¹ Tuma min na Goliyati ye Israɛl ka kɛlɛbolow darabɔ, sɔrɔdasi o sɔrɔdasi tun be se k’a yɛrɛ di ka taga a kɛlɛ. Nka sagagwɛnna kamalennin dɔ lo y’a yɛrɛ di k’o kɛ k’a masɔrɔ a yɛrɛ tun tɛ kɛlɛ lɔn (1 Sam. 17:32). Yahutuw seginen kɔ ka bɔ jɔnya la, u ma Jerusalɛm lamini kogow lɔ kokura. Perse masacɛ ka minnifɛnw dibaga dɔ lo sɔnna k’a ka lɔyɔrɔba to yen masayaso kɔnɔ ani ka taga o baara labɛn Jerusalɛm (Neh. 2:5). Jehova ye o cɛɛ fila, Dawuda ni Nehemi, duga u ka yɛrɛ dili miiriya kosɔn.—1 Sam. 17:45, 50; Neh. 6:15, 16.

² K’i yɛrɛ di ni diyanye ye ka baara kɛ, o hakili nin sɔrɔ man di bi duniɲa nin kɔnɔ. Nin “laban donw” na, mɔgɔw ka boliboli ka ca, ani u caaman be “u yɛrɛw fɛ” (2 Tim. 3:1, 2). Mɔgɔ bolo be se ka degun a yɛrɛ nafa dɔrɔn ɲinini na fɔɔ a t’a janto k’a bɔ a yɛrɛ la ka mɔgɔ wɛrɛw dɛmɛ sababu dɔw sen fɛ. Nka an minw ye kerecɛnw ye, an b’a fɛ ka Yesu ladegi: ale y’a bɔ a yɛrɛ la ka mɔgɔw dɛmɛ (Yuh. 5:5-9; 13:12-15; 1 Piɛrɛ 2:21). An be se k’a yira cogo di ko an labilanen be ka dɛmɛ kɛ? Ani an bena baraji juman sɔrɔ o la?

³ An balimaw nafa kosɔn: Lajɛnw na, an be se ka hakili senu ka nilifɛn dɔ lase mɔgɔw ma an kɛtɔ ka sɔn k’an daa don baro la n’a ɲinina lamɛnnikɛlaw fɛ u ka lakalitaw kɛ (Rom. 1:11). An ka lakalitaw be Jehova bonya, u be tiɲɛn don koɲuman an hakili n’an dusukun na, ani u be dɔ fara lajɛnw diya kan an fɛ (Zab. 26:12). An fana be se k’a bɔ an yɛrɛ la ka kalan di lakɔliden dɔ nɔɔ na Ala ka Mara cidenyabaara lakɔli la n’a tigi tɛ se k’o kɛ. O bena an dɛmɛ k’an ka kalan kɛcogo fisaya.

⁴ Balimacɛw be se k’a yira ko u b’a bɔ u yɛrɛ la ka koo kɛ u kɛtɔ k’a ɲini ka kunkanbaaraw kɛ kafo kɔnɔ (Es. 32:2; 1 Tim. 3:1). An bɛɛ be se k’a bɔ an yɛrɛ la ka dɛmɛ don lajɛnbaw ka baaraw la walisa u ka kɛ ka ɲɛ. N’an b’a bɔ an yɛrɛ la ka cidenya baara kɛ ni kɔrɔsibaga tagamakɛla ye wala ka domuni di a ma, o be kɛ ‘ɲɔgɔn jijali’ ye an fɛ (Rom. 1:12). N’an b’a bɔ an yɛrɛ la ka dɛmɛ nafaman lase falatɔw, muso cɛɛ salenw, banabagatɔw ni namaraw, denbatigiw, ni kafoden wɛrɛw ma, an be ninsɔndiya ni Jehova ka nɛɛma sɔrɔ o la.—Ntal. 19:17; Kɛw. 20:35.

