Ni mɔgɔw tɛ yen u ka soo
1 Yɔrɔ caaman na, mɔgɔw sɔrɔko be gwɛlɛyara ka taga u ka soo. Nin “waati gɛlɛnw” na, mɔgɔ caaman waajibiyalen be ka baara kɛ lɛri caaman kɔnɔ walisa k’u ka balo dɔrɔn sɔrɔ (2 Tim. 3:1). Dɔw be bɔ u ka soo walisa ka taga sanni kɛ, wala ka taga ɲɛnagwɛ la. An be se ka kibaro duman lase o ɲɔgɔnna mɔgɔw ma cogo di?
2 An ka kunnafoniw sɛbɛ koɲuman: Fɔlɔ, mɔgɔw tɛ yen soo minw kɔnɔ an k’o sɛbɛ. A kɔrɔtalen be kosɔbɛ sanko n’i ka teli ka baara kɛ i ka kiinw kɔnɔ. Yala i be deli ka kunnafoni ninw sɛbɛ a kan wa: siraw tɔgɔw, waajulikɛyɔrɔ karti ka nimɔrɔ, i tɔgɔ, ani i tɛmɛlon. I be se ka sɛbɛri kɛyɔrɔ dɔ to yen walisa ile yɛrɛ wala mɔgɔ wɛrɛ ka se ka kunnafoni wɛrɛw fara a kan ni aw segira ka na waajuli kɛ o soow kɔnɔ yɔrɔ min na mɔgɔw tun ma sɔrɔ fɔlɔ la. Wagati min latigɛra ka baara kɛ o kiin kɔnɔ, n’o banna i k’i hakili to k’i ka kunnafoniw di balima ma, kiin karti be min bolo, fɔɔ n’ale sɔnna ko i ka segi ka taga soow kɔnɔ yɔrɔ minw na mɔgɔw tun tɛ yen. I ye viziti kura minw sɔrɔ, i k’olu sɛbɛ daan na.
3 A ɲini ka segi ka na wagati wɛrɛ la: Minw tun tɛ yen u ka soo baarakɛlonw na, n’a sɔrɔ u bena kɛ yen wula fɛ wala samedi ni dimansi. Yala i be se ka labɛn kɛ ka segi ka na wagati bɛnnen na wa (1 Kɔr. 10:24)? N’o tɛ, i k’o kunnafoniw di weleweledala dɔ ma min be se ka segi ka taga wagati wɛrɛ la. Wala i be se ka lɛtɛrɛ ci o mɔgɔw ma minw tun tɛ yen u ka soo. I fana be se ka telefɔni ci u ma. Weleweledala minw tɛ se ka bɛrɛ kɛ soo ni soo baara la kɛnɛyako kosɔn, a be se ka diya olu ye k’i dɛmɛ o fan fɛ.
4 Ɲɛyirali dɔ filɛ min b’a yira ko a kɔrɔtalen be an k’a ɲini ka kaan bɔ mɔgɔw ye minw tun tɛ yen u ka soo. Weleweledalaw segira ka taga daa dɔ kɔkɔ siɲɛ caaman na fɔɔ saan saba kɔnɔ. A laban, u ye muso dɔ sɔrɔ yen. O y’a sɔrɔ o muso tun ye Bibulu kalan kɛ ka tɛmɛ sanni a ka yɛlɛma yen, ani a tun be kɔnɔni kɛra Seere dɔ ka na kalan kɛ n’ale ye tugun.
5 An ka waajuli kɛ kiin kɔnɔ k’a dafa: Tuma juman na an be se k’a jati ko waajuli kɛra ka dafa kiin dɔ kɔnɔ? Tuma caaman na, o ye n’an y’an seko kɛ k’a ɲini ka mɔgɔ dɔ sɔrɔ soo kelen-kelen kɔnɔ. Ni mɔgɔ tɛ yen boon dɔw kɔnɔ, an be se ka sɛbɛnin dɔ wala zurunali kɔrɔman dɔ don nɛmɛnɛmɛ daa jukɔrɔ, sanko ni waajuli man teli ka kɛ o kiin kɔnɔ. O kiin ka kan ka waaju ka ban kalo naani kɔnɔ. O kɔ, balimacɛ min be kiin koow ɲɛnabɔ, a ka kan k’a sɛbɛ k’a yira loon min na kiin waajura ka dafa.
6 An b’a fɛ mɔgɔ caaman ka cogoya sɔrɔ ka Jehova tɔgɔ weele ani ka kisili sɔrɔ (Rom. 10:13, 14). O ɲɛsinna fana mɔgɔw ma minw tun tɛ yen u ka soo an tɛmɛtɔ soo ni soo. I ko ciden Pol y’a kɛ cogo min na, i k’a ɲini ka “Ala ka nɛɛma Kibaru Duman fɔ” k’a dafa.—Kɛw. 20:24.
[Study Questions]
1. An be deli ka gwɛlɛya juman sɔrɔ waajuli kɛtɔ soo ni soo?
2. An be se ka mun lo kɛ walisa kibaro duman ka se mɔgɔw ma minw tun tɛ yen u ka soo?
3. Ladili jumanw dira minw b’an dɛmɛ ka kibaro duman lase mɔgɔw ma minw tun tɛ yen u ka soo?
4. Mun lo b’a yira ko a kɔrɔtalen be an ka segi ka taga bɔ mɔgɔw ye minw tun tɛ u ka soo?
5. Tuma juman na an be se k’a jati ko kiin waajura ka dafa?
6. Mun na an ka kan k’a ɲini ka kibaro duman lase mɔgɔ bɛɛ kelen-kelen ma an ka kiinw kɔnɔ?