An k’an mako don mɔgɔw la: An kɛtɔ ka waajuli kɛ n’an tɛ mɔgɔw woloma
1 Yeli dɔ kɔnɔ, ciden Yuhana ye mɛlɛkɛ dɔ pantɔ ye sankolo cɛmancɛ la. A tun be kibaru duman banbali fɔra “siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” ye (Jir. 14:6). Yala an b’o mɛlɛkɛ ladegi an kɛtɔ ka waajuli kɛ n’an tɛ wolomani kɛ wa? An be se ka wolomani kɛ ani ka jigi mɔgɔw la gwansan n’an yɛrɛ tɛ bɔ a kala ma. Waajuli kɛtɔ, an be mɔgɔw jati cogo min na, o be se ka nɔɔ to an ka kibaro duman fɔcogo kan. O kama, n’an be mɔgɔw waajura minw bɔyɔrɔ tɛ kelen ye, an ka kan k’an janto u la ni kɔnɔgwɛ ye ani kanuya ye.
2 I k’i janto kafo ka kiinw cogoya la: Yala jamana wɛrɛ mɔgɔw wala kalifadenw sigilen be aw ka kiinw kɔnɔ wa? Mɔgɔ ka teli ka ɲinɛ u kɔ. An k’a bɔ an yɛrɛ la k’u yɔrɔ yaala ani k’a ɲini k’u lɔn ka ɲɛ: u makoyaw, u haminankow, u diyanyekow, min ka gwo u ye, u be siran min ɲɛ, ani u be sigasiga min na. An k’an jija ka Masaya kibaro fɔcogo yɛlɛma ka kɛɲɛ n’o koow ye (1 Kɔr. 9:19-23). I ko ciden Pol, an ka kan k’a jati ko waajibi lo an fɛ ka kibaro duman fɔ bɛɛ ye an ka kiinw kɔnɔ hali jamana wɛrɛ mɔgɔw, siya wɛrɛw, kaan wɛrɛ fɔbagaw, ani nafolobatigiw.—Rom. 1:14.
3 Nka cogo juman na an be se ka seereya di kaan wɛrɛ fɔbaga ma do? An ka baara kɛ koɲuman ni kitabunin Une bonne nouvelle pour des gens de toutes nations ye. An fana be se ka sɛbɛninw wala kitabunin dɔw ta an bolo minw sɛbɛra kiin mɔgɔw ka kaanw na. (A filɛ km 7/03 ɲɛɛ 4, § 2-3nan). Ka fara o kan, weleweledala dɔw y’u jija ka foliw kɛcogo ni gafew yiracogo nɔgɔman dɔ degi kaan wɛrɛw la. Tuma caaman na, mɔgɔw be kabakoya k’a ye ko dɔ b’a ɲinina ka kuma u fɛ u yɛrɛ ka kaan na, hali n’a tigi tɛ bɛrɛ lɔn a la. O be se ka kibaro duman koo diya u ye.
4 An ka Jehova ladegi: An kɛtɔ ka kibaro duman lase mɔgɔw ma minw bɔyɔrɔw tɛ kelen ye, an be Jehova, an ka Ala ladegi, ale min tɛ mɔgɔw woloma, ani a ‘b’a fɛ mɔgɔ [sifaw] bɛɛ ka kisi ka se ka tiɲɛ dɔn.’—1 Tim. 2:3, 4.