⁵ An be se k’an yɛrɛ labila cogoya wɛrɛ la an kɛtɔ k’an ka wagati n’an ka fanga ta ka Masaya Boon saniya ani k’a ladon. Ka fara o kan, komi mɔgɔ caaman be sɔnna tiɲɛn sira ma, an mako be Masaya Boon kuraw la ka taga. Ani an fana mako be mɔgɔw la minw b’u yɛrɛw labila k’u lɔ. Balimacɛ dɔ n’a muso tun tɛ masɔn baara lɔn. Nka u y’u yɛrɛw labila ka boonw lɔbagaw jɛnkulu dɛmɛ u sigida la. U nana degi boon lɔcogo la, ani sisan u be dɛmɛ kɛ ka lɔri kɛ. A muso b’a fɔ ko: “An kɛtɔ ka jɛn ka baara kɛ ni mɔgɔ wɛrɛw ye, an ye teriya sɔbɛ sigi an ni ɲɔgɔnw cɛ. Baara jigi tuma na, an sɛgɛnenba lo, nka an sabatilen lo Alako ta fan fɛ.”

⁶ Waajuli baara la: An be se k’an yɛrɛ di ni diyanye ye baara fisaman min kama bi, o ye Masaya waajuli baara ye. An kɛtɔ ka mɔgɔw dɛmɛ ka Bibulu ka ladiliw faamu ani k’u sira tagama, u be kuun sɔrɔ u ka ɲɛnamaya la, ani u be fanga sɔrɔ k’u ka delinanko juguw dabila. U be siniɲasigi jigiya ɲuman sɔrɔ Bibulu kɔnɔ min b’u ɲagali. An kɛtɔ ka mɔgɔw kalan Bibulu la, o ye ninsɔndiya baara ye min be mɔgɔw nafa bɛrɛbɛrɛ (Yuh. 17:3; 1 Tim. 4:16). N’a sɔrɔ an ka koow cogoya b’a to an be se ka caaman kɛ o baara la an kɛtɔ ka piyɔniye kɔrɔsigi wala kudayi piyɔniye baara kɛ, ka taga sigi yɔrɔ min na makoyaba be yen dɛmɛ na, wala ka kaan wɛrɛ degi.

⁷ Masacɛ Dawuda ye ciraya kuma fɔ ko tuma min na Masiya bena a daminɛ ka masaya kɛ, Ala ka mɔgɔw bena u yɛrɛw di ni diyanye ye (Zab. 110:3). Komi Jehova be sumantigɛ baara tɔɔ teliyara Alako ta fan fɛ, baara kɛtaw ka ca. O kosɔn a makoya be diyanye baarakɛla wɛrɛw la (Es. 60:22). Yala i y’a fɔ i yɛrɛ kɔnɔ ko: “Ne, i ka ne ci.” (Es. 6:8). Tiɲɛn na, an kɛtɔ k’a yira ko an labilanen be ka dɛmɛ kɛ, an koo be diya Jehova ye ani an be baraji caaman sɔrɔ o la.

[Study Questions]

1. Dawuda ni Nehemi ka kɛcogo y’a yira cogo di k’u labilanen be k’u yɛrɛ di ka dɛmɛ kɛ?

2. Mun na kerecɛnw ka kan k’a yira k’u labilanen be ka dɛmɛ kɛ?

3. N’an b’a bɔ an yɛrɛ la ka koow kɛ lajɛnw na, nafa juman be sɔrɔ o la?

4. Cogoya dɔw juman fɛ an be se k’a yira ko an labilanen be ka dɛmɛ kɛ?

5. Masaya Boon baara jumanw b’a to an mako be mɔgɔw la minw labilanen be ka baara kɛ?

6. Mun na cidenya baara ye diyanye baara fisamanba ye an be se ka min kɛ?

7. Mun na a kɔrɔtalen be an k’an yɛrɛ labila ka dɛmɛ kɛ bi kɔni?