An ninsɔn ka di k’an yɛrɛ di Jehova ka baara la!
1 Ciden Pol ninsɔn tun ka di k’a ‘yɛrɛ bɛɛ di’ walisa k’a ka kerecɛn baara dafa (2 Kɔr. 12:15). O cogo kelen na bi, kerecɛn caaman b’u jija piyɔniye baara la. Dɔ wɛrɛw ka kunkanbaaraw ka bon gwa kɔnɔ, ani u bolo degunnen lo. Nka u be wagati kunmabɔ ka cidenya baara kɛ lɔgɔkun o lɔgɔkun. Kɛnɛyako gwɛlɛnw be dɔw kan. Nka fanga fitinin min b’u la, u b’o kɛ ka Masayakow yiriwa. Jehova sagokɛlaw sanda n’u ka koow cogoya ka kɛ min o min ye, u b’u yɛrɛ di a ka baara la. O be dusu don an na dɛ!
2 An mɔgɔɲɔgɔn kanuya: An kɛtɔ k’an seko bɛɛ kɛ Jehova ka baara la, ani an kɛtɔ k’a yira ko an be Ala n’an mɔgɔɲɔgɔn kanu, an be dusukun gwɛnen sɔrɔ. Komi Pol y’a yɛrɛ bɛɛ di ka kibaro diiman lase mɔgɔw ma, a tun be se k’a fɔ ni ninsɔndiya ye ko: “O de y’a to ne b’a fɔ k’a jɛya bi, ko mɔgɔ si joli hakɛ tɛ ne kan.” (Kɛw. 20:24, 26; 1 Tes. 2:8). N’an b’an seko damayira kɛ cidenya baara la, o bena a to an tɛna mɔgɔ joli hakɛ ta.—Ezek. 3:18-21.
3 An be hɛɛrɛ sɔrɔ an kɛtɔ k’an jija sɔbɛ la ka mɔgɔw dɛmɛ (Kɛw. 20:35). Balimacɛ dɔ y’a fɔ ko: “Ne mana tile ben Jehova ka baara la, ani ne segira ka taga soo, ne b’a ye ko n’ sɛgɛnnen be tiɲɛn na. Nka ne dusu ka di, ani ne be Jehova fo sabu a ye ɲagali di ne ma, mɔgɔ si tɛ se ka min bɔsi ne la.”
4 Ala kanu: Sababu fɔlɔ min b’a to an b’an yɛrɛ di Jehova ka baara la, o ye ko o ka di an sankolola Faa ye. Ala kanu b’an lasun k’a ka cikanw mara i na fɔ ka waajuli kɛ ani ka mɔgɔw kɛ Krista ka kalandenw ye (1 Yuh. 5:3). Hali ni mɔgɔw t’u mako don, wala n’u b’an kɛlɛ, an ɲagalilen be to ka baara kɛ kosɔbɛ Jehova ye.
5 Sisan tɛ wagati ye ka sumaya. An be sumantigɛ wagati lo la (Mat. 9:37). O wagati la, sɛnɛkɛla ka teli ka baara kɛ ka mɛɛn sabu a ka kan ka suman ladon wagati kunkurunin kɔnɔ sanni a ka daminɛ ka tiɲɛ. Wagati min tora ka suman tigɛ Alako ta fan fɛ, o fana ka dɔgɔ. An be wagati min na, an kɛtɔ k’an hakili to o la, an bɛɛ ka to k’an jija kosɔbɛ cidenya baara la.—Luka 13:24; 1 Kɔr. 7:29-31.