Ka seereya kɛ soo ni soo
1 “Minw delila a la ka Tiɲɛn kibaruya jɛnsɛn cogo sifa caaman na, u bena sɔn a la ko bi wagati la, ka seereya kɛ soo ni soo ni gafe L’Aurore du Millénium ye, o lo ye fɛɛrɛ fisaman ye min b’an dɛmɛ ka waajuli kɛ Tiɲɛn koo la.” O kumaw be sɔrɔ saan 1893, zuwekalo tile fɔlɔ ka Zion’s Watch Tower kɔnɔ. U be sinsin soo ni soo cidenya baara nafa kan. Dugukolo kuru bɛɛ kan, mɔgɔw nana a jati ko o ye Jehova Seerew ka tagamasiɲɛ ye. Nka jamana dɔw la, mɔgɔw sɔrɔko be gwɛlɛyara ka taga u ka soo. O kama, yala o waajuli kɛcogo be sanga la hali bi wa?
2 A basiginen be Bibulu kan ani a kɔrɔtalen be: Soo ni soo seereya ka daliluw be sɔrɔ Bibulu kɔnɔ. Yesu ye cii di a ka kalanden 70 ma k’u ka taga fila-fila mɔgɔw ka soow kɔnɔ (Luka 10:5-7). Wagati dɔɔni Yesu salen kɔfɛ, Bibulu b’a fɔ a ka kalandenw koo la ko: “Don o don, ka u to Alabatosoba kɔnɔ ani mɔgɔw ka duw kɔnɔ, u ma mɔgɔw kalanni ni ... Kibaru Duman fɔli dabila.” (Kɛw. 5:42). Ciden Pol fana ye mɔgɔw kalan soo ni soo ni kisɛya ye.—Kɛw. 20:20.
3 Hali bi, soo ni soo seereya ye fɛɛrɛba ye min b’an dɛmɛ ka kibaro duman jɛnsɛn. A b’an dɛmɛ an ka sin ka mɔgɔ sɔbɛw “ɲini” cogo tilennen na (Mat. 10:11). Tuma caaman na, mɔgɔw lafiyanen lo koɲuman u ka soo. N’an be kuma n’u ye ɲɛda ni ɲɛda, (n’an b’u kumakan mɛn, k’u ɲɛda cogo ye, ani k’u laminikow kɔrɔsi) o b’an dɛmɛ k’u makow n’u haminankow faamu. Tuma caaman na, o be sababu di an ma ka baro kɛ ka mɛɛn.
4 An ka yɛlɛmani dɔw kɛ an yɛrɛ ka koow la: Ciden Pol labɛnnen tun lo ka yɛlɛmaniw kɛ “Kibaru Duman kosɔn” (1 Kɔr. 9:23). N’a sɔrɔ an be se k’an ka porogramu yɛlɛma walisa ka waajuli kɛ tuma min na mɔgɔ caaman be u ka soo, i n’a fɔ wagati wɛrɛ la tile kɔnɔ, lɔgɔkun laban na, wala selilonw la. Mɔgɔw ma sɔrɔ soo minw kɔnɔ, an k’o ladɛrɛsiw ta. Ani, an ka segi ka na a filɛ loon wɛrɛ la wala wagati wɛrɛ la tile kɔnɔ.
5 Kɛnɛyako be hali minw kan, u be se k’u sen don soo ni soo waajuli la. N’a sɔrɔ an be se ka labɛn kɛ ka taga n’o ɲɔgɔnna mɔgɔw ye soo dɔw la, a man gwɛlɛ ka se yɔrɔ minw na. O bena u dɛmɛ ka waajuli kɛ cogo nɔgɔman na. Nɛnɛkiri bana kosɔn, balimamuso dɔ tun be se ka daa kelen dɔrɔn lo kɛ miniti bisaba o bisaba. Nka waajuli kɛnen kɔ ni jɛnkulu ye, a dusu diyara ani a wasara kosɔbɛ!
6 Hali bi, saga bisigiw be sɔrɔ daa ni daa waajuli sababu fɛ. Weleweledala dɔ ye daa dɔ kɔkɔ minkɛ, a fɔra a ye ko: “Don ka na. Ne b’a lɔn i ye mɔgɔ min ye. Ne tun be Ala delila ko a ka mɔgɔ ci ka na ne dɛmɛ. O yɔrɔnin bɛɛ, ne ye daa kɔkɔ kaan mɛn. Ala ye ne lamɛn ani a ye i ci ka na.” Koow b’a yira ka gwɛ ko Jehova be o waajuli kɛcogo duga (Mat. 11:19). I k’i cɛsiri ka soo ni soo seereya kɛ i ka cidenya baara faan dɔ ye tuma o tuma.
[Study Questions]
1. Soo ni soo cidenya baara be na ni ɲiningali juman ye? Mun na do?
2. Ka seereya kɛ soo ni soo, mun lo b’a yira k’o daliluw be sɔrɔ Bibulu kɔnɔ?
3. Nafa dɔw juman be soo ni soo seereya la?
4. An be se ka mun lo kɛ walisa soo ni soo seereya ka den koɲuman?
5. Kɛnɛyako be minw kan, cogo juman na an be se k’u sen don waajuli la soo ni soo?
6. Mun na an ka kan ka soo ni soo waajuli kɛ an ka cidenya baara faan dɔ ye tuma o tuma?