N’i ye waajulikɛyɔrɔ dɔ minɛ i tɔgɔ la, o tɛna i nafa wa?

1. Tɔgɔla waajulikɛyɔrɔ ye mun ye?

¹ Tɔgɔla waajulikɛyɔrɔ ye mun ye? Kiin yɔrɔ dɔ lo mɔgɔ be se ka min minɛ a yɛrɛ tɔgɔ la ni kafo ka kiinw ka ca. O be se ka kɛ a tigi ka soo gɛrɛfɛ. Gafe Organisés ɲɛɛ 103 b’a ɲɛfɔ ko: “Ni waajulikɛyɔrɔ dɔ b’i fɛ i tɔgɔ la i ka soo gɛrɛfɛ, o bena i dɛmɛ k’i ka wagati kɛ waajuli la bɛrɛbɛrɛ. Ka fara o kan, i be se ka balima dɔ weele a bena fara i kan ka waajuli kɛ o yɔrɔ la.”

2. An bɛɛ ka kan ka waajuli kɛ ni jɛnkulu ye. Ka fara o kan, dɔw ye labɛn juman lo kɛ?

² A t’i bali ka waajuli kɛ ni jɛnkulu ye: N’i ye waajulikɛyɔrɔ dɔ sɔrɔ i ka baarakɛyɔrɔ gɛrɛfɛ, i be se ka waajuli kɛ yen lafiɲɛ tuma na tile fɛ, wala sanni i ka taga soo. Balima wɛrɛ be se ka fara i kan n’a be baara kɛ o yɔrɔ gɛrɛfɛ. N’i ye waajulikɛyɔrɔ dɔ sɔrɔ i ka soo gɛrɛfɛ, e n’i ka denbayamɔgɔw be se ka waajuli kɛ yen tile benni kɔ. Hali n’i tɛ taga waajulibaara lajɛn na, a ka ɲi i ka Jehova deli ka sɔrɔ ka waajuli daminɛ (Fil. 4:6). I be wagati min kɛ i tɔgɔla waajulikɛyɔrɔ la, o man kan k’i bali pewu ka tugu kafo ka labɛnw kɔ ani ka waajuli kɛ ni jɛnkulu ye. Wikɛniw kɔni na, mɔgɔ caaman be na waajulibaara lajɛn na. A ka fisa i ka waajuli kɛ n’i ka jɛnkulu ye o wagatiw la.

3. Ka waajulikɛyɔrɔ dɔ minɛ i tɔgɔ la, nafa juman lo b’a la?

³ Nafa minw b’a la: Ni waajulikɛyɔrɔ dɔ b’i fɛ i tɔgɔ la, i be se ka waajuli kɛ o yɔrɔ la n’i bolo labilanin lo. I be se ka wagati caaman sɔrɔ ka waajuli kɛ ani i tɛna tagamajan kɛ. O be sababu di dɔw ma ka kɛ piyɔniye kɔrɔsigi wala kudayi piyɔniye ye. Komi makodon mɔgɔw bɛɛ be kiin kelen kɔnɔ, a ka nɔgɔ ka vizitiw kɛ ani ka bibulukalanw kɛ n’u ye. Balima caaman y’a kɔrɔsi ko ni waajulikɛyɔrɔ dɔ b’i fɛ i tɔgɔ la, a b’i dɛmɛ ka kiinmɔgɔw lɔn ka ɲɛ. O la, u be la i la, sanko n’a y’a sɔrɔ i tɛmɛna u fɛ siɲɛ caaman na ka sɔrɔ k’o kiin karti kɔsegi kafo ma walisa balima wɛrɛw ka se k’a deli. N’i ye waajulikɛyɔrɔ dɔ minɛ i tɔgɔ la, yala o tɛna e n’i ka denbaya dɛmɛ k’aw ka cidenya baara dafa bɛrɛbɛrɛ wa?—2 Tim. 4:5.