Yala aw labɛnnen lo hakilimaya domuni kama wa?
1. Fɛti domuni labɛnko tɛ ɲɛ mun lo kɔ?
1 Fɛti domuni tobili be na ni baara caaman ye. Domunifɛnw ka kan ka san, k’u tobi ka ɲɛ ani k’u bila cogo dɔ la tabali kan walisa u yecogo ka diya mɔgɔw ye. Domuni tilancogo ka kan ka ɲɛ. Ka fara o kan, domuni kɛyɔrɔ ka kan ka labɛn. Minw weelela o domuni na, olu fana ka kan k’u yɛrɛ labɛn, sanko n’u ka kan ka tagama jan kɛ. Nka tɔnɔ be o sɛgɛn bɛɛ la sabu o be kɛ sababu ye teriw ni denbaya mɔgɔw ka domuni diiman diya bɔ ɲɔgɔn fɛ. Yanni dɔɔni, Jehova Seerew bena lajɛn duniɲa kuru bɛɛ kɔnɔ, jɛnkulubaw wala jɛnkuluninw, walisa ka hakilimaya domuniba diya bɔ, u tun be min makɔnɔna ni kɔrɔtɔ ye. O bena kɛ tile saba lajɛnba la min kuun ko: “A’ ye to ɲɛɛ na.” Baara caaman kɛra ka ban kalanw ni koɲɛ wɛrɛw labɛnni koo la. An bɛɛ weelela o lajɛnba la. Walisa an ka kɛ yen ani ka nafa sɔrɔ o la bɛrɛbɛrɛ, an kelen-kelen bɛɛ ka kan k’an yɛrɛ labɛn fana.—Ntal. 21:5.
2. An ka kan ka mun lo kɛ walisa ka nafa sɔrɔ an ka hakilimaya domuni na tile saba bɛɛ kɔnɔ?
2 A’ y’a ɲini ka nafa sɔrɔ o la bɛrɛbɛrɛ: Yala i ye i yɛrɛ labɛn walisa ka nafa sɔrɔ lajɛnba ka kalanw bɛɛ la wa? N’i ka kan ka sira deli i ka patɔrɔn fɛ, i k’o kɛ walisa i ka kɛ tile saba ka kalanw bɛɛ la, ka ta loon fɔlɔ ta ma. Yala i ye koow bɛɛ labɛn taransipɔriko ni sibon kama wa? Diinan mɔgɔkɔrɔw ka kan k’a filɛ ni mɔgɔkɔrɔbaw, namaraw ani o ɲɔgɔnna mɔgɔw ye dɛmɛ sɔrɔ.—Jer. 23:4; Gal. 6:10.
3. Lajɛnba minw latigɛra jamana caaman kama, mun na an man kan ka taga yen n’u ma an weele?
3 Lajɛnba dɔw labɛnna jamana caaman kama yɔrɔ dɔw la. A’ y’a to aw hakili la ko kafo tigitigi dɔw ani jamana wɛrɛ kafoden dɔw lo weelela o lajɛnbaw la. O labɛnw kɛtɔ, Betɛli ye jatiminɛ kɛ kosɔbɛ k’a filɛ mɔgɔ hakɛ min be se ka weele ka kɛɲɛ ni sigiyɔrɔw hakɛ ani lotɛliw ka sibon hakɛ ye. Jama be se ka caya k’a dama tɛmɛ ni weleweledala dɔw b’a latigɛ ka taga o lajɛnba dɔw la k’a sɔrɔ u ma weele yen.
4. Loon o loon, sanni kalan ka daminɛ, an be se k’an yɛrɛ labɛn cogo di?
4 Loon o loon, i k’i yɛrɛ labɛn ka se lajɛnba la joona walisa ka sigiyɔrɔ sɔrɔ sanni kalan ka daminɛ. I ka miniti damanin ta ka porogramu lajɛ sanni kalan ka daminɛ. O bena i dɛmɛ i k’i dusukun labɛn kalan kama (Esd. 7:10). Kalankɛla ɲɛbila mana a fɔ ko fɔlikan bena daminɛ, i k’o fɔlikan lamɛn ni dusudiya ye ani i k’i labɛn dɔnkili ni delili kama.
