Yɛlɛmani minw b’an ɲagali La Tour de Garde koo la
1 Ɲinan saan daminɛ na, kafow ɲagalila ka kunnafoni dɔ sɔrɔ. A fɔra ko ka ta saan 2008, zanwiyekalo ma, La Tour de Garde sifa fila bena to ka bɔ: kelen bena kɛ jama ta ye, ani tɔɔ kelen bena kɛ anw, Jehova Seerew ta ye! N’a sɔrɔ i b’i yɛrɛ ɲininga ko: ‘Faranfasi juman bena kɛ u fila cɛ? Nafa juman b’a la u ka kɛ dan na dan na? Yala fɛɛn kura dɔ bena sɔrɔ u la wa?’
2 Faranfasi minw b’u cɛ: Min bena to ka bɔ kalo tile fɔlɔ la, ale bena labɛn jama kama. A ka barokunw bɛɛ bena labɛn jama ka nafa kama. Tɔɔ kelen min bena to ka bɔ kalo tile 15nan na, ale bena labɛn kafo kama. An tɛna ale yira mɔgɔw la waajuli la. A kɔnɔ, an bena barokunw sɔrɔ minw bɛɛ bena kalan kalo kelen kɔnɔ. Barokun wɛrɛw fana bena sɔrɔ a kɔnɔ ka ɲɛsin tigitigi kerecɛnw ma minw ye u yɛrɛkun di Ala ma. La Tour de Garde min bena labɛn jama kama, a bena diya Jehova Seerew fana ye. Nka a kɔni bena diya mɔgɔw ye minw tɛ Seerew ye, ani n’a sɔrɔ u lanen be Bibulu la. Faan wɛrɛ fɛ, Réveillez-vous ! bena to ka ɲɛsin mɔgɔ sifa caaman ma, hali minw be sigasiga Ala koo la, ani minw tɛ kerecɛn diinan dɔ kɔnɔ.
3 Tɔnɔ minw b’a la: La Tour de Garde min ɲɛsinna kafo ma, ale kɔnɔ, a tɛna kɛ waajibiko ye tugun ka kumaden dɔw ɲɛfɔ (i n’a fɔ “piyɔniye”) walisa kɛnɛma-mɔgɔw ka u faamu. Kunnafoni jɔnjɔn dɔ be se ka sɔrɔ fana a kɔnɔ ka ɲɛsin tigitigi Jehova Seerew ma ani Bibulu kalandenw ma minw be ɲɛtaga kɛra Alako ta fan fɛ. Nka La Tour de Garde min labɛnna jama kama do? Komi ale ka barokunw n’u sɛbɛcogo bena ɲɛsin jama ma, a kalan kuru bɛɛ ka kan ka diya kɛnɛma-mɔgɔw ye. Tiɲɛn lo, Jehova Seere kelen-kelen bɛɛ bena nafa sɔrɔ o La Tour de Garde sifa fila kalan na. Komi an bena to ka La Tour de Garde kelen dɔrɔn kofɔ mɔgɔw ye ka fara Réveillez-vous ! kan kalo o kalo, an bena cogoya sɔrɔ k’u yiracogo fisaya kalo kuru bɛɛ kɔnɔ.
4 A kɔnɔfɛn kura dɔw: Fɛɛn kura diiman dɔw labɛnna La Tour de Gar-de kɔnɔ min ɲɛsinna jama ma. A bena to ka baro kɛ Bibulu ka kalan jɔnjɔnw kan cogo nɔgɔman-nɔgɔman na. Faan wɛrɛ fɛ, a bena to k’a yira cogo min na Bibulu be se ka denbayaw dɛmɛ. Bibulu kalan bena to ka labɛn a kɔnɔ denmisɛnw kama. O zurunali kelen-kelen kɔnɔ, barokun dɔ bena sɔrɔ min be bibulusen tigitigi dɔw bɔ kɛnɛ kan k’an kalan Jehova ka jogow koo la.
5 An be Jehova deli a k’o labɛn kura duga ka ɲɛsin La Tour de Garde ma. An b’a fɛ mɔgɔ sɔbɛ caaman ka kibaro duman sɔrɔ o zurunali ni Réveillez-vous ! sababu fɛ.—Mat. 10:11.