I be se ka waajuli kɛ sufɛ wa?
1. Gafe dɔ ka fɔta la, ciden Pol tun be waajuli kɛ soo ni soo tuma juman na?
1 Gafe dɔ ka fɔta la, ciden Pol tun be waajuli kɛ soo ni soo “k’a ta lansara wagati ma fɔɔ ka taga se dugutilama.” (Daily Life in Bible Times). An m’a lɔn n’o tun ye Pol delinanko ye. An kɔni b’a lɔn ko a tun labɛnnin lo ka “fɛn bɛɛ kɛ Kibaru Duman kosɔn.” (1 Kɔr. 9:19-23). O kɔrɔ ko a tun be labɛn kɛ ka taga waajuli kɛ soo ni soo tuma min na a be se ka mɔgɔ caamanba sɔrɔ.
2. Mun na sufɛ ye wagati ɲuman ye ka waajuli kɛ?
2 Jamana caaman na, weleweledalaw delinanko lo ka taga waajuli kɛ soo ni soo sɔgɔma, lɔgɔkun kɔnɔ. Nka aw ka yɔrɔ la, o wagati lo bele ka fisa wa? Piyɔniye dɔ y’a fɔ a ka kiinmɔgɔw koo la ko: “Mɔgɔw sɔrɔ man di fewu u ka soo sɔgɔma wala tilefɛ. Nka sufɛ, u caaman be sɔrɔ yen.” Cogo fisaman min na an be se ka cɛɛw sɔrɔ ka kibaro diiman lase u ma, n’a sɔrɔ o ye ka waajuli kɛ sufɛ. O wagati la, mɔgɔw lafiyanin lo ani u be sɔn ka baro kɛ. Ni waajuli be se ka kɛ sufɛ, diinan mɔgɔkɔrɔw ka kan ka lajɛnw labɛn o kama.
3. N’an be waajuli kɛra sufɛ, an be se ka koow kɛ ni hakili ye cogo di?
3 I ka hakili sɔrɔ: N’i be waajuli kɛra sufɛ, a ka ɲi i ka hakili sɔrɔ. Ɲɛyirali fɛ, n’i ye daa kɔkɔ wagati dɔ la min bɛnnin tɛ, i n’a fɔ dumuni kɛwagati, a ka fisa i k’a ɲini ka segi ka na wagati wɛrɛ la. Ni dibi be yen, i ka lɔ yɔrɔ min na mɔgɔw be se k’i ye, i k’a fɔ ka gwɛ i ye mɔgɔ min ye, ani i ka teliya k’i nakun fɔ u ye. An ka hakili sɔrɔ fana ka tagama fila-fila wala ni jɛnkulu ye. Yeelen be sira minw kan, ani mɔgɔw b’u kan, an k’olu ta. Ni suu janfara ani mɔgɔw b’u yɛrɛw labɛnna ka taga la, i kana daa kɔkɔ k’u dusu gwan (2 Kɔr. 6:3). Ni farati be kiin dɔw kɔnɔ suu konin kɔ, i ka waajuli lalɔ fitirida fɛ.—Ntal. 22:3.
4. Nafa juman b’a la ka waajuli kɛ sufɛ?
4 Nafa min b’o la: Waajuli ka di kosɔbɛ n’an be mɔgɔw sɔrɔ ani ka kuma u fɛ. N’an do sera ka seereya kɛ, an be sababu caaman sɔrɔ ka mɔgɔw dɛmɛ u “ka kisi ka se ka tiɲɛ dɔn” (1 Tim. 2:3, 4). Yala i be se k’i ka porogramu yɛlɛma walisa ka se ka waajuli kɛ sufɛ wa?