Yala waajulikɛyɔrɔ b’i fɛ i tɔgɔ la wa?

¹ Tɔgɔla waajulikɛyɔrɔ ye kiin yɔrɔ dɔ ye, min dira i ma. N’a sɔrɔ a yɔrɔ man jan i la, i be se ka se yen joona walisa ka waajuli kɛ i kelen, wala ni mɔgɔ wɛrɛ ye. Nafa b’a la k’an seko kɛ ka tugu kafo ka labɛnw kɔ ani ka waajuli kɛ ni jɛnkulu ye. Nka ni yɔrɔ dɔ b’i fɛ i tɔgɔ la waajuli kama wagati wɛrɛ la, o be se k’i dɛmɛ ka seereya di bɛrɛbɛrɛ sanko ni kafo ka kiinw ka ca.—Kɛw. 10:42.

² A nafaw: Dɔw y’a ye ko nafa wɛrɛ b’a la ka waajuli kɛ u tɔgɔla yɔrɔ la u ka baarakɛyɔrɔ gɛrɛ fɛ. U b’o kɛ lafiya tuma na tile fɛ, wala baara jiginen kɔ kelen. A ka di dɔ wɛrɛw ye ka baara kɛ n’u ka denbaya ye u sigida la, lɛri kelen ɲɔgɔn kɔnɔ ka kɔn kafo ka kitabukalan ɲɛ. Viziti kuraw ni bibulukalan minw sɔrɔla, u kɛra u sigida la. O la, dɔ bɔra jijali kɛli ni wagati ni musakaw la. Baara caaman be se ka kɛ wagati fitinin kɔnɔ. O la, tɔgɔla waajulikɛyɔrɔ be se ka dɔw dɛmɛ ka kɛ piyɔniye kɔrɔsigiw ye tuma kelen-kelen, wala k’u sen don yɛrɛ kudayi piyɔniye baara la. Ka fara o kan, an kɛtɔ ka baara kɛ an tɔgɔla waajulikɛyɔrɔ la, ani ka deli mɔgɔw la, u be la an na. O be se k’an dɛmɛ ka kibaro duman fɔcogo yɛlɛma ka kɛɲɛ n’u ɲɛnakow ye. O la, an ka cidenya baara be sanga sɔrɔ bɛrɛbɛrɛ.

³ Kafokulu kɔrɔsibaga dɔ ye piyɔniye dɔ jija a ka waajulikɛ-yɔrɔ ɲini a yɛrɛ tɔgɔ la. O balimamuso b’a lakali ko: “Ne tugura o ladili kɔ. A ma mɛɛn, ne ye o kiin mɔgɔw lɔn ka ɲɛ, ani teriya donna an cɛ. Ne ye n’ ka wagati yɛlɛma ka taga bɔ u ye u yɛrɛ ɲɛnawagati la. O sababu fɛ, ne ka viziti kura daa yɛlɛla ka ta 35 ma ka se 80 ma kalo la. Ani, ne be bibulukalan 7 kɛ ni mɔgɔw ye.”

⁴ A sɔrɔcogo: N’i be i tɔgɔla waajulikɛyɔrɔ fɛ, i k’i ɲɛsin balimacɛ ma min b’o koo ɲɛnabɔ. I kana sigasiga ka weleweledala wɛrɛ weele ka na baara kɛ n’i ye. Mɔgɔ minw tɛ u ka soo, i k’olu ka soo ladɛrɛsi ta. I ka kan k’a ɲini k’o kiin ban kalo naani kɔnɔ. N’i tɛ se, i ka dɛmɛ ɲini kitabukalan kɔrɔsibaga fɛ wala mɔgɔ wɛrɛw fɛ. Kalo naani laban na, i be se k’o kiin kɔsegi n’a banna, wala i be se k’a ɲini ka baara kɛ a kɔnɔ tugun. Nka, i man kan k’a mara kudayi. I ka kan k’a kɔsegi walisa dɔ wɛrɛw k’a deli. Ni kafo ka kiinw man ca, ani i tɛ se k’i tɔgɔla waajulikɛyɔrɔ sɔrɔ, n’a sɔrɔ i be se ka kiin tilan fitinin dɔ deli kitabukalan kɔrɔsibaga fɛ.

⁵ Cii min dira an ma ka waajuli kɛ “diɲɛ yɔrɔw bɛɛ la” o ye baaraba ye dɛ! (Mat. 24:14). A tɛ ɲɛ labɛnko ɲuman kɔ. Ka fara an ka baara kan ni jɛnkulu ye, n’an be waajuli kɛ an tɔgɔla yɔrɔ dɔ la, o be se k’an dɛmɛ ka kibaro duman lase mɔgɔ caamanba ma.

[Study Questions]

1. Tɔgɔla waajulikɛyɔrɔ ye mun ye?

2. Nafa jumanw b’a la ka kɛ n’i tɔgɔla waajulikɛyɔrɔ ye?

3. Piyɔniye dɔ ye a tɔgɔla waajulikɛyɔrɔ deli ka mun lo sɔrɔ o la?

4. An be se k’an tɔgɔla waajulikɛyɔrɔ sɔrɔ ani ka baara kɛ a kɔnɔ cogo di?

5. Cii min dira an ma ka waajuli kɛ, o tɛ ɲɛ mun kɔ?