Nɛɛma minw dira an ma, an b’u jati fɛɛnba ye!
1 Kabini galen, Jehova ye nɛɛma sifa caaman kɛ a sagokɛlaw ye: cɛɛw ni musow, denmisɛnw fara mɔgɔkɔrɔw kan, u lɔyɔrɔ mana kɛ min o min ye (Luka 1:41, 42; Kɛw. 7:46; Fil. 1:29). A be nɛɛma juman di an ma bi?
2 An ka nɛɛma dɔw: Nɛɛma dira an ma ka kalan Jehova fɛ (Mat. 13:11, 15). Nɛɛma wɛrɛ ye ka lakalitaw kɛ ka Jehova tando kafo ka lajɛnw na (Zab. 35:18). Sababu mana di an ma ka lakalita kɛ, an b’o kɛ ni dusudiya ye. O cogo kelen na, n’an b’a jati ko baara o baara dira an ma kafo kɔnɔ o ye bonyaba ye, an bena an seko fisaman kɛ k’a dafa. Yala an b’an seen don nɛɛma baara la, o min ye ka Masaya Boon saniya ani k’a ladon tuma o tuma wa?
3 Mɔgɔ miliyɔn caaman b’u yɛrɛw ɲininga ni Ala b’u ka deliliw lamɛn. Nɛɛma dira an kɔni ma k’a ye ko duniɲa kuru bɛɛ mɔgɔba be an ka deliliw lamɛn (Ntal. 15:29). Jehova yɛrɛ lo be a sagokɛlaw ka deliliw lamɛn (1 Piɛrɛ 3:12). An be se ka magwɛrɛ a la an sago ma. Ka se ka Ala deli “tuma bɛɛ”, o ye nɛɛmaba ye an fɛ dɛ!—Efɛs. 6:18.
4 Ala “baarakɛɲɔgɔnw”: Nɛɛma ɲumanba minw dira an ma, u la dɔ ye ka Ala ka Masaya kibaro duman weleweleda i ko Ala “baarakɛɲɔgɔnw” (1 Kɔr. 3:9). Baara lo min be mɔgɔ wasa k’a dusu lafiya (Yuh. 4:34). Waajibi tɛ Jehova fɛ a ka tɛmɛ hadamadenw fɛ k’o baara dafa. Nka a y’o cii kalifa an ma sabu a b’an kanu (Luka 19:39, 40). Nka a ma kɛ komi a y’o nɛɛma di mɔgɔ bɛɛ lo ma dɛ! Minw b’u seen don cidenya baara la bɛɛ ɲɛɛ na, u ka kan ka sarati dɔw dafa Alako ta fan fɛ ani ka to o la (Es. 52:11). Yala an b’a yira ko an b’o nɛɛma jati fɛɛnba ye an kɛtɔ ka cidenya baara kɛ an ɲɛnako ye an ka porogramu kɔnɔ lɔgɔkun o lɔgɔkun wa?
5 Jehova ka nɛɛmaw be an fɛntigiya (Ntal. 10:22). I kana u jati komi fɛɛn gwansanw lo abada! An kɛtɔ k’a yira ko an be an ka nɛɛma baaraw jati fɛɛnba ye, an koo be diya an sankolola Faa ye, ale min ye fɛɛn ɲuman bɛɛ ani nilifɛn dafalen bɛɛ dibaga ye.—Yak. 1:17.