Baara kɛ bɛrɛbɛrɛ n’i ka wagati ye waajuli la
Jehova Seerew ye lɛri 1945487604 kɛ waajuli la salon ka waajuli baara saan na. A gwɛnin lo ko an jijanin lo ka caaman kɛ Jehova ka baara la! (Zab. 110:3; 1 Kor. 15:58). Komi “waati caaman t’an bolo,” an k’an ka wagati nafaman kɛ waajuli la walisa ka kuma mɔgɔ caaman fɛ.—1 Kor. 7:29.
N’an t’a fɛ k’an ka wagati tiɲɛ, fɔɔ an ka sɔn ka yɛlɛmani dɔw kɛ. Ɲɛyirali fɛ, a be se ka kɛ ko i be deli ka lɛri kelen ni kɔ ɲɔgɔn kɛ waajuli faan dɔ la, nka i tɛ mɔgɔ si sɔrɔ. N’o lo, mun na i tɛ yɛlɛmaniw kɛ walisa ka mɔgɔ caaman sɔrɔ ani ka kuma u fɛ? Koow cogoya tɛ kelen ye yɔrɔ bɛɛ. Nka, ladili nunu be se k’i dɛmɛ ka baara kɛ bɛrɛbɛrɛ n’i ka wagati ye walisa i kana “fiɲɛ bugɔ.”—1 Kor. 9:26, Bible senuma.
Soo ni soo waajuli: Kabi wagatijan, weleweledalaw mana bɔ waajuli kama, u be deli k’a daminɛ ka waajuli kɛ soo ni soo. Nka, mɔgɔ caaman do be taga baara la tile kuru kɔnɔ. O kama, mun na i t’a ɲini ka waajuli kɛ soo ni soo wulafɛ wala fitirida fɛ? O wagati la, mɔgɔ caaman b’u ka soo ani u be lafiɲɛna. Tile kɔnɔ, n’a sɔrɔ a ka fisa ka waajuli kɛ siradaw la wala jagokɛyɔrɔw la.
Waajuli kɛtɔ jamayɔrɔw la: Tabaliw ni wotorow ka kan ka bila yɔrɔ minw na sennatigiw ka ca kafo ka kiinw kɔnɔ. (An ka Masaya Cidenyabaara ɲɛɛ 5nan lajɛ, saan 2013 zuwekalo ta.) Kafo ye jamayɔrɔ minw sugandi waajuli kama, a be se ka kɛ ko sennatigiw tɛ tɛmɛ caaman tugun o yɔrɔ la. N’o lo, kafo ka waajuliko ɲɛnabɔbagaw jɛnkulu be se k’a latigɛ ko wotoro wala tabali ka bila yɔrɔ wɛrɛ la, sennatigiw ka ca yɔrɔ min na.
Viziti kuraw ani bibulukalanw: Tuma min na nafa bɛrɛ tɛ sɔrɔ waajuli kɛcogo wɛrɛw la, mun na i t’i ka viziti kuraw ni bibulukalanw kɛ o wagati la? Ɲɛyirali fɛ, n’i be waajuli kɛ soo ni soo samedilon sɔgɔma ani nafa bɛrɛ be sɔrɔ o la, mun na i tɛ i ka bibulukalanw kɛ wulafɛ wala sufɛ? Viziti kuraw kɛtɔ kiin dɔ kɔnɔ, weleweledalaw be se ka labɛn kɛ walisa ka taga bɔ u ka Bibulu kalandenw ye minw b’o kiin kɔnɔ. U be se k’o kɛ wagati tigitigi dɔ la walisa ka se ka caaman kɛ waajuli la.
Tiɲɛn lo ko an mana waajuli kɛ tuma o tuma, an be se k’o wagati jati an ka rapɔɔri kɔnɔ. Nka, dɔ bena fara an ka ninsɔndiya kan n’an be nafa sɔrɔ o baara la. N’i be deli ka waajuli faan dɔ kɛ wagati tigitigi dɔ la ani i y’a ye ko nafa bɛrɛ tɛ sɔrɔ o la, i k’a ɲini ka waajuli kɛ cogoya wɛrɛ la. Jehova min ye “forotigi” ye, ale deli a k’i ɲɛminɛ walisa i ka se ka baara kɛ bɛrɛbɛrɛ n’i ka wagati ye waajuli la!—Mat. 9:38.