5. Denbayaw be se ka nafa bɛrɛbɛrɛ sɔrɔ kalan na cogo di?
5 Ni bangebagaw n’u deenw be sigi ɲɔgɔn gɛrɛ fɛ, u bena u dɛmɛ k’a filɛ n’u deenw be lamɛnni kɛ koɲuman (Dut. 31:12). A ɲininen be an bɛɛ fɛ an ka tugu vɛrisew kalan kɔ an ka Bibulu kɔnɔ. N’i be hakilinata jɔnjɔnw sɛbɛ, o be se k’i dɛmɛ i k’i tulo malɔ ka kalan lamɛn. O bena i dɛmɛ i k’i hakili jigi kalanw ka hakilinata jɔnjɔnw la kɔfɛ. Kalan tuma na, kana sɔn ka baro kɛ wala ka yaala-yaala gwansan. Ni telefɔni selilɛri b’i fɛ, kana a to a ka e ni mɔgɔ wɛrɛw bali lamɛnni ma. Loon o loon ka kalan banni kɔ, a yɔrɔ minw diyara i ye, mun na i tɛ baro kɛ o kan ni mɔgɔ wɛrɛ ye?
6. An ka lajɛnbaw fanba dɔ ye mun ye ani an be se ka nafa bɛrɛbɛrɛ sɔrɔ o la cogo di?
6 Tile saba lajɛnbaw be sababu di an ma ka jɛnɲɔgɔnya teriman kɛ n’an balimaw ye, o ɲɔgɔn tɛ yen duniɲa nin kɔnɔ (Zab. 133:1-3; Marka 10:29, 30). Mun na i t’a bɔ i yɛrɛ la ka baro daminɛ n’i gɛrɛ fɛ mɔgɔw ye tilera domuni wagati la? O lo kama, tɔnɔ b’a la an ka na ni domunifɛn dɔ ye min man gwili sanni an ka taga domuni yaala kɛnɛma. An kana fɔn o ɲɔgɔn-jijali la.—Rom. 1:11, 12.
7. An ka kan k’an janto mun lo la fani doncogo ta fan fɛ?
7 An ka fani doncogo: An k’a kɔrɔsi ko Jehova tun y’a fɔ Israɛldenw ye ko u ka busan bulaman dilan u ka faniw dagolow sanfɛ (Nɔmb. 15:37-41). O tun be u hakili jigi ko u bilara dan na Jehova batoli kama. Bi, n’an be faniw don ni majigilenya ni danbe ye, o b’an kɛ dan na ni duniɲa mɔgɔw ye. O be kɛ seereya barikaman ye an filɛbagaw fɛ, hali domuni san yɔrɔw la wula fɛ kalan banni kɔ. O kama, i ka miiri kosɔbɛ k’a filɛ i bena fani min don.
8. An be se ka seereya di mɔgɔw ma cogo di lajɛnba dugu kɔnɔ?
8 An ka seereya di mɔgɔw ma: An bena se ka seereya di mɔgɔw ma lajɛnba dugu la n’an be kɔn ka miiri o koo la. Kalan banni kɔ, balimacɛ dɔ n’a muso tagara ɛrɛsitoran na. A ye lajɛnba tagamasiɲɛ yira baaraden dɔ la ani a y’a ɲininga dɔrɔn ko: “Yala i ye tagamasiɲɛ nin kɔrɔsi mɔgɔ caaman ka faniw kan wa?” Baaraden y’a jaabi ko a kɔni y’o kɔrɔsi nka a m’a lɔn fɛɛn min kama lo. O kɛra sababu ye baro daminɛna, ani balimacɛ y’a weele a ka na lajɛnba la.
