankolola Faa kanutigi lo y’o fɛɛnw dan. Sababu dɔ bena di an ma, min ɲɔgɔn tɛ yen, ka seereya kɛ ko Jehova ye Danbaga ye, an kɛtɔ ka Réveillez-vous ! kɛrɛnkɛrɛnnin dɔ jɛnsɛn (Esayi 40:28; 43:10). Sɛtanburu ka Réveillez-vous ! kɔnɔnakow bɛɛ be kuma barokun nin kan: “Yala Danbaga be yen wa?”
2 Kafo ka kiinw kɔnɔ: N’i be se, i k’i labɛn ka jɛn ni kafo ye waajuli la samedi o samedi. Ayiwa, i fana be se k’o Réveillez-vous ! kɛrɛnkɛrɛnnin kofɔ mɔgɔw ye wagati wɛrɛ la lɔgɔkun kɔnɔ. N’a sɔrɔ a bena diya lakɔli karamɔgɔw ye, ani mɔgɔ wɛrɛ minw be baara kɛ kalan koo la. O kama, n’o ɲɔgɔnna mɔgɔw be yen aw ka kiinw kɔnɔ, kafo be se ka labɛn kɛrɛnkɛrɛnnin kɛ walisa ka taga bɔ u ye.
3 Ni mɔgɔ dɔ y’a mako don, an ka ɲiningali dɔ kɛ, an bena min jaabi siɲɛ wɛrɛ. Ɲɛyirali fɛ, an be se ka ɲiningali dɔ kɛ ko: ni Danbaga ye kanutigi ye, mun na a b’a to tɔɔrɔ be caya ten? O kɔ, viziti kura kɛtɔ, an be se ka gafe Qu’enseigne la Bible ? sapitiri fɔlɔ wala 11nan yira a tigi la. Wala, an be se k’a latigɛ ka ɲiningali dɔ kɛ Danbaga ka laɲinita koo la dugukolo ta fan fɛ, ani ka sapitiri 3nan lajɛ n’an segira ka na.
4 Lakɔliso la*: N’i ye lakɔliden ye, mun na i t’o Réveillez-vous ! kɛ kado ye k’a di i ka karamɔgɔw ma ani i ka lakɔli filankuruw ma? I ka kelen bila dɔrɔn i ka tabali kan. O be se ka dɔw lasun ka ɲiningali kɛ an ka lannakow kan. N’a sɔrɔ sababuw bena di i ma ka baara kɛ n’a kɔnɔnakow ye lakɔliso walisa k’i ka lanaya lafasa kalanso kɔnɔ, ani ka barokun dɔw labɛn. Barokun dɔ labɛnna a kɔnɔ walisa k’i dɛmɛ. A kuun ko “Denmisɛnw be ɲiningali kɛ ko: Ne be se k’an ka lannako lafasa cogo di k’a yira ko Danbaga be yen?”
5 Jehova ka kan ni bonya ni nɔɔrɔ ye a ka fɛɛn dannenw kosɔn (Jir. 4:11). An be se k’an Danbaga bonya ani ka mɔgɔw dɛmɛ u fana k’a bonya an kɛtɔ ka sɛtanburu ka Réveillez-vous ! yira mɔgɔw la ni dusudiya ye.