Nɛɛma min dira i ma ka waajuli baara kɛ, i k’o jati fɛɛnba ye
1. Mɔgɔ caaman b’an ka waajuli baara jati cogo di?
1 Sutana ka duniɲa nin kɔnɔ, mɔgɔ caaman b’a jati ko an ka waajuli baara ye “nalonmaya” koo lo ye (1 Kɔr. 1:18-21). N’an m’an janto an yɛrɛ la, o miiriya jugu be se k’an fari faga ani k’an ka kisɛya barika dɔgɔya (Ntal. 24:10; Es. 5:20). Nɛɛma min dira an ma ka kɛ Jehova Seerew ye, mun na an ka kan k’o jati fɛɛnba ye?—Es. 43:10.
2. Mun na waajuli baara ye baara senuman ye?
2 Baara senuman lo: Ciden Pol y’a fɔ ko an be waajuli baara min kɛ Ala ye, o ye “sarakalasebaaya baara” ye, o kɔrɔ baara senuman lo (Rom. 15:15, 16). Mun na baara senuman lo? Jehova Ala “ka senu.” Waajuli baara b’an kɛ a ka “baarakɛɲɔgɔnw” ye ani o baara b’a tɔgɔ saniya (1 Kɔr. 3:9; 1 Piɛrɛ 1:15). Jehova b’a jati ko an ka waajuli baara ye “tanuli sarakaw” ye. O kama, o baara kɔrɔtanin lo kosɔbɛ an ka batoli la.—Heb. 13:15.
3. Ka kibaro diiman waajuli kɛ, mun na o ye bonyaba ye?
3 Ka kibaro diiman waajuli kɛ, o ye bonyaba ye min ma la mɔgɔ caaman kan. N’o baara tun kalifara mɛlɛkɛw ma, o tun bena diya u ye ani siga t’a la, u tun bena a kɛ ka ɲɛ bɛrɛbɛrɛ (1 Piɛrɛ 1:12). Nka, Jehova y’a latigɛ k’o nɛɛmaba di an adamaden dafabaliw lo ma, an minw ye “bɔgɔ minɛnw ye.”—2 Kɔr. 4:7.
4. An be se k’a yira cogo di ko an be waajuli baara jati fɛɛnba ye?
4 An ɲɛnako fɔlɔ lo: Komi o nɛɛma ye fɛɛnba ye an fɛ, o kama an be waajuli baara jati “koo kɔrɔtalenbaw” la dɔ ye an ka ɲɛnamaya kɔnɔ (Fil. 1:10, NW ). O lo y’a to an be wagati latigɛ a kama lɔgɔkun o lɔgɔkun. Nɛɛma min dira fɔlikɛla dɔ ma ka kɛ ɔrkɛsi dɔ kɔnɔ min tɔgɔ bɔra yɔrɔ bɛɛ, n’a b’o jati fɛɛnba ye, a bena a yɛrɛ labɛn ani k’a jija k’a ka fɔlikɛcogo fisaya n’u ka kan ka taga fɔli kɛ yɔrɔ o yɔrɔ. O cogo kelen na, an fana ka kan k’an yɛrɛ labɛn ka sɔrɔ ka taga waajuli la. O la, an bena se ka “tiɲɛ kuma faranfasi cogo sɛbɛ la” ani ka mɔgɔw “kalan” cogo fisaya.—2 Tim. 2:15; 4:2.
5. An ka waajuli baara ka di jɔn ni jɔn lo ye?
5 Hali ni mɔgɔw fanba t’u mako don, kana a to o k’i fari faga. I kana ɲinɛ ko a bele ka di an ka kiinmɔgɔ caaman ye an ka taga bɔ u ye. Nka, an t’a ɲinina k’an koo diya adamadenw ye. Min kɔrɔtanin lo kosɔbɛ, o ye Jehova ka miiriya lo ye. An be jijali sɔbɛ min kɛ, o ka di a ye haali!—Es. 52:7.