Sumanw kɔgɔra, u tigɛtuma sera

1. Baaraba juman lo be sen kan?

¹ Yesu ye seereya kɛ Samarika muso dɔ ye, o kɔ a y’a fɔ a ka kalandenw ye ko: “Aw ka aw ɲɛw kɔrɔta ka forow filɛ. Suman kɔgɔra, a tigɛ tuma sera ka ban.” ( Yuh. 4:35, 36) Alako sumantigɛ dɔ tun be sen kan, ani Yesu tun b’a lɔn o baara kuntaga tun bena kɛ min ye duniɲa kuru bɛɛ kɔnɔ. Ka Yesu to sankolo la, a seen be hali bi o sumantigɛ la kosɔbɛ (Mat. 28:19, 20). K’a to o baara be sera a labanyɔrɔ la, mun lo b’a yira ko a be gwanna ka taga?

2. Mun lo b’a yira ko sumantigɛ baara be gwanna duniɲa kuru bɛɛ kɔnɔ?

² Sumantigɛ, duniɲa kuru bɛɛ kɔnɔ: Waajuli baara saan 2009 kɔnɔ, 3,2 % farala duniɲa kuru bɛɛ weleweledalaw hakɛ kan. Bali sigira an ka waajuli baara kan jamana minw kɔnɔ, 14% farala weleweledalaw hakɛ kan. Bibulukalan 7 619 000 ɲɔgɔn kɛra kalo o kalo. O ka ca ni weleweledalaw hakɛ ye, a yɛrɛ ka ca ni salon ka bibulukalanw hakɛ ye fɔɔ miliyɔn tilancɛ ɲɔgɔn. Komi o baara be jɛnsɛnna yɔrɔ caaman na, makoyaba be misɔndenw na minw ye fɔrɔmasɔn sɔrɔ Gilead lakɔli la. Jamana caaman na, kaan wɛrɛ fɔbaga caaman be sɔnna tiɲɛn koo la. A gwɛnen lo ko Jehova be baara teliyara sumantigɛ laban wagati la (Esayi 60:22). Yala aw be ni miiriya ɲuman ye aw ka kiinw koo la wa?

3. Balima dɔw be se ka mun lo miiri sumantigɛ koo la u ka kiinw kɔnɔ?

³ Sumantigɛ aw ka kiinw kɔnɔ: Mɔgɔ dɔw be se k’a fɔ ko “mɔgɔw tɛ sɔn tiɲɛn koo la ne ka kiin kɔnɔ.” Tiɲɛn lo, kiin dɔw kɔnɔ, a be komi tɔnɔ tɛ sɔrɔ an ka waajuli baara la i n’a fɔ a be sɔrɔ kiin wɛrɛw kɔnɔ cogo min na wala a tɛ komi fɔlɔ la. O kama, an balima dɔw be se k’a miiri ko sumantigɛ baara fanba nɔgɔyara o yɔrɔw la ani k’u ka baara daan ye ka fɛfɛli dɔrɔn kɛ. Yala o lo tiɲɛn na wa?

4. An ka kan ka kɛ ni miiriya juman ye an ka cidenya baara koo la ani mun na?

⁴ Sumantigɛ ye baara gwanniman ye k’a ta a daminɛ ma fɔɔ ka taga se a laban ma. A filɛ Yesu y’a yira cogo min na ko sumantigɛ ye kɔrɔtɔ baara ye: “Suman tigɛta ka ca, nka baarakɛlaw ka dɔgɔ. O de kosɔn aw ka Sumantigi deli ko a ka baarakɛlaw ci ka taa a ka suman tigɛ.” (Mat. 9:37, 38). Jehova min ye Sumantigi ye, ale lo b’a latigɛ tuma min na ani yɔrɔ min na suman ka kan ka tigɛ ( Yuh. 6:44; 1 Kɔr. 3:6-8). An ka baara ye mun lo ye? Bibulu b’an jaabi ko: “I ka i ka danni si dan kabini sɔgɔma da fɛ, i kana salaya wula da fɛ.” (Waaj. 11:4-6). Tiɲɛn na, ni sumantigɛ be gwanna tuma min na, o tɛ saliya wagati ye.