9. An be se k’a yira cogo di ko an be an weelebaga Jehova waleɲuman lɔn?
9 Hali n’an balimacɛw lo be kalanw ni ɲɛyiraliw ani fɛtaw ɲiningaliw bɛɛ kɛ, an sankolola Faa Jehova lo be o hakilimaya domuniba di an ma ni kanuya ye saan o saan (Es. 65:13, 14). Ale min b’an weele o hakilimaya domuniba la, an b’a yira ko an b’a waleɲuman lɔn n’an be na loon bɛɛ ani an tɛ fɔn o domuni yɔrɔ fitinin si la. Yala i labɛnnen lo wa?
[Box on page 3]
Tile saba lajɛnba hakilijigi koow
◼ Porogramu lɛriw: Loon saba bɛɛ, kalan bena to ka daminɛ 9H20. Bondaw bena yɛlɛ sɔgɔma 8H00. A mana fɔ ko fɔlikan bena daminɛ, an bɛɛ ka kan k’an sigi walisa kalan ka daminɛ cogo bɛnnen na. Juman loon ni samedi loon, kalan bena ban 4H55. Dimansi loon, a bena ban 4H00. Lajɛnba minw latigɛra jamana caaman kama, olu ka kalan bena daminɛ lamisalon 1H20 ani a bena ban 4H45.
◼ Bolifɛnw bilayɔrɔ: Lajɛnbaw kɛyɔrɔ minw bɛɛ la u be mɔgɔw ka bolifɛnw mara k’u tanga, wari tɛna minɛ u bolo. Bolifɛn bilayɔrɔ bena di mɔgɔw ma ka kɛɲɛ n’u nawagati lo ye. Komi bolifɛnw bilayɔrɔ man boon kojugu, a ka fisa aw ka jɛn ni dɔw ye ka bolifɛn kelen ta n’o be se ka kɛ.
◼ Sigiyɔrɔ marali: Aw be bolifɛn kelen ta ni mɔgɔ minw ye, wala aw be soo kelen kɔnɔ ni minw ye, aw be se ka sigiyɔrɔw mara olu dɔrɔn lo ye.
◼ Tilera domuni: A’ ye na ni aw ka tilera domuni ye aw bolo sanni aw ka bɔ ka taga a yaala kɛnɛma. Aw be se ka aw ka domuni mara minan fitinin dɔ kɔnɔ min be se ka bila sigilan jukɔrɔ. Minanba minw kɛra mɔgɔ caaman ka domuni marafɛn ye ani butelifɛnw ma daga lajɛnba yɔrɔ la.
◼ Niliw: An be se k’an ka waleɲumanlɔn yira lajɛnba ka labɛnw koo la an kɛtɔ ka nili kɛ duniɲa kuru bɛɛ baara kama. An be se k’o nili kɛ Masaya Boon kɔnɔ wala lajɛnba la. Minw be tɛmɛ sɛkiw fɛ ka nili kɛ lajɛnba la, u ka kan k’o sɛkiw kɛ jamana ka tɔnbolo tɔgɔ la. Ɲɛyirali fɛ, Burkina Faso, sɛkiw ka kan ka kɛ “ Association Les Témoins de Jéhovah du Burkina Faso ” tɔgɔ la.
◼ Kasaraw ni kɔrɔtɔkow: Ni kɛnɛyako dɔ barila k’i sɔrɔ lajɛnba yɔrɔ la, i k’i ɲɛsin mɔgɔ kunbɛnbaga dɔ ma i gɛrɛ fɛ. Ale bena sin k’a fɔ kasaraw ni banakow ɲɛnabɔbagaw ye. Olu bena a filɛ ni koo gwɛlɛ lo ani u bena i dɛmɛ.
◼ Kamera ni maɲetow: U sifa si man kan ka don lajɛnba boon ka kuranjuru dɔ la wala sono juru dɔ la. Ani, u man kan ka mɔgɔ wɛrɛw degun cogo si la.
◼ Denɲɛninw ka wotorow ani sigilan minw be kuru: An man kan ka na n’o ɲɔgɔnnaw ye lajɛnba yɔrɔ la. Nka denɲɛninw ka sigilan minw be se ka siri lajɛnba sigilanw kan bangebagaw gɛrɛfɛ, olu ɲɔgɔn dagalen lo.
