Masaya waajuli baara: nɛɛmaba lo
1 Ala b’a tɛgɛ labila ka sɔnni kɛ walisa ka hadamaden miliyari caaman niin balo loon o loon (Mat. 5:45). Nka mɔgɔ damanin dɔrɔn lo b’a yira k’u be u Danbaga waleɲuman lɔn u kɛtɔ ka Ala ka Masaya kibaro duman weleweleda (Mat. 24:14). Ile b’o nɛɛmaba jate cogo di?
2 Masaya waajuli baara be Ala bonya ani a be jigiya ni hɛɛrɛ di mɔgɔw ma minw be hami bi ka wagati gwɛlɛnw kosɔn (Heb. 13:15). Minw be sɔn o cira la, a be ɲɛnamaya banbali jigiya di u ma (Yuh. 17:3). Duniɲa nin ka baara juman be se ka mɔgɔw nafa o cogo la? A ka cidenyabaara kɛcogo fɛ, ciden Pol y’a yira ko a b’a jate fɛɛnba ye. A tun b’a jate i ko nafoloba.—Kew. 20:20, 21, 24; 2 Kɔr. 4:1, 7.
3 An k’o nɛɛmaba waleɲuman lɔn: Nɛɛma dira an ma ka waajuli kɛ. An ka waajuli kɛcogo b’a yira n’an b’o nɛɛma jate fɛɛnba ye. Yala an be wagati ta ka gafew yiracogo labɛn walisa ka se k’an lamɛnbagaw dusu sɔrɔ wa? An be baara kɛ ni Bibulu ye cogo min na, ani an be mɔgɔw hakili jagabɔ cogo min na, yala an be se k’o kɛcogo fisaya wa? Kafo ka kiin minw kalifara an ma, yala an be baara kɛ ka dafa u kɔnɔ wa? Yala an be bibulukalan daminɛcogo n’a kɛcogo lɔn wa? I n’a fɔ fɔlɔfɔlɔ ka kerecɛn kantigimanw, ani bi taw, komi an be waajuli baara jate cogo bɛnnen na, o lo b’an lasun k’a kɛ. Ani, an b’an ka nɛɛma jate fɛɛnba ye.—Mat. 25:14-23.
4 Ni kɔrɔya wala kɛnɛyakow wala koo wɛrɛw lo b’an sɛgɛra, an dusu bena saalo k’a lɔn ko an be kisɛya min kɛ waajuli baara la, o be jate fɛɛnba ye tiɲɛn na. Ala ka Kuma b’an hakili sigi k’o jijali kɛli ɲɔgɔnw nafa ka bon kosɔbɛ Jehova ɲɛɛ kɔrɔ, hali n’u tɛ bɛrɛ ye mɔgɔw ɲɛɛ na.—Luka 21:1-4.
5 Masaya waajuli baara be mɔgɔ wasa kosɔbɛ. Saan 92 balimamuso dɔ y’a fɔ ko: “Ne ye n’ yɛrɛkun di ka saan 80 ni kɔ minw kɛ Ala ka baara la, ne mana miiri u koo la, siga t’a la, o ye bonyaba ye ne fɛ dɛ! Nimisa foyi tɛ ne la. Ni koo kɛta tun lo kokura, ne tun bena segi a kan, sabu Ala ka ‘ɲumaya ka fisa ɲɛnamaya ye.’” (Zab. 63:4). Ala ye nɛɛmaba di an fana ma ka Masaya waajuli baara kɛ. An fana k’o jate fɛɛnba ye.