Yala i labɛnnen be balawo kama wa?

¹ Saan o saan, dugukolo-yɛrɛyɛrɛw, tsunami, tiɲɛnikɛ sanji, folonkotobaw, san-fɔɲɔbabaw ani walankata be kɛ ka mɔgɔ miliyɔn caaman sɔrɔ duniɲa kɔnɔ, hali an balima caaman fana. Komi balawow be bari ka cun mɔgɔw kan, ani u be se k’an kelen-kelen bɛɛ sɔrɔ, an ka ɲi ka hakili sɔrɔ ka kɔn k’an yɛrɛ labɛn.—Ntal. 21:5.

² An ka kɔn a ma: Tuma dɔw la, faamanw be se ka mɔgɔw lasɔmi ko balawo dɔ bena cun yanni dɔɔni cɛ. A kɔrɔtalen be an k’an janto o lasɔminiw na (Ntal. 22:3). O ɲɔgɔnna koow la, diinan mɔgɔkɔrɔw ka kan k’a ɲini ka kaan bɔ kafo mɔgɔw bɛɛ ma walisa k’u dɛmɛ u k’u yɛrɛ labɛn o koo kama. Balawo tɛmɛnen kɔ, u fana ka kan k’u jija k’u bɛɛ yɔrɔ filɛ n’u tɛ farati la ani n’u mako tɛ dɛmɛ la. A be se ka kɛ wagati nafaman tiɲɛni ye ni kafodenw ka ladɛrɛsiw n’u ka telefɔni nimɔrɔ kuraw tɛ diinan mɔgɔkɔrɔw fɛ. O kama, weleweledalaw ka ɲi k’a to sekeretɛri n’u ka kitabukalan kɔrɔsibaga be u ka ladɛrɛsi n’u ka telefɔni nimɔrɔ kura(w) lɔn.

³ Ni kafo sigilen be faratiyɔrɔ dɔ la, diinan mɔgɔkɔrɔw be se k’a ɲini weleweledalaw fɛ u k’u somɔgɔ wala u teri dɔ tɔgɔ fɔ k’a ka telefɔni nimɔrɔ di: o ka kɛ mɔgɔ ye min sigilen tɛ kafo mara la, ani u ka kan ka ɲɛsin min ma ni kɔrɔtɔko dɔ kɛra. O la, kafo mɔgɔ minw wulila ka bɔ yen, diinan mɔgɔkɔrɔw bena u tagayɔrɔ lɔn. Diinan mɔgɔkɔrɔw fana be se ka labɛn dɔ sigi sen kan k’a yira kafo ka kan ka min kɛ ni kɔrɔtɔko dɔ kɛra: i n’a fɔ makofɛn gwɛlɛn minw ka ɲi ka sɔrɔ bɛɛ bolo kɔrɔ, mɔgɔw bena wuli ka bɔ yen cogo min na, ani fɛɛrɛ minw bena kɛ ka dɔw dɛmɛ minw cogoya be dan na. A kɔrɔtalen be an ka tugu o labɛnw kɔ, minw kɛra ni kanuya ye.—Heb. 13:17.

⁴ Balawo tɛmɛnen kɔ: Ni balawo dɔ cunna aw ka yɔrɔ kan, i ka kan ka mun kɛ? I janto k’a filɛ n’i ka denbaya mako gwɛlɛnw wasara farikolo ta fan fɛ. Ni see b’i ye, i ka dɛmɛ lase mɔgɔ wɛrɛw ma fana. I jija k’i ka kitabukalan kɔrɔsibaga wala diinan mɔgɔkɔrɔ wɛrɛ sɛgɛrɛ joona-joona. I k’o kɛ hali n’i tɛ farati la ani i mako tɛ dɛmɛ la. N’i mako be dɛmɛ la, i ka la a la ko i balimaw b’u seko bɛɛ kɛra walisa k’i dɛmɛ (1 Kɔr. 13:4, 7). I hakili to a la ko Jehova b’i cogoya kala ma. I bolo la a kan walisa a k’i dɛmɛ (Zab. 37:39; 62:9). I ka sababu bɛɛ ɲini ka mɔgɔ wɛrɛw dɛmɛ Alako ni dusukunnata fan fɛ (2 Kɔr. 1:3, 4). I ka segi k’i ka delinankow kɛ joona-joona Alako ta fan fɛ.—Mat. 6:33.

⁵ Balawo ɲɛsiran be hami bila duniɲa mɔgɔw la. Nka an kɔni be se ka siniɲasigi filɛ ni jigiya ye. Yanni dɔɔni, balawo si tɛna kɛ yen tugun (Jir. 21:4). Nka sanni o ka kɛ, an be se ka labɛn kɛɲɛnen kɛ ka kɔn ɲagamini wagati gwɛlɛnw ɲɛ. Ani, an ka to ka kisɛya ka kibaro duman fɔ mɔgɔw ye.

[Study Questions]

1. Mun na an ka ɲi ka ceguya k’an yɛrɛ labɛn balawow kama?

2. Mun na an ka ɲi k’an ka ladɛrɛsi n’an ka telefɔni nimɔrɔ kura(w) di diinan mɔgɔkɔrɔw ma?

3. N’an sigilen be faratiyɔrɔ dɔ la, an be se ka jɛn ka koow kɛ ni diinan mɔgɔkɔrɔw ye cogo di?

4. Ni balawo cunna an ka yɔrɔ kan, an ka kan ka mun lo kɛ?

5. Balawo ɲɛsiranya be mun kɛ an kerecɛnw la?