◼ Parifɛnw: Lajɛnba dɔw be kɛ boonw kɔnɔ yɔrɔ minw na vantilatɛriw be mɔgɔw fiyɛ. O kama, an ka ɲumanya kɛ tɔɔw ye, an ka latikɔlɔ ni parifɛn farimanw koo dama kɛɲɛ walisa an kana gwɛlɛya dɔ lase mɔgɔw ma nɛnɛkiri bana wala a ɲɔgɔnna bana be minw na.—1 Kɔr. 10:24.
◼ Makodon mɔgɔw dɛmɛcogo: Lajɛnba tuma na, ni mɔgɔ dɔw sɔnna seereya ma koo dɔ sababu fɛ, an ka kan ka sɛbɛ Veuillez suivre l’intérêt (S-43) dafa ka kunnafoniw di o tigiw kan. Weleweledalaw ka kan ka na n’o sɛbɛ kelen wala fila ye u kun lajɛnba la. Aw mana o sɛbɛ dɔ dafa, a’ y’a di gafew ta yɔrɔ la lajɛnba la walisa olu k’a ɲɛnabɔ. Wala, a’ y’a di kafo ka sekeretɛri ma ni aw segira ka na aw ka kafo kɔnɔ.—A filɛ saan 2005, feburu ka An ka Masaya cidenyabaara kɔnɔ, a ɲɛɛ 6nan.
◼ Lotɛliw: (1) Aw kana lotɛli boon mara ka bila ni aw makoya tɛna kɛ a la. Mɔgɔ daa min ka kan ka la boon kelen kɔnɔ, aw kana o dama tɛmɛ. (2) Boon min marala aw ye, ni aw ka kan k’o lasa, a’ y’o fɔ lotɛli tigi ye joona. (3) Aw kana doni-ta-wotoro ta fɔɔ ni aw makoya sera a ma. Ani, a’ y’a segi a nɔɔ na joona walisa mɔgɔ wɛrɛ k’a mako ɲɛ n’a ye. (4) Aw kana tobili kɛ sibon kɔnɔ n’a dagalen tɛ. (5) Loon o loon, a’ ye wari dɔɔni di k’o kɛ kado ye aw ka sibon ladonbaga ma. (6) Lotɛli be domunifɛn dɔw di a ka lonanw ma u k’u domu lotɛli la, i n’a fɔ darakan, kafe ani galasi. Aw kana u ta k’a dama tɛmɛ. (7) Aw ka lotɛli baarakɛlaw minɛ ka kɛɲɛ ni hakili senu deen cogoya ye tuma bɛɛ. A ka di u ye aw ka koow kɛ ni ɲumanya, muɲuli ni sabari ye sabu u be baara la mɔgɔ caaman kosɔn. (8) Lotɛli minw tɔgɔ sɛbɛra lisi kan, olu ka sibonw sɔngɔ ye suu kelen ta ye, lanpo ma fara a kan. N’u b’a ɲini aw fɛ aw ka wari dɔ fara o kan, wala n’u be u ka baara sɔngɔ caya kojugu, aw kana o sara. A’ ye lajɛnba ka sibon koo ɲɛnabɔlaw jɛnkulu lalɔnniya o koo la joona. (9) Ni aw ye gwɛlɛya dɔ sɔrɔ aw ka sibon koo la lotɛli kɔnɔ, aw kana ɲinɛ k’a ɲɛfɔ sibon koo ɲɛnabɔlaw jɛnkulu ye lajɛnba yɔrɔ la.
◼ Siyɔrɔ wɛrɛw: Ni aw ye sibon sɔrɔ yɔrɔ o yɔrɔ, aw ka koow kɛ ni ɲumanya ni kanuya ye, ani aw ka aw janto mɔgɔw la. Ni mɔgɔ dɔ lo ye jatigiya di aw ma a ka soo, a’ ye aw seko kɛ k’a tigi dɛmɛ ka soo kɔnɔ baaraw kɛ ani ka musakaw sara. Aw tagalon na, a’ ye aw janto k’a filɛ ni aw ka sibon saniyalen lo ani a ladonnen lo.