5. Mɔgɔw t’u mako don kiin minw na, mun na an ka kan ka to ka waajuli kɛ yen ni kisɛya ye?

⁵ An kana sumantigɛ dabila: Hali n’an b’an ka kiinw bɛɛ baara tuma o tuma ani a be komi mɔgɔ caaman t’u mako don, kuun b’a la an ka to ka baara kɛ ni kisɛya ani kɔrɔtɔ ye (2 Tim. 4:2). Koow be yɛlɛma-yɛlɛma duniɲa kɔnɔ. O b’a to mɔgɔw ka kɛcogo be yɛlɛma ani u be miiri sɔbɛ la siniko la. Ni denmisɛnw be kɔrɔbayara, u be se k’a ɲini ka lafiya ni hakilisigi sɔrɔ. An ka timinandiya be se ka nɔɔ to mɔgɔ wɛrɛw fana kan. Tiɲɛn na, mɔgɔ minw ma sɔn ka mɛnni kɛ fɔlɔ la u be se ka sɔn ka mɛnni kɛ loon nataw la. Hali minw be ban an ka kibaru la pewu-pewu, an ka kan k’u lasɔmi.—Ezek. 2:4, 5; 3:19.

6. Ni waajuli man nɔgɔ an ka kiinw kɔnɔ, mun lo be se k’an dɛmɛ an ka to ka waajuli kɛ ni kisɛya ye?

⁶ Ni waajuli man nɔgɔ an ka kiinw kɔnɔ, mun lo be se k’an dɛmɛ an ka to ka waajuli kɛ ni kisɛya ye? Ka fara soo ni soo waajuli kan, an be se ka cidenya baara faan dɔw kɛ i n’a fɔ ka waajuli kɛ jagokɛyɔrɔw la wala ka seereya kɛ telefɔni fɛ. An be se fana k’an ka kuma daminɛcogow yɛlɛma-yɛlɛma walisa ka se ka baro daminɛ ni mɔgɔw ye cogoya wɛrɛ la. An be se ka yɛlɛmani kɛ an ka porogramu na walisa ka se ka waajuli kɛ wulafɛ wala wagati minw na mɔgɔw be sɔrɔ u ka soo. An be se fana ka kaan wɛrɛ degi walisa ka kibaro duman lase mɔgɔ caaman ma. Kudayi piyɔniye baara be se k’an dɛmɛ ka dɔ fara an ka cidenya baara kan. An be se fana ka taga yɔrɔ wɛrɛw la, yɔrɔ minw na sumantigɛlaw man ca. N’an be sumantigɛ baara filɛ ni ɲɛɛ ɲuman ye, an bena an jija k’an seen don o baaraba la bɛrɛbɛrɛ.

7. An ka kan ka sumanw ladon fɔɔ wagati juman?

⁷ Sɛnɛkɛla ka kan k’a ka suman ladon wagati kunkurunin lo kɔnɔ, o la a tɛ sumaya o baara la fɔɔ a ka ban. O cogo kelen na, Alako sumantigɛ baara fana ka kan ka kɛ ni kɔrɔtɔ ye. An ka kan ka sumanw ladon fɔɔ wagati juman? “Fo nin diɲɛ ka ban.” (Mat. 24:14; 28:20). Jehova ye baara min kalifa an ma, an b’a fɛ k’o kɛ ka ban i ko a ka cidenw kuntigi y’a kɛ cogo min na ( Yuh. 4:34; 17:4). O kama, an ka to k’an ka cidenya baara kɛ ni kisɛya, ninsɔndiya ani miiriya ɲuman ye fɔɔ ka taga se a laban ma (Mat. 24:13). Sumantigɛ ma ban fɔlɔ!

[Ɲɛɛ 2nan ka koorilen]

Sumantigɛ ye baara gwanniman ye k’a ta a daminɛ ma fɔɔ ka taga se a laban ma