An k’an sendon a ɲɛɛ ma siman tigɛ baara la
1 Fɔlɔ la, Jehova ka ciraw ani Yesu yɛrɛ kumana ka taga mɔgɔw lajɛn baara dɔ koo kan (Esayi 56:8; Ezek. 34:11; Yuh. 10:16). Bi, Masaya kibaro duman waajuli min be kɛra duniɲa kuru bɛɛ kɔnɔ, o be o baara dafara (Mat. 24:14). Mɔgɔ minw be baara kɛ Ala ye, ani minw tɛ baara kɛ a ye, o faranfasi be gwɛra ka taga (Mal. 3:18). O kɔrɔ ye mun ye an fɛ?
2 An tɔgɔla kunkanbaara: An be se ka kalan ciden Pol ka ɲɛyirali fɛ. Ale tun y’a yɛrɛ di a ɲɛɛ ma ka kerecɛnya baara ɲɛminɛ ni barika ye. A tun y’a jate ko waajibi lo a ka waajuli kɛ walisa sira ka di mɔgɔ bɛɛ ma ka kibaro duman mɛn ani ka kisi. O y’a lasu ka timinandiya ka baara kɛ o mɔgɔw ka nafa kama (Rom. 1:14-17). Farati min be duniɲa kan, n’an b’o jate minɛ, yala o kunkanbaara ɲɔgɔnna belebeleba tɛ an kuun ka mɔgɔw waaju an sigida la wa? —1 Kɔr. 9:16.
3 Kɔrɔtɔ b’a la ka koow kɛ: Waajuli baara be se ka suman ni kisili baara dɔ ye. An ka kan ka mɔgɔw yɔrɔ ɲini ani k’u dɛmɛ ka na lafiya yɔrɔ la sanni wagati ka tɛmɛ. Wagati tɔɔ man ca, ani niin dɔw be farati la! A tɛ bari an na ni Yesu ye a ka kalandenw jija u ka “Sumantigi deli ko a ka baarakɛlaw ci ka taga a ka suman tigɛ.” —Mat. 9:38, A.B.U., 1987.
4 Komi Masaya baarakɛla caaman y’a faamu ko kɔrɔtɔ be bi ka wagati la, u ye dɔ fara u ka jijali kan kisili baara la. Hirohisa ye kamalen dɔ ye, min tun be balo n’a baden naani n’u bamuso dɔrɔn ye. Sumidi mana tɛmɛ lɛri saba, a tun be wili ka taga zurunaliw tilan tilan walisa k’a ka denbaya ka balo sɔrɔ. O bɛɛ n’a ta, Hirohisa tun b’a fɛ ka caaman kɛ waajuli baara la. O kama, a ye kudayi piyɔniye baara daminɛ. Nin ye baara ye min ɲɔgɔn tɛna segi ka kɛ tugun abada. Yala cogoyaw be aw fɛ ka aw sendon o baara la a ɲɛɛ ma wa?
5 “Wagati tɔɔ man ca.” (1 Kɔr. 7:29, NW ). O kama, an k’an seko bɛɛ kɛ o baara la, min nafa ɲɔgɔn tɛ yen dugukolo kan bi: Ka Masaya kibaro duman waajuli kɛ ani ka mɔgɔw kɛ kalandenw ye. Yesu ye o baara suman ni siman tigɛ baara ye (Mat. 9:35-38). N’an ye an sendon a ɲɛɛ ma o siman tigɛ la, an ka jijali bena den. Cogoya bena di an ma ka mɔgɔ dɔw dɛmɛ u ka kɛ Jehova batobagaw ye ka fara jamakuluba kan min kofɔra Jirali 7:9, 10 kɔnɔ.