An ka zurunaliw labɛnna walisa u koo ka diya mɔgɔ sifa caaman ye
1. Jɔncɛ kantigiman hakiliman jɛnkulu be ciden Pol ladegi cogo di?
1 Ciden Pol tun b’a ka kibaro diiman fɔcogo yɛlɛma walisa ka se ka “mɔgɔ sifaw bɛɛ” sɔrɔ (1 Kɔr. 9:22, 23). O cogo kelen na, jɔncɛ kantigiman hakiliman jɛnkulu be baara kɛ n’an ka zurunaliw ye walisa ka mɔgɔ sifaw bɛɛ sɔrɔ. Walisa ka se ka baara ɲuman kɛ ni La Tour de Garde ni Réveillez-vous ! ye, an ka ɲi k’a to an hakili la u sɛbɛra mɔgɔ sifa minw kama.
2. Réveillez-vous ! labɛnna mɔgɔ sifa jumanw lo kama?
2 Réveillez-vous !: Ciden Pol kumana ‘Atɛnɛka’ minw fɛ, u tun tɛ kerecɛnya koow lɔn ani u tun tɛ bɛrɛ lɔn Bibulu koo la (Kɛw. 17:22). O cogo kelen na, Réveillez-vous ! labɛnna mɔgɔ sifa minw kama, u tɛ bɛrɛ lɔn wala u yɛrɛ tɛ foyi lɔn Bibulu koo la. N’a sɔrɔ u tɛ foyi lɔn kerecɛnw ka kalanw koo la, u b’u yɛrɛ kɔrɔsi diinan koow ma, wala u t’a lɔn ko Bibulu be se k’u dɛmɛ cogo nafaman na. Réveillez-vous ! ka laɲinita fɔlɔ ye k’a kalanbagaw dɛmɛ u ka la a la ko tiɲɛn Ala be yen. A ka laɲinita wɛrɛ ye k’u ka limaniya sabati Bibulu koo la ani k’u dɛmɛ u k’a faamu ko Jehova Seerew ni diinan wɛrɛw tɛ kelen ye.
3. La Tour de Garde fila minw be bɔ kalo o kalo, u kelen kelen ɲɛsinna jɔn lo ma?
3 La Tour de Garde: Min sɛbɛra jama kama, ale ɲɛsinna mɔgɔw ma minw kɔni be bonya la Ala ni Bibulu kan. U be ni lɔnniya dɔ ye Bibulu koo la, nka u t’a kɔnɔkow faamu bɛrɛbɛrɛ. Pol tun y’a fɔ o ɲɔgɔnna mɔgɔw lo koo la k’u be “siran Ala ɲɛ” (Kɛw. 13:14-16). La Tour de Garde min sɛbɛra kalan kama kafo kɔnɔ, ale ɲɛsinna Jehova Seerew lo ma fɔlɔ. Pol tun b’a jati ko ale ka batakiw kalanbagaw tun be Bibulu lɔn ani ko u tun be tiɲɛn koo faamu bɛrɛbɛrɛ (1 Kɔr. 1:1, 2). O cogo kelen na, La Tour de Garde min sɛbɛra kafo kama, ale ka barokunw ɲɛsinna mɔgɔw ma minw be na kafo ka lajɛnw na ani u be Jehova Seerew ka kumadenw lɔn.
4. An be waajuli kɛ ni zurunali minw ye, mun na an ka kan k’u kelen kelen kɔnɔnakow lɔn ka ɲɛ?
4 Hali n’an be to ka La Tour de Garde ni Réveillez-vous ! fara ɲɔgɔn kan k’u di mɔgɔw ma, an be kelen dɔrɔn lo lakali u ye. O kama, an k’a ɲini ka zurunali kelen kelen kɔnɔnakow lɔn. O la, n’an ye mɔgɔ dɔ kunbɛn, an bena se k’a lɔn min bena diya a tigi ye.